Nte Akpadade “Se Ekemede Nditịn̄” Eneme Ikọ Abasi

Ebịghi “Se Ekemede Nditịn̄” ọkọtọn̄ọ ndisidu ke akpa page N̄wed Mbono Esop Uwem ye Utom Nnyịn Mme Christian. Didie ke ikeme ndida enye nneme Ikọ Abasi?

Ke Ini Anamde Nnamn̄wụt ke Mbono Esop: Bụp mbụme emi odude ke “Se Ekemede Nditịn̄,” kot itie N̄wed Abasi emi odude do, nyụn̄ tịn̄ se ẹdinemede ini en̄wen. Edi oro iwọrọke ke ana etịn̄ ata ukem ukem se ẹtịn̄de ke vidio “Se Ekemede Nditịn̄.” Emekeme nditọn̄ọ nneme ke usụn̄ en̄wen mîdịghe ọkwọrọ aban̄a n̄kpọ en̄wen. Emekeme n̄ko ndinọ owo kiet ke otu n̄wed oro ẹdude ke Mme Akpan N̄kpọ Isidade Ikpep Owo Bible, ekpededi N̄wed Mbono Esop idọhọke ọnọ owo n̄wed.

Ke Ini Ọkwọrọde Ikọ: Esop Abasi ẹwet “Se Ekemede Nditịn̄” man an̄wam fi ekeme ndikwọrọ ikọ ọfọn. Edieke owo amade ukwọrọikọ nnyịn onyụn̄ oyomde ndifiọk n̄kpọ en̄wen, emekeme ndida se ẹwetde ke mfiakn̄ka aka iso ke nneme ye owo oro. Emekeme ndikpụhọ n̄kpọ ke “Se Ekemede Nditịn̄” mîdịghe eneme aban̄a n̄kpọ en̄wen. Emekeme n̄ko ndisio n̄kpọ ke “Se Ekemede Nditịn̄” ọfiọn̄ emi ekebede eneme, mîdịghe etịn̄ aban̄a itie N̄wed Abasi en̄wen emi afo ekerede ke ediwak owo ke efakutom mbufo ẹyema. Omonyụn̄ ekeme ndida n̄kpọ emi etịbede ndondo emi ke efakutom mbufo ntọn̄ọ nneme, edieke mme owo ẹdimade. Inamke n̄kpọ m̀mê ewe ke emek ndinam, kụt ete ke ‘amanam kpukpru n̄kpọ kaban̄a eti mbụk, man akpabuana enye ye mbon en̄wen.’—1Co 9:22, 23.