Ti Mbon Oro Ẹdude ke Ufọk Oro Ẹsisede Ẹban̄a N̄kani Owo
1. Ntak emi ikpakade ikọkwọrọ ikọ inọ mbon oro ẹdude ke ufọk oro ẹsisede ẹban̄a n̄kani owo ye mbon n̄kpọnnam?
1 Ediwak owo mfịn ẹsobo mme afanikọn̄ oro usọn̄ akamade. (Eccl. 12:1-7) Ndusụk n̄kani owo ẹdụn̄ ke ufọk oro ẹsisede ẹban̄a n̄kani owo ye mbon n̄kpọnnam, ntre isimemke utom ndikụt mmọ ke ini ikwọrọde ikọ ke ufọk ke ufọk. Ukem oro ke esinyụn̄ edi ke mme obio oro mme ete ye ẹka oro ẹma ẹkesọn̄ ẹwọrọde ẹkedụn̄ ye nditọ m̀mê mme iman eken. Okposụkedi emi ndusụk n̄kani owo mîkemeke ndisan̄a m̀mê nditi n̄kpọ ọfọn, mmọ ye mbon n̄kpọnnam eken oro ẹdụn̄de do ẹkeme ndisụk mfiọk se ẹkpepde mmọ ẹban̄a Jehovah nnyụn̄ mma enye. Didie ke ikeme ndikwọrọ eti mbụk oro aban̄ade “utịbe utịbe idotenyịn” nnọ mmọ?—Titus 2:13.
2. Didie ke esenyịn utom ekeme ndinam ndutịm man ẹka mme ebiet emi ẹsisede ẹban̄a n̄kani owo?
2 Nte Ikpọtọn̄ọde: Esenyịn utom ekeme ndinam ndutịm man mme asuanetop oro ẹdotde ẹka mme utọ itie emi. Edieke inamde eti ndutịm inyụn̄ iberide edem ke Jehovah, nnyịn iyekeme nditọn̄ọ ukpepn̄kpọ Bible otu ke mme itie emi.—N̄ke 21:5; 1 John 5:14, 15.
3, 4. (a) Anie ke ikpebem iso ikụt ima ika ufọk emi ẹsisede ẹban̄a n̄kani owo? (b) Nso ndutịm ke ikpanam inọ ukpepn̄kpọ oro?
3 Nte ufọk oro etiede edin̄wam nnyịn ifiọk nte idinịmde ukpepn̄kpọ emi. Edieke ufọk oro okponde, ediwak owo ẹnyụn̄ ẹdude, ọyọfọn ọdọhọ anamutom do ke iyom ndinyene nneme ye etubom itie oro. Ke ufọk oro n̄kani owo ifan̄ ẹdude ye owo iba m̀mê ita oro ẹsisede mmọ enyịn, ọkpọfọn odiomi ini man etịn̄ ikọ nnennen ye andinyene ebiet oro.
4 Ke idaha ekededi, dọhọ ke afo asan̄a ẹsịn udọn̄ ọnọ mme owo ndisikot n̄wed nnyụn̄ n̄kpep n̄kpọ mban̄a Bible. Bụp m̀mê odu owo do oro akpamade nditiene ndụk ukpepn̄kpọ Bible otu emi edibịghide ke n̄kpọ nte minit 30, usen kiet ke urua. Ẹkeme ndikama nsio nsio n̄wed, edi ediwak owo ẹsima ndikama N̄wed Mi eke Mme Mbụk Bible ye Akakan Owo Oro Akanam Odude Uwem. Emekeme ndiwụt etubom itie oro mme n̄wed emi. Emekeme nditie ye enye nnịm usen, ini, ye itie oro ẹdisinịmde ukpepn̄kpọ emi, ekem ẹwet mmọ ẹdian ke itie emi kpukpru owo ẹdikụtde. Kûkop ndịk ndidọhọ ke idi kiet ke otu Mme Ntiense Jehovah. N̄ko, dọhọ esenyịn itie oro ke idịghe ufọkabasi ke oyom ndisinịm edi ke oyom ndikpep Bible ye mme owo do.
5. Nso idinam ukpepn̄kpọ oro enem onyụn̄ enyene ufọn?
5 Nte Ẹkpenịmde Ukpepn̄kpọ Oro: Nte n̄kpọ etiede ke ufọk oro edin̄wam fi ebiere nte edinịmde ukpepn̄kpọ emi, ntre ben̄e idem ndinam mme ukpụhọde nyụn̄ nam n̄kpọ ke mbufiọk. Owo oro edinịmde ukpepn̄kpọ emi ekpenyene ndikama n̄wed oro ẹdade ẹnịm ukpepn̄kpọ emi awak ndien ekem ọbọ mmọ ke ẹma ẹkụre. Edieke n̄wed oro ẹkamade odude ke ikpọ abisi emekeme ndida nsọk ndusụk mmọ. Ọfọn ndikot mme ikpehe ekikere, mbụp mme mbụme, nnyụn̄ nyak ẹnọ ibọrọ nte isinamde. Emekeme ndidọhọ mbon oro ẹkemede ndikot n̄wed ẹnyụn̄ ẹyomde nditiene mbuana ẹkot mme ikpehe ekikere m̀mê mme itie Bible. Yak kpukpru owo ẹtiene ẹbuana ke ukpepn̄kpọ oro, nam enye enem nyụn̄ tie ufan ufan. Emekeme ndidọhọ etubom itie oro ke imọn̄ iwụt vidio oro ekemede ndinam owo enyene mbuọtidem ke se Bible etịn̄de m̀mê enye oro etịn̄de se ikpekpepde ito mbụk Bible. Emekeme nditọn̄ọ nnyụn̄ mberi ke akam. Ndusụk owo ẹsikam ẹkwọ ikwọ Obio Ubọn̄.
6. Didie ke akpan̄wam owo oro mînyịmeke se ẹkotde m̀mê ẹnemede?
6 Nso ke akpanam edieke owo mînyịmeke se ẹkotde m̀mê se ẹnemede? Da mbufiọk bọrọ enye. (Col. 4:6) Emekeme ndikot itie Bible kiet oro enemede n̄kpọ oro. Edieke oro mîfọnke, ọkpọfọn ọdọhọ enye ke imokop se enye etịn̄de onyụn̄ ọdọhọ ke iyeneme n̄kpọ emi ye enye ẹma ẹkụre ukpepn̄kpọ oro.
7. Nso ke akpanam edieke owo enyenede mbụme mîdịghe enen̄ede enyene udọn̄ ndikpep Bible?
7 Ndusụk ini, owo ekeme ndibụp mbụme mîdịghe oyom ndikpep ekese n̄kpọ. Eyenete an̄wan kiet esiwak ndidọhọ: “Ata eti mbụme edi oro. Edi mbọk bet tutu nnyịn ikụre ndien ami ye afo iyetie ntre ineme.” Ọfọn ndidiomi ini ye itie efen ndida nnịm ukpepn̄kpọ Bible ye owo oro enyenede udọn̄.
8. Didie ke ẹkpebat ukpepn̄kpọ otu ye ukpepn̄kpọ Bible oro ẹnịmde ye owo kiet kiet?
8 Ifọnke ẹkpụhọ nditọete oro ẹsikade ẹkenịm ukpepn̄kpọ ye otu oro. Asuanetop ekededi oro etienede enịm ukpepn̄kpọ emi ekeme nditiene mbat hour. Ẹma ẹtọtọn̄ọ ukpepn̄kpọ emi, asuanetop oro adade usụn̄ ekeme ndibat mfiakn̄ka kiet kpukpru ini oro ẹnịmde ukpepn̄kpọ emi, onyụn̄ abat ukpepn̄kpọ Bible kiet ke utịtọfiọn̄. Ukem nte isinamde, ẹkeme ndibat ukpepn̄kpọ Bible oro ẹnịmde ye owo kiet kiet oro etịmde ọfiọk se ẹkpepde enye onyụn̄ oyomde ndikpep n̄kpọ.
9, 10. Mbon oro ẹnamde utom emi ẹkpenyene nso utọ edu? Nam an̄wan̄a.
9 Nam Ukpepn̄kpọ Emi Aka Iso: Ọfọn ẹsio usen ye ini ẹnịm ẹnọ ukpepn̄kpọ otu. Mbon n̄kpọnnam ye mme anamutom ke ufọk oro ẹyema ẹsinịm ukpepn̄kpọ emi kpukpru ini, ẹtọn̄ọ ke ini ẹnyụn̄ ẹtre ke ini. (Matt. 5:37) Ntem ọfọn ẹsịn ifịk, ẹtịn̄ enyịn, ẹnyụn̄ ẹnam eti ndutịm. Esifọn asuanetop iba emi ẹdotde ẹnịm ukpepn̄kpọ emi. (Eccl. 4:9, 10) Ke ufọk oro okponde, ẹkeme ndiyom se ibede asuanetop iba ẹnịm ukpepn̄kpọ emi.
10 Nditie ufan ufan ye mme owo nnyụn̄ mma mmọ edi akpan n̄kpọ n̄ko. (Phil. 2:4) Tọn̄ọ ke akpa ini oro enịmde ukpepn̄kpọ emi, da ini nyene nneme ye owo kiet kiet oro ẹdụkde. Wet enyịn̄ mmọ nyụn̄ domo nditi enyịn̄ emi mbemiso ukpepn̄kpọ urua en̄wen. Edi mbọk kpeme ke enyene n̄kani owo oro mîsimaha owo oro mmọ mîdiọn̄ọke okot mmọ ke enyịn̄. Edieke enyenede ime onyụn̄ atuade mmọ mbọm, emi ayanam ẹma se afo anamde.
11. Didie ke mbon oro ẹnịmde ukpepn̄kpọ emi ẹkpenam n̄kpọ ye mme anamutom do ye iman n̄kani owo?
11 Edi akpan n̄kpọ n̄ko ndinam n̄kpọ ukpono ukpono nnyụn̄ mfọn ido ye mme anamutom do ye iman n̄kani owo ye mbon n̄kpọnnam. Ndondo oro ẹtọn̄ọde ndinịm ukpepn̄kpọ do, idifọnke ẹkpụhọ ini oro ẹsinịmde m̀mê nte ẹsinịmde edieke owo mîbemke iso inam etubom itie oro ọfiọk. Bụp etubom itie oro ndien ndien m̀mê enye ese didie se ẹsikpepde. Ke ini iman n̄kani owo ẹdide ndise mmọ, yom ini sobo nyụn̄ nyene nneme ye mmọ. Nam mmọ ẹfiọk ntak emi mbufo ẹnịmde ukpepn̄kpọ Bible emi. Nam mmọ ẹfiọk ke ẹmenen̄ede ẹma iman mmọ. Dọhọ mmọ ẹtiene ẹdu ke ini ukpepn̄kpọ emi.
12, 13. Tịn̄ nti utịp oro inyenede ke ndinọ ikọ ntiense ke mme ufọk oro ẹsisede ẹban̄a n̄kani owo.
12 Nti Utịp: Mme esenyịn oro ẹsan̄ade-san̄a ye mme esop ẹsitịn̄ nti utịp utom emi. Ke itie kiet, n̄kpọ nte owo 20 ẹkedụk ukpepn̄kpọ emi. Ndien ẹma ẹnịm ukpepn̄kpọ Bible ye owo itiokiet. Owo kiet ke otu mmọ ama ana baptism nte ini akakade. Ke itie efen, ukpepn̄kpọ oro ẹkenịmde ye mma kiet emi ekedide isua 85 ama anam enye esika okodụk mbono esop onyụn̄ oyom ndina baptism. Ke ini ufọk kiet ẹkeyomde nditre ndusụk n̄kpọ oro ẹkesinamde—esịnede ukpepn̄kpọ Bible otu oro Mme Ntiense Jehovah ẹsinịmde—n̄kani owo emi ẹkedụn̄de do ikamaha; mmọ ẹma ẹka ẹketịn̄ ẹnọ etubom itie oro! Nte ini akakade, ẹma ẹfiak ẹtọn̄ọ ukpepn̄kpọ emi, ndien owo 25 esịm 30 ẹkedụk.
13 ldịghe n̄kani owo ye mbon n̄kpọnnam kpọt ẹsikụt ima oro nnyịn inyenede. Ke uwụtn̄kpọ, mme anamutom do ẹsidụk ẹnyụn̄ ẹtiene ẹbuana ke ukpepn̄kpọ oro isinịmde. Mbio obio n̄ko ẹsikụt ukeme oro nnyịn isịnde ndin̄wam n̄kani owo ye mbon n̄kpọnnam. (1 Pet. 2:12) Ke ima iketịn̄ uduak ukpepn̄kpọ nnyịn inọ etubom itie kiet oro ẹsisede ẹban̄a n̄kani owo, enye ama ọdọhọ ete: “Ntak emi mbufo mîkedịghe tọn̄ọ ko? Ini ewe ke ẹditọn̄ọ?” Etubom itie efen ama ewet ete: “N̄kpama ndidọhọ mme andinyene utọ itie emi ẹtọn̄ọ ukpepn̄kpọ Bible otu emi. Mme Ntiense Jehovah ẹnam utom emi nte ubak utom ukwọrọikọ mmọ.” Mme andinyene ufọk kiet oro ẹsisede ẹban̄a n̄kani owo ke Hawaii ẹma ẹnọ Mme Ntiense enọ ke utom unyịmesịt mmọ ẹnyụn̄ ẹdọho ke mmọ ‘ẹma ẹnen̄ede ẹn̄wam’ mbonufọk oro.
14. Ntak emi ikpan̄wamde mbon oro ẹdude ke ufọk oro ẹsisede ẹban̄a n̄kani owo?
14 Jehovah ọdọhọ n̄kani owo ẹtoro imọ. (Ps. 148:12, 13) Emi esine n̄ko mbon oro ẹdude ke mme itie oro ẹsisede ẹban̄a n̄kani owo ye mbon n̄kpọnnam. Ndi utọ itie emi ẹdu ke efakutom mbufo emi n̄kani owo ẹkemede nditiene n̄kop eti mbụk? Ke ini mbiowo ye mme etubom ufọk oro ẹsisede ẹban̄a n̄kani owo ẹn̄wamde nnyịn, iyekeme ndinọ mbonufọk emi ikọ ntiense. Ke ini itide n̄kani owo ntem, nnyịn ikpebe Jehovah.—Ps. 71:9, 18.