N̄kparawa Owo Ẹbụp—Didie ke N̄keme Ndinyene Nti Ufan?

Jehovah okobot owo ye udọn̄ ndimehe ye mme owo nnyụn̄ nnam ufan. (N̄ke 18:1, 24) Man ikeme ndibọ ufọn nto mme itie ebuana ntem, ana itịn̄ enyịn imek mme ufan nnyịn. (N̄ke 13:20) Edieke edide ima emi mme owo ẹmade Jehovah anam mmọ ẹdi ufan, mmọ ẹdidi itai ye aban̄. Mme N̄ke 17:17 ọdọhọ ete: “Ata ufan amama ufan kpukpru ini, onyụn̄ edi eyeneka emi amanade ọnọ ini nnanenyịn.” Ke ini nti ufan ẹnyenede mfịna, mmọ ẹsinam n̄kpọ ye kiet eken ke usụn̄ emi enemde Jehovah esịt. Didie ke ikeme ndimek nti ufan?

Akpanikọ edi nte ke mme akpan nsan̄a nnyịn ẹkeme ndinyene akwa odudu ke idem nnyịn. Ntem, enen̄ede ọfọn ida ọniọn̄ imek mme nsan̄a nnyịn. Edieke inamde ufan ye mbon oro ẹdide ufan Jehovah, ima mbon oro Abasi amade, nnyịn iyenyene nti nsan̄a. Se ikpepde ito mmọ ayan̄wam nnyịn ibiere ndidu uwem oro enemde Jehovah esịt. Ẹyak nnyịn imek mme ufan emi ẹdin̄wamde nnyịn ika iso idi ufan ye Jehovah, kpa akakan ufan nnyịn!—Ps. 15:1, 4; Isa. 41:8.