N̄wam Mme Owo Ẹkpan̄ Utọn̄ Ẹnọ Abasi
1. Ndiye uduot n̄kpri n̄wed ewe ke ẹkesio ke Mbono District “Yak Obio Ubọn̄ Abasi Edi!” ndien nso inam mmọ ẹnen̄ede ẹnyene ufọn?
1 Ke Mbono District “Yak Obio Ubọn̄ Abasi Edi!” ẹma ẹsio mbufa ndiye uduot n̄kpri n̄wed iba, Kpan̄ Utọn̄ Nọ Abasi Nyụn̄ Du Uwem ke Nsinsi ye Kpan̄ Utọn̄ Nọ Abasi emi owo mîwetke n̄kpọ awak. Sia ẹwetde n̄kpọ mbio mbio ke mme n̄wed emi, emem utom ndisọsọp n̄kabade mmọ. Ke akpanikọ, ke ini ẹkesiode Kpan̄ Utọn̄ Nọ Abasi Nyụn̄ Du Uwem ke Nsinsi, ẹma ẹnọ unyịme ẹte ẹkabade enye ẹsịn ke usem 431.
2. Ndiye uduot n̄kpri n̄wed emi ẹdinyene ufọn inọ mmanie?
2 Ndiye uduot n̄kpri n̄wed emi ẹdinyene ufọn inọ mmanie akpan akpan? Kere ban̄a mme idaha oro ẹtienede mi, oro ẹsiwakde ndisobo ke ofụri ererimbot:
• Asuanetop emi enyenede nneme ye enyeneufọk, edide ke akpa ediwaha m̀mê ke mfiakn̄ka, okụt ke enyeneufọk oro ifiọkke n̄wed mîdịghe ikemeke ndikot n̄wed ọfọn.
• Asuanetop ọkwọrọ ikọ ọnọ mme owo emi ẹsemde usem oro nnyịn inyenede esisịt n̄wed mîdịghe inyeneke-nyene. Mîdịghe ediwak owo ke efakutom ikemeke ndikot n̄wed ke usem oro mmọ ẹkemede ndisem ọfọn.
• Asuanetop ọkwọrọ ikọ ọnọ inan ke usem idiọn̄ọ ke efakutom esie.
• Asuanetop mîdịghe ete m̀mê eka oyom ndikpep ekpri eyen akpanikọ, edi eyen emi ifiọkke kan̄a ndikot n̄wed.
3. Didie ke ẹtịm Kpan̄ Utọn̄ Nọ Abasi?
3 Nte Ẹtịmde Mmọ: Ikọ inen̄ekede iwak ke Kpan̄ Utọn̄ Nọ Abasi, ẹwet udịmikọ kiet ye itie N̄wed Abasi kiet emi ẹsiode mme akpan n̄kpọ ẹwụt ke utịt page kiet kiet. Ntak-a? Da nte ke owo ọnọ fi ediye uduot ekpri n̄wed ke usem oro afo mûkemeke ndikot, ndusụk ẹwetde ke mme abisi emi afo mûfiọkke ndikot. Ndi afo akpama n̄wed emi idem ọkpọkọm enye enyene ndiye ndise? Udumaha. Kpasụk ntre, mbon oro mîkemeke ndikot n̄wed isimaha n̄wed oro ẹwetde ikọ awak. Mmọdo, se ẹnen̄erede ẹkụt ke page kiet kiet edi ndise oro ẹtịmde ẹwet, ye idiọn̄ọ oro owụtde nte ẹdinemede mme ndise emi ke adiana ke adiana.
4. Didie ke ẹtịm Kpan̄ Utọn̄ Nọ Abasi Nyụn̄ Du Uwem ke Nsinsi?
4 Kpan̄ Utọn̄ Nọ Abasi Nyụn̄ Du Uwem ke Nsinsi ye Kpan̄ Utọn̄ Nọ Abasi ẹnyene ukem ndise. Ẹtịm enye man ẹda ẹkpep n̄kpọ ye mbon oro mîkemeke ndikot n̄wed ọfọn m̀mê oro ẹkpepde-kpep ndikot n̄wed. Ada ukpepn̄kpọ ekeme n̄ko ndikama ediye uduot ekpri n̄wed emi ke ini ekpepde owo n̄kpọ ke n̄wed Kpan̄ Utọn̄ Nọ Abasi. Ẹwet mbụme ke enyọn̄ enyọn̄ ubọk ufien, ke ukpepn̄kpọ kiet kiet emi ẹdide page iba, ẹnyụn̄ ẹbọrọ mbụme emi ke page ukpepn̄kpọ iba oro. Ẹwet mme n̄kpọ ye mme itie N̄wed Abasi ndida nnam mme ndise ẹn̄wan̄a. Ekebe odu ke utịt utịt mben ediwak page, emi ẹwetde ndusụk akpan n̄kpọ efen ye mme itie N̄wed Abasi oro ẹkemede ndineme, etiene ukeme eyen ukpepn̄kpọ.
5. Ini ewe, ndien didie ke ikeme ndinọ ndiye uduot n̄kpri n̄wed emi?
5 Nte Ẹkpedade Mmọ Ẹnam N̄kpọ: Afo emekeme ndinọ ekededi ke otu ndiye uduot n̄kpri n̄wed emi ke utom ukwọrọikọ eke ufọk ke ufọk ini ekededi oro afo ekerede ke odot, idem ọkpọkọm idịghe ndiye uduot n̄kpri n̄wed ke ẹnọ ọfiọn̄ oro. (Se ekebe oro “Nte Ẹkpenọde Mmọ.”) Emekeme ndinọ n̄wed emi ke ini anamde mfiakn̄ka ke ndidọhọ owo oro enyenede udọn̄ ete ke imenyene n̄kpọ ndiwụt enye onyụn̄ ayak ediye uduot ekpri n̄wed kiet ọnọ enye.
6. Didie ke idikama ndiye uduot n̄kpri n̄wed emi inịm ukpepn̄kpọ Bible?
6 Sia Kpan̄ Utọn̄ Nọ Abasi mînyeneke mbụme oro ẹmịn̄de-mịn̄, udunemeke enye nte ikpehe mbụme ye ibọrọ nte afo akpanamde ke ini ekpepde owo n̄kpọ ke n̄wed Bible Ekpep. Mme owo ke kpukpru ebiet ẹsima ndikop mbụk. Ntem kama mme ndise oro bụk mme mbụk eke odudu spirit oro ẹwetde ke Bible nọ mmọ. Nam se idude ke mme ndise ẹn̄wan̄a. Tịn̄ ikọ sịn ufiop. Dọhọ eyen ukpepn̄kpọ etịn̄ se enye okụtde onyụn̄ ekerede. Kot itie N̄wed Abasi oro odude ke utịt page, nyụn̄ neme se itie oro etịn̄de ye enye. Bụp mbụme man enye etiene abuana ke nneme nyụn̄ kụt ete ke se afo etịn̄de an̄wan̄a enye. Edieke enye akamade Kpan̄ Utọn̄ Nọ Abasi Nyụn̄ Du Uwem ke Nsinsi, ke ini enemede ndise kiet kiet, kot mme n̄kpọ ye itie N̄wed Abasi oro ẹwetde ẹdian mme ndise oro ye enye.
7. Didie ke ikeme ndin̄wam eyen ukpepn̄kpọ Bible nnyịn anam n̄kọri?
7 N̄wam Eyen Ukpepn̄kpọ Anam N̄kọri: Imodori enyịn ke nneme oro edinemede ye eyen ukpepn̄kpọ fo ayanam ọdọn̄ enye ndikpep ndikot n̄wed man enye ekeme ndikọ ifiọk mban̄a Jehovah ke idemesie. (Matt. 5:3; John 17:3) Mmọdo, edieke esikamade Kpan̄ Utọn̄ Nọ Abasi enyene nneme, nte ini akade, emekeme ndikpep eyen ukpepn̄kpọ nte ẹkotde n̄wed, ndien emekeme ndikpụhọ nda Kpan̄ Utọn̄ Nọ Abasi Nyụn̄ Du Uwem ke Nsinsi n̄kpep enye n̄kpọ. Inamke n̄kpọ m̀mê ediye uduot ekpri n̄wed ewe ke akama, eyen ukpepn̄kpọ oro ididotke ndina baptism ndondo oro enye okụrede ndikpep ediye uduot ekpri n̄wed oro. Afo enyene ndikama n̄wed Bible Ekpep n̄kpep enye n̄kpọ m̀mê n̄wed efen oro odotde emi edinamde enye enen̄ede enyene ifiọk Bible.
8. Ntak emi afo adatde esịt ke mbufa n̄kpọutom oro idikamade ke an̄wautom?
8 Ana mme owo ẹkpan̄ utọn̄ ẹnọ Andikara ekondo edieke anade mmọ ẹdu uwem nsinsi. (Isa. 55:3) N̄ko, uduak Jehovah edi nte “kpukpru orụk owo” ẹsịnede mbon oro mîkemeke ndikot n̄wed, ẹkpep ndikpan̄ utọn̄ nnọ enye. (1 Tim. 2:3, 4) Esịt enen̄ede adat nnyịn ke mbufa n̄kpọutom emi nnyịn ikemede ndida n̄kpep mme owo nte ẹkemede ndikpan̄ utọn̄ nnọ Abasi!
[Ekebe ke page 3]
Nte Ẹkpenọde Mmọ
Wụt enyeneufọk page 2-3, nyụn̄ dọhọ ete: “Nte akpama ndidu uwem ke ererimbot oro etiede ntem? [Bet ibọrọ.] N̄wed Abasi ọn̄wọn̄ọ [mîdịghe, edisana n̄wed emi ọn̄wọn̄ọ] ete ke ibịghike Abasi ayanam ererimbot eye onyụn̄ etie emem emem, owo idibueneke idinyụn̄ idọn̄ọke. Kop mi se anade inam man idu do. [Kot Isaiah 55:3, emi ẹsiakde ke enyọn̄ page 3.] Itien̄wed oro ọdọhọ ‘ika itiene’ Abasi inyụn̄ ‘ikpan̄ utọn̄’ inọ enye. Edi didie ke ikpakpan̄ utọn̄ inọ Abasi?” Kụbọde ka page 4-5 nyụn̄ neme ibọrọ mbụme oro ye enye. Edieke enye mînyeneke ini, kpọn̄ ediye uduot ekpri n̄wed oro nọ enye nyụn̄ nam ndutịm ndifiak n̄ka n̄keneme ibọrọ mbụme oro ye enye.