Ntak Duopeba Oro Anamde Ikwọrọ Ikọ

Ntak emi nnyịn ikwọrọde ikọ inyụn̄ ikpepde mme owo eti mbụk? Ndi akpan ntak edi man in̄wam mbon esịt akpanikọ ẹdụk usụn̄ oro adade esịm uwem? (Matt. 7:14) Oro edi akpa ntak oro ẹnọde ke idak emi, edi emi idịghe akpan ntak oro anamde ikwọrọde ikọ. Ewe ke otu ntak 12 emi ke afo ekere ke edi ata akpan ntak oro anamde ikwọrọ ikọ?

1. Ukwọrọikọ an̄wam ndinyan̄a uwem mme owo.—John 17:3.

2. Ukwọrọikọ odụri mme idiọkowo utọn̄.—Ezek. 3:18, 19.

3. Ukwọrọikọ etip esịn ke ndinam ntịn̄nnịm ikọ Bible osu.—Matt. 24:14.

4. Ukwọrọikọ edi usụn̄ oro Abasi adade owụt edinen ido esie. Owo ikemeke ndiduọhọ Jehovah nte ke enye inọhọ mme idiọkowo ifet ndikabade esịt mbemiso osobode mmọ.—Utom 17:30, 31; 1 Tim. 2:3, 4.

5. Enye anam isio isọn oro ikamade mme owo oro ẹkedepde ke iyịp Jesus, oro edi, ndin̄wam mmọ ke n̄kan̄ eke spirit.—Rome 1:14, 15.

6. Ukwọrọikọ anam ikûkama iyịp owo.—Utom 20:26, 27.

7. Oyom ikwọrọ ikọ man inyene edinyan̄a.—Ezek. 3:19; Rome 10:9, 10.

8. Ukwọrọikọ owụt ke imama mbọhọidụn̄ nnyịn.—Matt. 22:39.

9. Enye owụt ke imokop uyo inọ Jehovah ye Eyen esie.—Matt. 28:19, 20.

10. Ukwọrọikọ edi usụn̄ kiet emi ituakde ibuot inọ Abasi.—Heb. 13:15.

11. Nnyịn ndikwọrọ ikọ owụt ke imama Abasi.—1 John 5:3.

12. Ukwọrọikọ etịp esịn ke ndinam enyịn̄ Jehovah asana.—Isa. 43:10-12; Matt. 6:9.

Ke nditịm ntịn̄, idịghe mme ntak emi kpọt ẹnam nnyịn ikwọrọ ikọ. Ke uwụtn̄kpọ, ukwọrọikọ esisọn̄ọ mbuọtidem nnyịn onyụn̄ ọnọ nnyịn ifet ndidi nsan̄autom Abasi. (1 Cor. 3:9) Edi ọyọhọ ntak 12 edi ata akpan ntak oro anamde ikwọrọ ikọ. Edide mme owo ẹkpan̄ utọn̄ ẹnọ nnyịn m̀mê ikpan̄ke, utom ukwọrọikọ etịp esịn ke ndinam enyịn̄ Abasi asana onyụn̄ ọnọ Jehovah se enye edibọrọde owo eke osụn̄ide enye. (N̄ke 27:11) Ke akpanikọ, imenyene ata nti ntak ‘ndika iso n̄kpep nnyụn̄ ntan̄a eti mbụk ye unana edikpa mba.’—Utom 5:42.