Ka Iso Kpep Ndikwọrọ Ikọ Ọfọn
1. Nso iwụt ke oyom ika iso ikpep ndikwọrọ ikọ ọfọn?
1 Oyom mme Christian ẹka iso ẹkpep ndikwọrọ ikọ ọfọn. Emi akanam Jesus esikpep mbet esie nte ẹkpekwọrọde ikọ. (Luke 9:1-5; 10:1-11) Emi n̄ko akanam Aquila ye Priscilla ẹda Apollos ẹdian idem ẹnyụn̄ “ẹnam usụn̄ Abasi an̄wan̄a enye ata nnennen nnennen.” (Utom 18:24-26) Emi okonyụn̄ anam Paul ọdọhọ Timothy emi ekenen̄erede ọdiọn̄ọ ndikwọrọ ikọ ete aka iso esịn idem ekpep mme owo n̄kpọ “man kpukpru owo ẹkpekụt” n̄kọri esie. (1 Tim. 4:13-15) Inamke n̄kpọ m̀mê ebịghi didie ikọtọn̄ọ ndidụk ufụn nnọ Ọbọn̄ ke ndikwọrọ eti mbụk, oyom ika iso ikpep ndikwọrọ ikọ enen̄ede ọfọn.
2. Nso ke ikpanam man ikpep n̄kpọ ito mbon en̄wen?
2 Se Nte Mbon En̄wen Ẹsikwọrọde Ikọ: N̄kpọ kiet emi edinamde ikwọrọ ikọ ọfọn edi ndise nte mbon en̄wen ẹsikwọrọde ikọ. (N̄ke 27:17) Kpan̄ utọn̄ ke ini owo emi asan̄ade kiet ọkwọrọde ikọ. Dọhọ mbon emi ẹsikwọrọde ikọ ọfọn ẹteme fi nte ekemede ndinam n̄kpọ emi esisọn̄de fi ke ini ọkwọrọde ikọ, nyụn̄ kpan̄ utọn̄ nọ mmọ. (N̄ke 1:5) Ndi esisọn̄ fi ndika mbịne owo emi ọkọkwọrọde ikọ ọnọ, nditọn̄ọ ukpepn̄kpọ Bible ye owo, m̀mê ndinam n̄kpọ en̄wen emi ẹsinamde ke ini ẹkwọrọde ikọ? Dọhọ esenyịn otu an̄wautom mbufo m̀mê asuanetop en̄wen emi enyenede ifiọk eteme fi se akpanamde. Ti ke spirit Jehovah n̄ko ekeme ndin̄wam fi. Ntre, ben̄e Abasi kpukpru ini ete ọnọ fi spirit esie.—Luke 11:13.
3. Nso ke ikpanam edieke owo etemede nnyịn se ikpanamde idem ke ini nnyịn mîbụpke enye?
3 Kûyat esịt edieke owo etemede fi se akpanamde idem ke ini mûbụpke enye. (Eccl. 7:9) Ukem nte Apollos, sụhọde idem bọ item nyụn̄ kọm owo oro. Emi ediwụt ke emenyene ọniọn̄.—N̄ke 12:15.
4. Jesus ọkọdọhọ ke nso idi akpan ntak emi nnyịn ikpakade iso ikpep ndikwọrọ ikọ ọfọn?
4 Edieke Inamde Ọfọn Iyọnọ Abasi Ubọn̄: Jesus ama ọnọ uwụtn̄kpọ emi akanamde mbet esie ẹfiọk ke oyom mmimọ ika iso ikpep ndikwọrọ ikọ ọfọn. Enye ọkọdọhọ ke imọ idi vine, ndien ke mme mbet imọ emi ẹyetde aran ẹdi n̄kọk vine. Enye ama ọdọhọ ke Ete imọ esidiọn̄ n̄kọk emi ẹn̄wụmde mfri “man mmọ ẹkpen̄wụm ediwak mfri.” (John 15:2) Ukem nte owo emi enyenede in̄wan̄ vine esiyomde vine esie on̄wụm ediwak mfri, Jehovah oyom nnyịn inen̄ede ikwọrọ ikọ ọfọn. (Heb. 13:15) Nso ufọn ke nnyịn ndika iso n̄kpep ndikwọrọ ikọ ọfọn edinyene? Jesus ama ọbọrọ mbụme oro. Enye ọkọdọhọ ete: “Ete mi ọbọ ubọn̄ ke emi, nte mbufo ẹkade iso ẹn̄wụm ekese mfri.”—John 15:8.