Kụt Se Ifọnde ke Ọkpọsọn̄ Utom Fo
1. Nso ikeme ndinam nnyịn itek ke ifịk ke utom ukwọrọikọ?
1 Abasi okobot owo man enye “okụt se ifọnde ke ọkpọsọn̄ utom esie.” (Eccl. 2:24) Edi edieke nnyịn mîkwe nti utịp ke utom ukwọrọikọ nnyịn idem ekeme ndimem nnyịn, anam nnyịn ikûkop idatesịt, onyụn̄ anam nnyịn itek ke ifịk. Nso ikeme ndin̄wam nnyịn ika iso ikop idatesịt?
2. Ntak emi nnyịn mîkpekereke ke kpukpru owo ẹdikop ukwọrọikọ nnyịn?
2 Fiọk Ete ke Idịghe Kpukpru Owo Ẹdikop: Ti ete ke okposụkedi emi mbon oro ẹkenamde se Jesus ọkọkwọrọde mîkawakke, enye okosụk okokụt unen ke utom ukwọrọikọ esie. (John 17:4) Ke uwụtn̄kpọ asuan n̄kpasịp oro Jesus ọkọnọde, enye ọkọdọhọ ke etop Obio Ubọn̄ oro etiede nte n̄kpasịp idikọrike ke esịt ediwak owo. (Matt. 13:3-8, 18-22) Edi ukeme ofụri esịt oro isịnde osụk okokụt unen.
3. Didie ke nnyịn ikeme ‘ndin̄wụm mfri’ idem ọkpọkọm mme owo inen̄ekede inam n̄kpọ iban̄a ukwọrọikọ nnyịn?
3 Nte In̄wụmde Ekese Mfri: Kpa nte uwụtn̄kpọ Jesus owụtde, mbon oro ẹnyịmede etop esie ‘ẹyen̄wụm mfri.’ (Matt. 13:23) Ke ini ibokpot etịbede, ọkọri okpon, enye esin̄wụm idem ibokpot, in̄wụmke esan̄. Ntre, mfri oro mme Christian emi ẹkụtde unen ẹsin̄wụmde, inen̄ekede idi mbufa mbet, edi ẹdi ediwak n̄kpasịp Obio Ubọn̄, oro edi, se nnyịn itịn̄de iban̄a Obio Ubọn̄. Emi esida mme ‘ufọn’ emi ẹkemede ndinam ikop inemesịt edi, inamke n̄kpọ m̀mê mme owo ẹnam n̄kpọ ẹban̄a etop oro ikwọrọde m̀mê inamke. Nnyịn imetiene inam enyịn̄ Jehovah asana. (Isa. 43:10-12; Matt. 6:9) Imadara ndidi nsan̄autom Abasi. (1 Cor. 3:9) Ndien utọ “mfri n̄kpọkinua” oro enem Jehovah esịt.—Heb. 13:15, 16.
4. Mme utịp ewe oro nnyịn mîfiọkke ke utom ukwọrọikọ nnyịn ekeme ndinyene?
4 N̄ko, ọkpọsọn̄ utom oro inamde ekeme ndin̄wụm mfri oro nnyịn mîkwe. Eyedi ndusụk mbon oro Jesus ọkọkwọrọde ikọ ọnọ ikakabakede idi mme mbet esie ibọhọke ke enye ama okokụre utom ukwọrọikọ esie ke isọn̄. Kpasụk ntre, ekeme ndidi n̄kpasịp Obio Ubọn̄ oro itọde edidọn̄ n̄kam inyụn̄ ikọri ke esịt owo nte ini akade, ndien enye ekeme ndidi ndifiọk akpanikọ edi nnyịn ifiọkke. Ke akpanikọ, utom ukwọrọikọ nnyịn enyene ekese ufọn. Ntre ẹyak nnyịn ‘ika iso in̄wụm ekese mfri’ inyụn̄ iwụt ke idi mme mbet Jesus.—John 15:8.