Ndiye Mbufa Tract!
1. Ewe n̄kpọ oro isikamade ke an̄wautom ke ẹdọn̄ ata ndiye mbufa n̄kpọ?
1 Ẹma ẹsio mbufa tract ition ke Mbono District “Ikọ Abasi Edi Akpanikọ!” eke 2013. Ẹnyụn̄ ẹdian Mbụk Obio Ubọn̄ Nọ 38, emi ibuotikọ edide “Ndi Mme Akpan̄kpa Ẹkeme Ndifiak Ndu Uwem?” ke otu mme tract oro inyenede. Ẹdọn̄ ata ndiye mbufa n̄kpọ ke tract mbitiokiet emi. Ntak emi ẹtịmde mmọ ntem? Ke ini inọde mme owo tract emi ke ufọk ke ufọk, didie ke ikeme ndida ndiye mbufa n̄kpọ emi nnam n̄kpọ nte ọfọnde?
2. Ntak emi ẹtịmde mbufa tract emi ntem?
2 Ntak Ẹtịmde Mmọ Ntem?: Nti usụn̄ ndinyene nneme ye mme owo ke ufọk ke ufọk ẹsịne n̄kpọ inan̄ oro ẹtienede mi: (1) Bụp mbụme oro anamde ọfiọk ekikere mme owo man ada oro ọtọn̄ọ nneme. (2) Kot mme itie N̄wed Abasi nọ mmọ. (3) Nọ mmọ n̄wed. (4) Bụp mbụme oro edibọrọde ini en̄wen, nyụn̄ diomi ndifiak n̄ka. Nte ẹtịmde mbufa tract emi ayan̄wam nnyịn inam n̄kpọ mbinan̄ emi.
3. Didie ke ikpọnọ mbufa tract emi ke an̄wautom?
3 Nte Ẹkpedade Mmọ Ẹnam N̄kpọ: (1) Ke ama ọkọkọm owo oro, wụt enye mme mbụme oro ẹdude ke edem tract emi, nyụn̄ bụp se enye ekerede. (2) Kụbọde tract oro, nyụn̄ neme “Se Bible Etịn̄de.” Edieke ini odude ndikot itie N̄wed Abasi, kot nnennen ke Bible. Edieke enye enyenede ini, neme “Ufọn Oro Afo Ekemede Ndibọ Nto Emi.” (3) Nọ tract oro nyụn̄ dọhọ enye okot se isụhọde ke ini idemesie. (4) Mbemiso afo ọkpọn̄de enye, wụt enye mbụme oro odude ke edem ke idak “Kere Ise” nyụn̄ diomi ndifiak n̄keneme ibọrọ oro Bible ọnọde.
4. Didie ke ikpada mbufa tract oro inam n̄kpọ ke ini mfiakn̄ka?
4 Isọn̄ke ndida tract emi nnam mfiakn̄ka n̄ko. Da itien̄wed oro ẹdude ke edem tract emi bọrọ mbụme oro okobụpde akpa ini oro okosobode ye enye. Mbemiso ọkpọn̄de, wụt enye ndise ediye uduot ekpri n̄wed Eti Mbụk ke edem tract emi, wụt enye n̄wed oro ye ukpepn̄kpọ oro etịn̄de n̄kpọ aban̄a se tract emi enemede, nyụn̄ nọ enye ediye uduot ekpri n̄wed oro. Edieke enye ọbọde, diomi ndifiak n̄keneme se idude ke n̄wed emi ye enye. Ukpepn̄kpọ Bible ke ọtọn̄ọ oro! Mîdịghe, utu ke ndinọ enye ediye uduot ekpri n̄wed emi, emekeme ndinọ enye tract en̄wen onyụn̄ odiomi ndifiak n̄keneme se idude ke tract oro.
5. Nso ufọn ke tract ẹnyene ke utom ukwọrọikọ nnyịn?
5 Imada tract inam utom ukwọrọikọ ke se ibede isua 130 idahaemi. Okposụkedi emi nte mmọ ẹtiede ye nte ẹtịmde mmọ mîdịghe ukem, mmọ ẹfọn etieti ndida nnọ ikọ ntiense. Ẹyak nnyịn ida mbufa tract emi ika iso isuan ifiọk akpanikọ Bible ke ofụri ererimbot.—N̄ke 15:7a.