Didie ke Fon Ekeme Ndibiat Nditọ Fo?

Edi ndusụk owo ẹdọhọ ke nditọwọn̄ emi ẹsidụn̄de-dụn̄ ke Intanet . . .

• isikemeke nditie mîkwe fon.

• ẹsida Intanet ẹfiomo mbon en̄wen.

• ẹsinyụn̄ ẹkụt oburobụt ndise, ọkpọkọm mmọ ikohokoi iyom.

SE AKPANADE ỌDIỌN̄Ọ

N̄KPỌ NDIMEHE OWO

Ndusụk n̄kpọ emi ẹsinamde ke fon m̀mê kọmputa, utọ nte ndibre game, esinen̄ede adia owo ini. N̄wed kiet ọdọhọ ke ntak edide ntre edi ke ẹnam mme n̄kpọ oro ke usụn̄ emi edide owo ama esịn ubọk ikemeke nditre. Ndien mbon emi ẹsidade Intanet ẹsuan etop n̄kpọurua ẹsinam okụk ke ini mme owo ẹsede se mmọ ẹkedọn̄de ke Intanet.

KERE ISE: Ndi nditọ fo ẹsidi mîkwe fon ikemeke nditie? Didie ke ekeme ndin̄wam mmọ ẹdiọn̄ọ se ẹkpedade ini mmọ ẹnam?—EPHESUS 5:15, 16.

MFIOMO

Ndusụk owo isinyeneke ido ke ini mmọ ẹnamde n̄kpọ ke Intanet. Mmọ ẹsida Intanet ẹyom ikọ ẹnyụn̄ ẹfiomo owo.

Ndusụk owo ẹnen̄ede ẹyom ndiwọrọ etop, ntak edi oro mmọ ẹsinamde n̄kpọ ẹsio idem ẹnyan ke Intanet, m̀mê n̄kpọ oro ọfọn m̀mê ifọnke. N̄ko ke ini owo okụtde ke ẹma ẹnam n̄kpọ owo ikotke imọ, ke uwụtn̄kpọ, ẹka usọrọ owo ikotke enye, emi ekeme ndinam owo oro ekere ke ẹsasua imọ.

KERE ISE: Ndi nditọ fo ẹsinyene ido ke ini ẹnamde n̄kpọ ke Intanet? (Ephesus 4:31) Ndi esibiak mmọ ke ini mmọ ẹkụtde ke ẹma ẹnam n̄kpọ owo ikotke mmimọ?

OBUROBỤT NDISE

Oburobụt ndise ọyọyọhọ Intanet idahaemi. Kpa ye oro n̄kpọ odude emi ete ye eka ẹkemede ndisịn ke fon man ẹfiọk se nditọ mmọ ẹsede, ndusụk ini n̄kpọ emi isin̄wamke, ndien nditọ emi ẹsisụk ẹsese idiọk ndise.

Ke ndusụk idụt, ibet inyịmeke ẹnọ owo oburobụt etop m̀mê oburobụt ndise ke fon. Ke uwụtn̄kpọ, edieke eyenọwọn̄ ọnọde owo oburobụt etop m̀mê oburobụt ndise ke fon mîdịghe owo ọnọ enye, ẹkeme ndikot enye ikpe.

KERE ISE: Didie ke afo ekeme ndin̄wam nditọ fo ẹkûsuse oburobụt ndise, ẹkûnyụn̄ ẹda fon ẹnọ owo oburobụt ndise?—EPHESUS 5:3, 4.

SE AKPANAMDE

KPEP NDITỌ FO IDO

Okposụkedi emi nditọwọn̄ ẹnen̄erede ẹdiọn̄ọ ndikama fon nnam nsio nsio n̄kpọ, osụk oyoyom ẹn̄wam mmọ. N̄wed kiet ọdọhọ ke ndinọ eyenọwọn̄ fon ke ini owo mîkpepke enye nnennen n̄kpọ emi enye akpakamade fon anam etie nte ndiyak enye ọfrọ odụk inyan̄ ke ini enye mîdiọn̄ọke ewọk.

Mek mme n̄kpọ emi oyomde ndinam, mîdịghe wet okwo ke idak emi.

• Nyekpep eyen mi se owo akpanamde ye se owo mîkpanamke ke Intanet

• N̄n̄wam eyen mi ọdiọn̄ọ se akpanamde ke ini enye ekerede ke owo imaha imọ

• Nsịn n̄kpọ ke fon eyen mi, emi mîdiyakke enye esika idiọk itie ke Intanet

• Nsise fon eyen mi ke ubọk ke ubọk

• Ntịn̄ m̀mê eyen mi ekpesikama fon ebịghi didie ke usen

• Nyakke eyen mi enịm fon ke ubet esie tutu eyo esiere

• Nyakke eyen mi efịk fon ke ini idiade udia