Domo Ndisika N̄kpọ ke Ini
1. Nso uwụtn̄kpọ ke Jehovah enịm aban̄a edinam n̄kpọ ke ini?
1 Kpukpru ini, Jehovah esinam n̄kpọ ke ini. Ke uwutn̄kpọ, enye esin̄wam mme asan̄autom esie ke “nnennen ini.” (Heb. 4:16) Enye n̄ko esinọ mme asan̄autom esie udia eke spirit “ke nnennen ini.” (Matt. 24:45) Ntem nnyịn imekeme ndinịm ke usen iyatesịt esie oro osụk edide “idibehe ini.” (Hab. 2:3) Jehovah ndisinam n̄kpọ ke ini enen̄ede enyene ufọn ọnọ nnyịn! (Ps. 70:5) Isimemke inọ nnyịn ndinam n̄kpọ ke ini sia idide mme anana-mfọnmma, isinyụn̄ inyenede ediwak n̄kpọ ndinam. Ntak emi ikpodomode ndisinam n̄kpọ ke ini?
2. Ntak emi edika n̄kpọ ke ini esinọde Jehovah ubọn̄?
2 Imemke utom ndinam n̄kpọ ke ini ke mme akpatre usen emi ediwak owo ẹdide mme ama idem ẹnyụn̄ ẹnanade mfara ke idem. (2 Tim. 3:1-3) Mmọdo, ke ini mme Christian ẹkade utom idịbi udia mmọ ke ini, ẹdụkde mbono esop ẹnyụn̄ ẹnamde mme n̄kpọ eken oro ẹkediomide ke ini, mme owo ẹsikụt, ndien emi esinọ Jehovah ubọn̄. (1 Pet. 2:12) Ndi nnyịn imesitọn̄ọ utom idịbi udia nnyịn ke ini, edi ika mme edinam ukara Abasi ke idiọk ini? Ndisika mbono esop ke ini mbemiso ikwọ ye akam owụt ke imoyom ndikpebe Ete nnyịn eke heaven, sia enye edide Abasi ndutịm.—1 Cor. 14:33, 40.
3. Ntak emi edika n̄kpọ ke ini owụtde ke owo ekere aban̄a mbon en̄wen?
3 Owo ndika n̄kpọ ke ini owụt ke enye ekere aban̄a mbon en̄wen. (Phil. 2:3, 4) Ke uwụtn̄kpọ, ke ini ikade mbono esop ye mbono an̄wautom ke ini, emi isitịmekede nditọete nnyịn. Edi ke ini iwakde ndika n̄kpọ ke idiọk ini, emi esinam mbon en̄wen ẹkere ke nnyịn ida ini nnyịn ke akpan n̄kpọ ikan eke mmọ. Owo ndika n̄kpọ ke ini owụt ke enye edi se ẹkpeberide edem, esitịn̄ enyịn anam n̄kpọ, onyụn̄ edi se ẹkpebuọtde idem—kpa mme edu emi kpukpru owo ẹmade.
4. Nso ke ikpanam edieke isiwakde ndika n̄kpọ ke idiọk ini?
4 Edieke esiwakde ndika n̄kpọ ke idiọk ini, kere ban̄a se idide ntak. Fiak se se esinamde, nyụn̄ nam ndutịm oro edikemede ndiyak fi anam se oyomde ndinam ke nnennen ini. (Eccl. 3:1; Phil. 1:10) Ben̄e Jehovah an̄wam fi. (1 John 5:14) Ndinam n̄kpọ ke ini edi usụn̄ kiet ndinam n̄kponn̄kan ẹwụhọ iba emi ẹdide ndima Abasi ye mbọhọidụn̄.—Matt. 22:37-39.