Ẹtan̄a Obio Ubọn̄ ke Isua Ikie Idahaemi!
1. Nso ke ẹkedọhọ ikọt Jehovah ẹnam ke se ikperede isua ikie idahaemi?
1 “Sese, Edidem ada ubọn̄! Mbufo ẹdi mme ọnọ-ntọt esie. Mmọdo ẹtan̄a, ẹtan̄a, ẹtan̄a, Edidem ye obio ubọn̄ esie.” Ikọ oro Brọda Rutherford eketịn̄de ke se ikperede isua ikie idahaemi ama anam ikọt Jehovah ẹtan̄a etop Obio Ubọn̄ ke kpukpru ebiet. Se nnyịn inyụn̄ inamde edi oro n̄ko! Ukem nte mme Christian eyo mme apostle, nnyịn imọkwọrọ eti mbụk Obio Ubọn̄ inọ “kpukpru edibotn̄kpọ ke idak ikpaenyọn̄.” (Col. 1:23) Nso ye nso ke inam ke isua ikie emi ẹbede man itan̄a Obio Ubọn̄ Abasi? Didie ke ikeme ndika iso ntan̄a enye sia iyomde ndisịm isua 100 tọn̄ọ nte Obio Ubọn̄ ọkọtọn̄ọ ndikara?
2. Didie ke mme n̄wed nnyịn ẹsịn udọn̄ ẹnọ nnyịn nditan̄a Obio Ubọn̄ Abasi?
2 Se Ikanamde: Ke ediwak isua emi ẹbede, mme n̄wed nnyịn ẹn̄wam ndinam ẹfiọk Obio Ubọn̄ Abasi. Ọtọn̄ọde ke 1939, akpan magazine emi idade itan̄a etop emi ekere Enyọn̄-Ukpeme Ọnọ Ntọt Obio Ubọn̄ Jehovah. Magazine emi esiwak nditịn̄ mban̄a Obio Ubọn̄ ye se Obio Ubọn̄ edinamde. Ẹdemede! n̄ko esitịn̄ aban̄a Obio Ubọn̄ Abasi onyụn̄ owụt ke enye edi n̄kukụre idotenyịn emi ubonowo ẹnyenede. Magazine mbiba emi ke ẹkabade ẹnyụn̄ ẹsuan ẹkan ke ofụri ererimbot!—Edi. 14:6.
3. Nso idi ndusụk usụn̄ oro idade itan̄a Obio Ubọn̄?
3 Ikọt Jehovah ẹda nsio nsio usụn̄ ẹtan̄a Obio Ubọn̄. Ke eset ko, ikesida moto emi ẹsidade ẹsuan etop, ekebe ukopikọ, ye ukwak ubre usanikwọ ikwọrọ ikọ. Mmọ ẹma ẹsin̄wam nnyịn isuan eti mbụk inọ ata ediwak owo ke ini mme anditan̄a Obio Ubọn̄ mîkawakke kan̄a. (Ps. 19:4) Ke mme isua ndondo emi, nnyịn imewet ediwak n̄kpọ idọn̄ ke ikpehe Intanet jw.org man ida itan̄a Obio Ubọn̄ inọ ediwak miliọn owo, esịnede mbon oro ẹdụn̄de ke mme idụt oro ẹkpande utom nnyịn.
4. San̄asan̄a usụn̄ ukwọrọikọ ewe ke inam?
4 Ikọt Jehovah ẹnam n̄ko san̄asan̄a usụn̄ unọ ikọ ntiense ke an̄wan̄wa ebiet man ẹkeme ndisuan etop Obio Ubọn̄. Ke uwụtn̄kpọ, ọtọn̄ọde ke ufọt ufọt iduọk isua 1990, nnyịn ima isịn ukeme inam an̄wan̄wa unọ ikọ ntiense idian ye utom ukwọrọikọ eke ufọk ke ufọk. Ikesinam emi ke mme itie unọ idem nduọkodudu, mme itie ubon moto, itiembehe ubomisọn̄ ye ke mme itie mbubehe. Ndondo emi, imọtọn̄ọ ndinam san̄asan̄a usụn̄ unọ ikọ ntiense ke ebiet emi mme owo ẹwakde ke mme ikpọ obio ke ofụri ererimbot. Ke adianade do, ediwak esop ke ẹnam an̄wan̄wa unọ ikọ ntiense ke ndibon mme n̄wed ke okpokoro ye ke mme ukpatn̄kpọ ke ebiet emi ediwak owo ẹsisan̄ade ẹbe ke efakutom mmọ. Kpa ye emi, utom ukwọrọikọ eke ufọk ke ufọk osụk edi akpan usụn̄ emi idade ikwọrọ Obio Ubọn̄ Abasi.—Utom 20:20.
5. Nso ke ediwak owo ke otu nnyịn ẹdima ndinam ke obufa isua utom emi?
5 Se Iyomde Ndinam: Ediwak owo ẹyetọn̄ọ utom usiakusụn̄ ofụri ini ima itọn̄ọ obufa isua utom ke September. Ndi ayama nditiene mmọ nsiak usụn̄? Edieke mûdukemeke, ndi eyesinam utom usiakusụn̄ unọ un̄wam ndien ndien? Edide emekeme ndisiak usụn̄ m̀mê ukemeke, fiọk ete ke Jehovah eyenen̄ede ọdiọn̄ fi ke ndisịn ifịk man etiene atan̄a Obio Ubọn̄ Abasi ọyọhọ ọyọhọ.—Mal. 3:10.
6. Ntak emi ọfiọn̄ October 2014 edidide san̄asan̄a ọfiọn̄?
6 Ọfiọn̄ October 2014 ke ukara Obio Ubọn̄ ediyọhọ isua 100. Ndien Enyọn̄-Ukpeme nsiondi ofụri owo eke ọfiọn̄ oro edineme n̄kpọ iban̄a Obio Ubọn̄ Abasi. Ntak emi mûsịnke ukeme ndida nsiondi Enyọn̄-Ukpeme emi nsọk adan̄a ediwak owo nte ekekeme? Nte isụk ibetde mme edidiọn̄ ini iso, ẹyak nnyịn owo kiet kiet ika iso ‘itan̄a eti mbụk oro aban̄ade Obio Ubọn̄ Abasi’ inọ kpukpru owo oro ẹdimade ndikop etop nnyịn.—Utom 8:12.