Ikọ Emi Abasi Adade Jeremiah Etịn̄ Ọnọ Nnyịn
1. N̄wed ewe ke ẹkesio ke mbono district 2010/2011, ndien nso ke ẹdida enye ẹnam?
1 Ima ikop inemesịt ata etieti ke ini ẹkesiode obufa n̄wed emi ke Mbono District “Ẹka Iso Ẹkpere Jehovah!” eke 2010/2011. N̄wed emi eneme mme ukpepn̄kpọ oro ẹdude ke n̄wed Jeremiah ye n̄wed Eseme emi nnyịn inyenede ndida ndu uwem ke usen ke usen. (Rome 15:4) Ẹtịm enye man ẹda ẹnịm Ukpepn̄kpọ Bible Esop, ndien ẹditọn̄ọ ndikpep enye ke urua October 7, 2013.
2. Ntak emi nnyịn ikemede ndibọ ufọn nto edineme n̄wed Jeremiah ye n̄wed Eseme?
2 Enyene Ufọn Mfịn: Jeremiah emi ẹkenọde edisana spirit ada ewet n̄wed Bible emi, eketịn̄ prọfesi ke ini ndutịme okodude ke Judah. Ke nso nso oro, enye ekekere ke imọ idotke ndinam utom emi. (Jer. 1:6) Mme ọdiọn̄ọ esie ẹma ẹkọbọ enye. Ekeme ndidi mme iman esie emi ẹketode Anathoth, obio emana esie, ẹma ẹkọbọ enye n̄ko. (Jer. 11:21, 22) An̄wan̄a ndien ntak emi idem ekesimemde Jeremiah ndusụk ini. (Jer. 20:14) Nte nnyịn ‘inamde mme owo ke kpukpru idụt ẹdi mbet,’ nnyịn imesisobo mme mfịna ediwak ini, inyụn̄ ikop mmemidem nte Jeremiah okokopde. (Matt. 28:19) Nnyịn ndineme se enye ekewetde ayan̄wam nnyịn inam utom ukwọrọikọ nnyịn ye mbuọtidem ye ifịk.
3. Didie ke nnyịn idida ndusụk n̄kpọ oro ẹdude ke n̄wed Jeremiah emi inam n̄kpọ?
3 Se Idude ke N̄wed Emi: Ẹwet mme akpan itie N̄wed Abasi oro anade ẹkot ke sịghisịghi ubọkn̄wed. Ke utịt ukpepn̄kpọ urua kiet kiet, ẹwet mbụme kiet m̀mê iba oro ẹnyenede ufọn ke ndodobi ubọkn̄wed, mbụme emi ẹnyụn̄ ẹnam mme akpan ẹwọrọ ẹda. Ẹkpenyene ndibụp otuowo mbụme emi nte mbụme ndụn̄ọde. Ndiye ndise ẹdu ke n̄wed emi, oro esop edimade nditịn̄ n̄kpọ mban̄a.
4. Didie ke nnyịn ikeme ndibọ ufọn ọyọhọ ọyọhọ ke ndikpep n̄wed Jeremiah?
4 Bemiso kpep ikpehe oro edikpepde ke idem fo man ọbọ ufọn ọyọhọ ọyọhọ. Se mme akpan n̄kpọ oro afo edidade anam n̄kpọ ke uwem fo ye ke an̄wautom. Ntiene buana ọyọhọ ọyọhọ ke ndibọrọ mme mbụme. Jehovah ama an̄wam Jeremiah anam utom oro ẹkedọn̄de enye ye idatesịt ye uyụhọ. (Jer. 15:16) Nnyịn ndikpep obufa n̄wed emi akpakam an̄wam nnyịn inam utom ukwọrọikọ nnyịn ke ukem usụn̄ oro.