IBUOTIKỌ MAGAZINE EMI
Nam Nti N̄kpọ Emehe Fi
IDAP osụk ananam Austin ke ini n̄kanika esie amiade. Edi enye ọsọsọp adaha ada ke bed, esịne ọfọn̄ itọk esie adaha itọk. Se enye esinamde edi emi ikata ke urua ke ufan̄ isua kiet emi ebede.
Laurie osụk ọtọhọ ye ebe esie ama idahaoro. Enye adaha ke iyatesịt ekemen iko swid editie osion̄o kiet kiet adia, nte enye esinyụn̄ anamde kpukpru ini emi esịt ayatde enye.
Austin ye Laurie ẹnam n̄kpọ emi kpukpru ini tutu enye emehe mmọ. Ndusụk ini, mmọ isitiehe-tie ikere mbemiso ẹnamde n̄kpọ emi.
Nso kaban̄a fi? Ndi enyene nti n̄kpọ emi afo esinamde, emi okpoyomde emehe fi? Ekeme ndidi aduak ndisisịn̄ede idem kpukpru ini, ndisibak ndụk idap, m̀mê ndisikot mbonubon mbufo ke ubọk ke ubọk.
Ekeme n̄ko ndidi enyene ndusụk n̄kpọ oro esinamde, emi oyomde nditre, utọ nte ndin̄wọn̄ sika, ndidia udia emi mînọhọ owo n̄kpọ ke idem, m̀mê ndibiat ini n̄kaha ke Intanet.
Imọdiọn̄ọ ke imemke nditre n̄kpọ emi mîfọnke, edieke edide n̄kpọ oro ememehe nnyịn. Ndusụk owo ẹdọhọ ke ndinam n̄kpọ emi mîfọnke etie nte idap edịm—esinem ndidụk bed nna edi imemke ndidaha nda.
Ntre, nso ke akpanam man nti n̄kpọ emehe fi? Nso idinyụn̄ in̄wam fi etre mme n̄kpọ emi ọdiọn̄ọde ke ifọnke ye afo? Ẹyak ineme n̄kpọ ifan̄ emi Bible etịn̄de.