Nso ke Ikeme Ndikpep Nto Mbufa Ikwọ Nnyịn?

Ewe ke otu mbufa ikwọ nnyịn ke afo ama akan? Ntak emi amade mmọ? Ndi emesikụt se isitịbede ke usen ke usen ke ini esede mme vidio ikwọ emi? Sia mme ikwọ emi ẹban̄ade nsio nsio n̄kpọ, ẹnyụn̄ ẹkwọde mmọ ke nsio nsio usụn̄, idụhe-du nte owo mîdimaha ndusụk mmọ. Edi idịghe ndibre n̄kop inem kpọt anam ẹsio mbufa ikwọ ye mme vidio ikwọ nnyịn.

Enyene mme akpan n̄kpọ emi obufa ikwọ kiet kiet ekpepde nnyịn aban̄a uwem ye utom nnyịn mme Christian. Ndusụk ikwọ emi ẹban̄a nditat ubọk, ndidiana kiet, ndidi eti ufan, ndinyene uko, ndima mme owo, m̀mê ndinyene mbuọtidem. Ndusụk ẹban̄a ndifiak ntiene Jehovah, ndifen nnọ owo, ndinam akpanikọ ke usen ke usen, m̀mê ndisịn idem nnam n̄kpọ Abasi. Imakam inyene obufa ikwọ emi owụtde ke ifọnke iyak fon adia nnyịn idem. Ndi enyene mme akpan n̄kpọ en̄wen emi mbufa ikwọ emi ẹkpepde fi?

ẸSE OBUFA IKWỌ ORO PARADISE EDISESỊM, EKEM ẸBỌRỌ MME MBỤME EMI:

• Ewe un̄wọn̄ọ Abasi ke ebe ye n̄wan oro ẹma ẹkesọn̄ do ẹtie ẹkere? ​—Ge 12:3

• Nso ke ikpanam man inen̄ede inịm ke mme un̄wọn̄ọ Jehovah ẹyesu?

• Mmanie ke idifiak ikụt ke mîbịghike?

• Didie ke ndidori enyịn ke Obio Ubọn̄ Abasi anam ikeme ndiyọ se iwọrọde nnyịn idahaemi?—Ro 8:25