N̄kpọ Ita Oro Ẹdin̄wamde Fi Ekpep Owo N̄kpọ Ọfọn
1. Ntak emi nnyịn ikpoyomde ndikpep mme owo n̄kpọ ọfọn?
1 Kpukpru mme asuanetop ẹdi mme andikpep. Edide nnyịn isobo owo ke akpa ini, inam mfiakn̄ka, m̀mê inịm ukpepn̄kpọ Bible, nnyịn inọ mme owo ukpep. Ndien se nnyịn ikpepde mme owo edi akpan n̄kpọ. Nnyịn inam mme owo ẹfiọk “ndisana uwetn̄kpọ,” emi ẹkemede ndinam mmọ ẹnyene “ọniọn̄ emi adade esịm edinyan̄a.” (2 Tim. 3:15) Nso akwa ifet ke emi edi ntem! Se itienede mi edi n̄kpọ ita oro ẹdin̄wamde nnyịn ikpep mme owo n̄kpọ ọfọn.
2. Didie ke nnyịn ikeme ndikpep n̄kpọ ke mmemmem usụn̄?
2 Mmemmem Usụn̄: Ke ini n̄kpọ etịmde an̄wan̄a nnyịn, nnyịn imekeme ndifre nte ke n̄kpọ oro ọyọsọn̄ owo oro mînyeneke ifiọk iban̄a. Ntre ke ini ekpepde owo Bible, kûtịn̄ mme n̄kpọ oro mîdịghe akpan n̄kpọ. Utu ke oro, sio mme akpan n̄kpọ wụt. Nditịn̄ ediwak ikọ iwụtke ke owo ọfiọk ndikpep n̄kpọ ọfọn. (N̄ke 10:19) Se ifọnde ikan edi ndikot sụk mme akpan itie N̄wed Abasi. Ke ama okokot itie N̄wed Abasi, tin̄ n̄kpọ ban̄a ikpehe oro enyenede n̄kpọ ndinam ye se ẹnemede. Ukwọrọikọ Oro ke Obot, emi ẹwetde ke Matthew ibuot 5 esịm 7 ọdọn̄ọ ntotun̄ọ akpanikọ, edi Jesus ekekpep mme owo akpanikọ emi ke mmemmem usụn̄ onyụn̄ anam enye edi ibio ibio.
3. Nso idi ufọn uwụtn̄kpọ, ndien nso orụk uwụtn̄kpọ ifọn ikan?
3 Mme Uwụtn̄kpọ: Mme uwụtn̄kpọ ẹsinam owo ekere n̄kpọ, ẹtụk owo, ẹnyụn̄ ẹn̄wam owo eti n̄kpọ. Kûkere ke ana afo enen̄ede ọdiọn̄ọ ndibụk mbụk mbemiso ekemede ndinọ nti uwụtn̄kpọ. Jesus ama esiwak ndinọ mbio mbio uwụtn̄kpọ oro mîwakke n̄kukọhọ. (Matt. 7:3-5; 18:2-4) Ndiwet ndise oro edisọpde in̄wan̄a owo ke ekpri babru ekeme ndinen̄ede nnyene ufọn. Eti ntịmidem ekeme ndin̄wam fi ọnọ mme uwụtn̄kpọ oro ẹnyenede ufọn.
4. Didie ke nnyịn ikeme ndibụp mme mbụme ke usụn̄ oro enyenede ufọn?
4 Mme Mbụme: Mme mbụme ẹyenam eyen ukpepn̄kpọ fo ekere n̄kpọ. Ntre, ke ama okobụp mbụme, nyene ime. Edieke ọsọpde ọnọ ibọrọ, udûtịmke ufiọk m̀mê se ekpepde eyen ukpepn̄kpọ fo an̄wan̄a enye. Edieke ibọrọ esie mînenke, ọkpọfọn obụp enye mme mbụme en̄wen oro ẹdin̄wamde enye ọnọ nnennen ibọrọ, utu ke afo ndinọ enye nnennen ibọrọ. (Matt. 17:24-27) Idụhe owo nnyịn ndomokiet emi edide mfọnmma andikpep. Mmọdo, Bible esịn udọn̄ ọnọ nnyịn ete ikpeme se nnyịn ikpepde owo kpukpru ini. Nnyịn ndinam ntre ayanam nnyịn ye mbon oro ẹkpan̄de utọn̄ ẹnọ nnyịn inyene nsinsi uwem.—1 Tim. 4:16.