Nso ke Bible Etịn̄ Aban̄a N̄kpọ Mme Demon?

EDIWAK owo inịmke ke mme demon ẹdu ẹnyụn̄ ẹnyene odudu. Ke ini mmọ ẹsede fim m̀mê ẹkotde n̄wed emi aban̄ade odudu mme demon, mmọ ẹsida emi nte nsu. Edi Bible ọdọhọ ke mme demon ẹdu, ke mmọ ẹsinyụn̄ ẹnọ mme owo odudu ndinam nsio nsio n̄kpọ. Ntak edi oro Deuteronomy 18:​10-13 ọdọhọde ete: “Kûyak ẹkụt owo ekededi ke otu fo . . . emi ebrede idiọn̄, m̀mê ebre mfọni m̀mê owo ekededi emi omụmde ndomo m̀mê abiaidiọn̄, m̀mê owo emi ọkọkde nduọhọ ọnọ owo m̀mê obụp ekpo m̀mê etịn̄ ini iso m̀mê owo ekededi emi akade okobụp mme akpan̄kpa n̄kpọ.” Ntak-a? Itien̄wed oro ọdọhọ ete: “Koro kpukpru owo eke ẹnamde n̄kpọ emi ẹdi mbubiam n̄kpọ ke enyịn Jehovah . . . Afo enyene ndinana ndudue ke enyịn Jehovah Abasi fo.”

Ntak emi Bible ọdọhọde nnyịn ikûnyene n̄kpọ ndomokiet ndinam ye mme demon?

NTE MME DEMON ẸKESAN̄ADE ẸDIDU

Bible ọdọhọ ke Abasi ama obot mme angel anyan ini mbemiso enye obotde isọn̄. (Job 38:​4, 7; Ediyarade 5:11) Abasi ama enyịme mme angel emi ẹmek se mmọ ẹyomde ndinam, edide eti m̀mê idiọk. Ndusụk mmọ ẹma ẹsọn̄ ibuot ye Abasi ẹnyụn̄ ẹkpọn̄ ebietidụn̄ mmọ ke heaven ẹsụhọde ẹdi isọn̄ ẹdisịn ntịme. Mmọ ẹma ẹnam ‘afai ọyọhọ ke isọn̄.’​—Genesis 6:​2-5, 11; Jude 6.

Bible ọdọhọ ke ndiọi angel oro ẹtụn ata ediwak owo usụn̄. (Ediyarade 12:9) Mmọ ẹdiọn̄ọ ke mme owo ẹsiyom ndifiọk se iditịbede ke ini iso, ntre mmọ ẹsida oro ẹtap mme owo.​—1 Samuel 28:​5, 7; 1 Timothy 4:1.

Ekeme nditie nte ke ẹsida odudu mme demon ẹn̄wam mme owo ndusụk ini. (2 Corinth 11:14) Edi mme demon ẹsikam ẹdomo ndinam mme owo ẹkûfiọk se Bible ekpepde aban̄a Abasi.​—2 Corinth 4:4.

Ntem, Bible owụt ke ifọnke owo enyene n̄kpọ ndinam ye mme demon. Ntak edi oro mbon oro ẹkeyomde ndikabade ndi mbet Jesus ẹkefọpde n̄wed idiọn̄ mmọ ke ini mmọ ẹkedide ẹdifiọk se Bible etịn̄de aban̄a n̄kpọ mme demon. Mmọ ẹma ẹfọp kpukpru n̄wed idiọn̄ mmọ kpa ye oro akakpade mmọ ata ediwak okụk.​—Utom 19:19.

Kpasụk ntre, ediwak owo mfịn ẹbiere ke mmimọ idinyeneke n̄kpọ ndomokiet ndinam ye mme demon. Ntre, mmọ isisehe fim inyụn̄ ikotke n̄wed ekededi emi aban̄ade n̄kpọ mme demon. Ke uwụtn̄kpọ, ke ini Mariaa ekedide isua 12, enye ama esitịn̄ se iditịbede ke ini iso. Enye ama esikama kad utịn̄ ini iso etịn̄ se iditịbede ọnọ nditọ ufọkn̄wed mmọ. Ndien sia ndusụk se enye eketịn̄de ẹkesitịbede, enye ama enen̄ede esịn idem ke n̄kpọ mme demon.

Maria ekekere ke Abasi anam imọ ikeme ndisitịn̄ ini iso man in̄wam mme owo. Edi enye ọdọhọ ete: “Enyene se ikafịnade mi. N̄kesikama kad utịn̄ ini iso ntịn̄ se iditịbede inọ mbon en̄wen. Edi n̄kekemeke nditịn̄ se iditịbede inọ mi, kpa ye oro n̄koyomde ndifiọk nte ini iso mi editiede.”

Sia Maria ekenyenede ediwak mbụme emi akafịnade enye, enye ama ọbọn̄ akam ọnọ Abasi. Ekem Mme Ntiense Jehovah ẹma ẹditọn̄ọ ndikpep Bible ye enye. Se Maria ekekpepde ke Bible ama anam enye ọfiọk ke idịghe Abasi akanam imọ ikeme ndisitịn̄ ini iso. Enye ama onyụn̄ ekpep ke ana owo ekededi emi oyomde ndidi ufan Abasi ọduọn̄ọ kpukpru n̄kpọ emi aban̄ade mme demon. (1 Corinth 10:21) Ntre enye ama ọduọn̄ọ kpukpru n̄kpọ emi enye ekesikamade etịn̄ ini iso. Idahaemi, enye esikpep mbon en̄wen se enye ekekpepde ke Bible.

Ke ini Michael ekedide eyenọwọn̄, enye ama esinen̄ede ama ndikot mme n̄wed emi ẹban̄ade ndyọ ndyọ n̄kpọ emi mbon oro ẹnyenede ndedịbe odudu ẹnamde. Enye ọdọhọ ete: “Mma nsinen̄ede mma ndikot nte ubọkn̄ka mi ke fim ẹnamde n̄kpọ emi ata owo mîkemeke ndinam.” Nte ini akade, n̄kukụre n̄wed emi ekesinemde Michael ndikot ekedi n̄wed emi aban̄ade ibọk ye n̄kpọ mme demon. Enye ọdọhọ ete: “Ama esinen̄ede ọdọn̄ mi ndifiọk n̄kpọ mban̄a mme demon, ntre mma nsikot n̄wed nnyụn̄ nse fim emi aban̄ade odudu mme demon.”

Edi se Michael ekekpepde ke Bible ama anam enye afiak ese utọ n̄wed emi enye ekesikotde. Enye ọdọhọ ete: “Mma ntie nsat kpukpru n̄kpọ emi ẹnyenede n̄kpọ ndinam ye mme demon nnyụn̄ ntop mmọ nduọn̄ọ. Mma n̄kpep ata akpan n̄kpọ ke 1 Corinth 10:31. Itien̄wed oro ọdọhọ inam kpukpru n̄kpọ inọ Abasi ubọn̄. Mbemiso n̄kotde n̄wed ekededi idahaemi, mmesibụp idemmi nte, ‘Ndi n̄wed emi nyomde ndikot mi ọyọnọ Abasi ubọn̄?’ Nsikotke edieke mîdinọhọ Abasi ubọn̄.”

Ikọ Abasi etie nte utuenikan̄. Enye anam nnyịn idiọn̄ọ ke mme demon ẹsinọ owo ndedịbe odudu. (Psalm 119:105) Edi enyene n̄kpọ en̄wen emi Bible anamde ifiọk. Enye ọdọhọ ke ibịghike, Satan ye mme demon ididụhe aba. Kere nte uwem edinemde ini oro! Psalm 37:​10, 11 ọdọhọ ete: “Ayak esisịt, idiọkowo ididụhe aba; afo oyonyụn̄ etịn̄ enyịn ke ebiet esie, ndien enye ididụhe. Edi mbon nsụkidem ẹyeda isọn̄ ẹnyene, ediwak emem oyonyụn̄ adat mmọ esịt.”