EDI EYO ESIERE URUA N̄KPỌ ỌDỌK NSO KE IKPANAM?

Yụhọ ye Se Enyenede

Mbon oro ẹyụhọde ye se mmọ ẹnyenede ẹsida uwem nte mmọ ẹkụtde. N̄kpọ ama okpụhọde ke uwem mmọ, mmọ ẹsikpụhọde ẹtiene nte n̄kpọ etiede, ẹkpụhọde nte mmọ ẹdude uwem ẹnyụn̄ ẹnam se ubọk mmọ ekemede.

NTAK EDIDE AKPAN N̄KPỌ

Jessica Koehler, ata-ifiọk emi esikpepde n̄kpọ aban̄a nte mme owo ẹsinamde n̄kpọ, ọdọhọ ke mbon emi ẹsiyụhọde ye se mmọ ẹnyenede ẹsima ndida uwem nte mmọ ẹkụtde. Enye ọdọhọ n̄ko ke mmọ isinen̄ekede isịn mme owo enyịn. Imosụk ise nte mbon emi ẹsiyụhọde ye se mmọ ẹnyenede ẹsikopde inemesịt mîsinyụn̄ inen̄ekede itịmede esịt. Se idude edi ke ndusụk mbon emi ẹkopde inemesịt ẹkan edi mbon oro mînen̄ekede inyene n̄kpọ. Emi edi ata akpanikọ akpan akpan ye mbon oro se ibehede mmọ ikan edide mme n̄kpọ oro okụk mîkemeke ndidep, utọ nte inemesịt emi owo esikopde enye ama odu ye mbonubon esie ye mme ufan esie.

“Ke inyenede se idiade ye se isịnede ye itie udakibuot, nnyịn iyoyụhọ ye mme n̄kpọ emi.”—1 Timothy 6:8.

SE EKEMEDE NDINAM

Kûmen idem udomo ye owo. Edieke emende idemfo ye ekpri se enyenede okodomo ye owo en̄wen emi etiede nte enyene n̄kpọ onyụn̄ odude uwo-uwo uwem, oro ekeme ndinam okûnen̄ede uyụhọ aba ye se enyenede onyụn̄ ekeme ndinam ọtọn̄ọ ndisịn owo enyịn. N̄kpọ en̄wen edi ke se isikụtde oro isiwakke ndidi akpanikọ. Ndusụk mme owo emi ẹsitiede nte ke ẹnen̄ede ẹnyene n̄kpọ ẹdodụk ẹnyịne ke isọn. Nicole, emi odụn̄de ke Senegal, ọdọhọ ete: “Idịghe nnyenyene enyọn̄ ye isọn̄ n̄kop inemesịt. Edieke nyụhọde ye se nnyenede, mmekeme ndikop inemesịt idem ekpededi mbon en̄wen ẹnyene n̄kpọ ẹkan mi.”

Nam emi ise: Kûse mme advert m̀mê se mme owo ẹdọn̄de ke Intanet emi owụtde nte mmọ enyenede n̄kpọ m̀mê nte mmọ ẹdude uwo-uwo uwem.

“Idem ke ini owo enyenede n̄kpọ barasuene, uwem esie itoho ke mme n̄kpọ emi enye enyenede”—Luke 12:15.

Wụt ke amama se ẹnamde ẹnọ fi. Mbon emi ẹsiwụtde ke imama se ẹnamde ẹnọ mmimọ ẹsiwak ndiyụhọ ye se mmọ ẹnyenede ndien edieke ẹnamde n̄kpọ ẹnọ mmọ, mmọ isiwakke ndikere ke akpana ẹnam ẹkan oro ẹnọ mmimọ. Roberton, emi otode Haiti, ọdọhọ ete: “Mmesida ini n̄kere nsio nsio n̄kpọ oro mme owo ẹnamde ẹnọ mi ye ubon mi, ekem n̄kọm mmọ ke se mmọ ẹnamde oro ẹnọ mi. Mmonyụn̄ n̄kpep eyen mi emi edide isua itiaita ndisikọm owo ke kpukpru se ẹnọde enye.”

Nam emi ise: Nyene n̄wed emi afo ewetde se ẹnamde ẹnọ fi. Kpukpru usen, wet mme n̄kpọ mme n̄kpọ emi Abasi anamde ọnọ fi. Ekeme ndidi nte enye anamde idem ọsọn̄ fi, nte enye ọnọde fi ubon emi ẹdianade kiet, nte enye ọnọde fi nti ufan, m̀mê nte enye esinamde ọfiọn̄ ọwọrọ ọnọ un̄wana.

“Owo inemesịt adia usọrọ kpukpru ini.”—Mme N̄ke 15:15.

Ndusụk ini, kpukpru nnyịn isin̄wan̄wana ndiyụhọ ye se inyenede. Edi ofụri ukeme isisịnde do isitakke-tak! Edieke imekde ndiyụhọ ye se inyenede, ọwọrọ imemek ndikop inemesịt, kpa n̄kpọ en̄wen emi okụk mîkemeke ndidep.