Ntie Didie ke Enyịn Jehovah?
1. Ntak ẹdọhọde ke Bible etie nte ukụtiso?
1 Ikafan̄ ke afo esise iso ke ukụtiso? Ata ediwak nnyịn isinam oro kpukpru usen man ise m̀mê enyene n̄kpọ oro oyomde inen̄ede. Ẹda Bible ẹdomo ye ukụtiso. Ndikot Bible esin̄wam nnyịn ifiọk se idude nnyịn ke esịt, kpa se Jehovah esisede. (1 Sam. 16:7; Jas. 1:22-24) Ikọ Abasi ekeme “ndifiọk mme uduak ye ekikere esịt owo.” (Heb. 4:12) Didie ke ndikot nnyụn̄ ntie n̄kere se ikotde ke Bible kpukpru usen ekeme ndin̄wam nnyịn ikụt mme n̄kpọ oro oyomde inen̄ede man ikeme ndidi nti mme ọkwọrọ ikọ?—Ps. 1:1-3.
2. Didie ke Bible ekeme ndin̄wam nnyịn idụn̄ọde idem nnyịn?
2 Kama Bible Nte Ukụtiso: Mbụk Bible oro ẹban̄ade mme asan̄autom Jehovah ẹnam nnyịn ifiọk mme edu oro Jehovah amade. Ke uwụtn̄kpọ, David ama enyene ifịk aban̄a enyịn̄ Abasi. (1 Sam. 17:45, 46) Isaiah ama enyene uko onyụn̄ enyịme ndikwọrọ ikọ ke efakutom oro mme owo mîkamaha ndikop uyo Abasi. (Isa. 6:8, 9) Akwa ima oro Jesus akamade Ete esie eke heaven akanam enye ada ukwọrọikọ nte utom oro ọnọde owo inemesịt utu ke ndida enye nte mbiomo. (John 4:34) Mme Christian eyo mme apostle ẹma ẹsịn ifịk ẹkwọrọ ikọ, ẹberi edem ke Jehovah, ẹnyụn̄ ẹbiere ke mmimọ idikpaha mba. (Utom 5:41, 42; 2 Cor. 4:1; 2 Tim. 4:17) Nditie n̄kere mme utọ uwụtn̄kpọ emi ayan̄wam nnyịn ifiak idụn̄ọde idem nnyịn man ifiọk ebiet oro oyomde itịm inam edisana utom Abasi.
3. Ntak emi ikpọsọpde-sọp inam mme ukpụhọde oro oyomde?
3 Nen̄ede Se Ikwan̄ade: Ufọn idụhe ndise idem nnyịn ke ukụtiso, ekem idaha inyụn̄ inamke n̄kpọ ndomokiet iban̄a se ikụtde. Imekeme ndiben̄e Jehovah ite anam nnyịn ifiọk nte nnyịn itiede onyụn̄ an̄wam nnyịn inam mme ukpụhọde. (Ps. 139:23, 24; Luke 11:13) Sia ini oro osụhọde mîniọn̄ke aba, owo onyụn̄ ekemede nditaba uwem, nnyịn ikpenyene ndisọsọp nnam mme ukpụhọde oro oyomde.—1 Cor. 7:29; 1 Tim. 4:16.
4. Nso iditịbe edieke owo etịn̄de enyịn okot Ikọ Abasi, onyụn̄ anamde n̄kpọ aban̄a se enye okụtde?
4 Nte owo etiede ke esịtidem—kpa se Jehovah esisede enen̄ede edi akpan n̄kpọ akan se ẹkụtde ke enyịn. (1 Pet. 3:3, 4) Nso iditịbe edieke owo etịn̄de enyịn okot Ikọ Abasi, onyụn̄ anamde n̄kpọ aban̄a se enye okụtde? Utọ owo oro ‘ididịghe andikokop eke efrede, edi edidi andinanam, ndien enye oyokop inemesịt ke ndinam emi.’ (Jas. 1:25) Ke akpanikọ, iyokop inemesịt inyụn̄ idi nti mme ọkwọrọ ikọ oro ‘iwụtde mbiet ubọn̄ Jehovah nte ukụtiso.’—2 Cor. 3:18.