Se Idin̄wamde Nnyịn Idi Nti Mme Ọkwọrọikọ—Nte Ikpọbọrọde Owo Emi Ayatde Esịt

Ntak Emi Edide Akpan N̄kpọ: Ediwak mbon emi isikwọrọde ikọ inọ ẹsima nnyịn. Edi Jesus ama ọdọhọ ke ndusụk owo ẹyesua nnyịn. (John 17:14) Ntem, ikpanaha idem akpa nnyịn edieke owo ayatde esịt ke ini iyomde ndikwọrọ ikọ nnọ enye. Edieke emi etịbede, oyom itịn̄ se idinemde Jehovah esịt. (Rome 12:17-21; 1 Pet. 3:15) Oro idiyakke itọhọ ye owo, edi ayanam owo oro ye mbon emi ẹdude do ẹkụt ke nnyịn idi nditọ emem, onyụn̄ anam mmọ ẹma ndikpan̄ utọn̄ nnọ nnyịn ini efen.—2 Cor. 6:3.

Nte Ikpanamde:

Nam n̄kpọ sụn̄sụn̄ nyụn̄ tie ufan ufan. Emi ayanam owo oro ayatde esịt osụhọde esịt. Edieke enyeneufọk ayatde esịt, kûda nte usọn̄enyịn. (Eccl. 7:9) Ekeme ndidi enyene se ifịnade enye mîdịghe edi ke ika ke ini emi mîfọnke ye enye. Idem ekpedi enye isimaha ukwọrọikọ nnyịn, ti ke anaedi ẹma ẹbian̄a enye.—2 Cor. 4:4.
Bọrọ enye ikọ sụn̄sụn̄, kûbọrọ uyat uyat. (N̄ke 15:1) Ekeme ndidi emedemede enye ke idap m̀mê esịbe nneme esie. Kûdọhọ owo okûyat esịt ke ntak emi edide ndikwọrọ ikọ, edi emekeme ndidọhọ enye okûyat esịt ke ndidi ke ini oro. Edieke edide se enye okopde aban̄a nnyịn anam enye ayat esịt, emekeme ndidọhọ: “Mmọfiọk ke oro ekeme ndiyat owo. Edi etie nte se okopde oro idịghe ntre. Ndi akpama ndifiọk ntak?” Ndi enye ayat esịt ke ntak emi isiode owo ke esop m̀mê ayat ke nte inamde n̄kpọ ye owo oro ẹsiode ẹfep? Okûdi enye ayat ke ntak emi nnyịn mîsinyịmeke ẹsịn nnyịn iyịp? Edieke edide ekededi ke otu emi ayat enye, emekeme ndidọhọ: “Mmokụt ke n̄kpọ oro enen̄ede ayat fi. Mbon en̄wen ẹsiyat esịt n̄ko. Edi, ndi akpama n̄wụt fi ke Bible ntak emi isinam oro?”
Edieke owo enen̄erede ayat esịt, ọfọn odop uyo adaha. Edieke enye ọdọhọde Mme Ntiense Jehovah ẹkûwaha ufọk imọ aba, emekeme ndidọhọ ke nnyịn idiwahake.

Nam Emi Ọfiọn̄ Emi:

Ẹnam se inemede emi ẹse ke ini utuakibuot ubon mbufo.
Ke ini ọkpọn̄de owo emi ayatde esịt, neme ye owo emi asan̄ade kiet, eti usụn̄ en̄wen emi ẹkpebọrọde utọ owo oro ikọ.