Ibuot 17
Paradise Idatesịt Oro Odude Ọnọ Ofụri Ubonowo
1. (a) Didie ke anamidiọk oro akakpade ke n̄kan̄ Jesus ọkọtọn̄ọ ndiwụt mbuọtidem? (b) Nso idotenyịn ke Jesus ọkọnọ anamidiọk oro, ọsọn̄ọde owụt ewe edu Abasi? (2 Corinth 1:3, 4)
NTE ekemde ye mbụk Luke, akpatre nneme Jesus mbemiso enye akpade ekedi ye anamidiọk oro ẹkebọpde ẹdian ke eto ke n̄kan̄ esie. Anamidiọk emi ama akam asua ọnọ nsan̄a inọ esie ke ntak okosụn̄ide Jesus. Nte an̄wan̄ade enye ama ọtọn̄ọ ndibuọt idem ye Jesus.
“Enye onyụn̄ ọdọhọ ete, ‘Jesus, ti mi ke adan̄aemi afo osịmde ke obio ubọn̄ fo.’ Ndien [Jesus] ọbọrọ enye ete: ‘Ke akpanikọ ke ndọhọ fi mfịn emi, Afo eyedu ye ami ke Paradise.’” (Luke 23:39-43, NW)
Nso utịbe un̄wọn̄ọ ke oro ekedi ntem ọnọ owo oro okoyomde ndikpa mi! Mbọm Abasi ama ekeme ndisịm idem oburobụt abiatibet emi, ọdọn̄de enye esịt ye idotenyịn uwem ke ubọn̄ ubọn̄ paradise oro edide.
2. Nam an̄wan̄a nte idotenyịn oro owo enyenede ke paradise ekemede ndidi ata idem n̄kpọ. (Mme Hebrew 6:18)
2 Ima ye mbọm Abasi ẹkeme ke akpanikọ nditara nsịm mme owo oro mîkpetke-kpet ndinam uduak esie. Se itienede mi edi uwụtn̄kpọ eyomfịn:
Ke edem usoputịn Japan, ẹma ẹbiere ikpe n̄kpa ẹnọ ekpri akparawa kiet ke ntak oro enye okowotde owo iba. Ke mme isua oro enye ekebetde n̄kpa, enye ama edisobo ye Bible ye “eti mbụk” esie, ekpep onyụn̄ onyịme etop Obio Ubọn̄, onyụn̄ ana baptism ke ufọk-n̄kpọkọbi. Mme ekpeme ufọk-n̄kpọkọbi ẹma ẹdu ke n̄kpaidem ndikụt enye okpụhọrede edu unam enyene edu ima, idatesịt ye emem. Enye ama ekpep ndiwet ubọkn̄wed oro nnan ekemede ndikot onyụn̄ osion̄o ediwak n̄wed ukpep Bible ewet man an̄wam mbon oro ẹdide nnan, ẹmi mîdụhe ke ufọk-n̄kpọkọbi ke ukpepn̄kpọ mmọ. Enye ama esiwet ediwak leta ọnọ mme owo ke an̄wa, esịnde udọn̄ ọnọ mmọ ke mbuọtidem Christian. Ke usenubọk oro ẹkeyomde ndiwot enye, isụn̄utom kiet ama etiene enye aka itie uyịri owo n̄wot. Akparawa emi ama ọfiọk ete ke ana imọ idahaemi iyụhọ unenikpe, inọ ‘uwem ke uwem,’ edi enye ama ekeme nditịn̄ ekikere esie ete: ‘Mfịn ami mmenyene ọkpọsọn̄ mbuọtidem ke Jehovah, ye ke uwa ufak ye idotenyịn ediset ke n̄kpa.’ Ke ẹma ẹkekot Itien̄wed Abasi kiet, ẹkwọ ikwọ ẹnyụn̄ ẹbọn̄ akam ẹma, enye ama asan̄a sụn̄sụn̄ aka itie n̄kpa esie, iso esie owụtde in̄wan̄în̄wan̄ ọkpọsọn̄ idotenyịn oro odude enye ke esịt. Mme akpatre ikọ esie ẹkedi: ‘Ke ekpri ini ami mmọn̄ nde, ndien edieke enye edide uduak Jehovah nyesobo ye kpukpru mbufo ke paradise.’
3. Nso utịbe utịbe idotenyịn odu ọnọ mme akpan̄kpa? (1 Corinth 15:22)
3 Ukem nte anamidiọk oro akakpade ye Jesus, akparawa emi ama ekeme ndiwụt mbuọtidem ke mbọm ye ima-mfọnido Abasi. Nte utọ mbuọtidem oro enyene eti itiat idakisọn̄? Ih, koro Bible esịn udọn̄ ọnọ kpukpru ubonowo “[ndidori] enyịn ke Abasi . . . nte, nti owo ye mme idiọkowo ẹyeset ke n̄kpa.” (Utom 24:15) Nso utịbe utịbe idotenyịn! Ẹyenam akpakịp ibat mme akpan̄kpa ubonowo, nti ye idiọk, ẹset ẹwọrọ ke udi, ẹnyụn̄ ẹnyene ifet edidot ndinyene nsinsi uwem ke paradise oro ẹfiakde ẹwụk ke isọn̄. Edi paradise isọn̄ emi edidi sụk mbiet paradise oro akam enyenede akakan ubọn̄.
UBỌN̄ UBỌN̄ PARADISE EKE SPIRIT
4. Ke akpa isua ikie ewe paradise ini iso ke apostle Paul okokụt ke n̄kukụt adan̄aoro?
4 Apostle Paul obụk ete ke n̄kukụt ‘ke ẹma ẹkpobi imọ ẹdọk ẹdụk ke paradise, imọ inyụn̄ ikop ikọ eke ẹyan̄ade edeme nditịn̄.’ Nso idi “paradise” oro? Idịghe ndusụk ataata ikpehe enyọn̄, edi edi paradise eke spirit oro ke ndusụk ini ke iso akadade idatesịt ọsọk ikọt Abasi ke isọn̄ emi.—2 Corinth 12:1-4.
5. (a) Mme n̄kpọntịbe ewe ikeda ikosịm mme asan̄autom Jehovah ndibe ndụk paradise eke spirit? (b) Nso mme idaha idu do? (Isaiah 11:6-9)
5 Jehovah okowụk paradise eke spirit emi ke ekemini esie. Ke utịt utịt ubak ọyọhọ isua ikie efụtenan̄, ata nditọ ukpepn̄kpọ Bible ẹma ẹdifiọk ẹte ke ediwak edinam ye ukpepn̄kpọ ufọkederi Christendom ẹketọn̄ọ ẹto ido ukpono Babylon eset, inyụn̄ itoho Bible. Mmọ ẹma ẹtọn̄ọ ndiyarade mme nsunsu ukpepn̄kpọ utọ nte edinyene ukpọn̄ oro mîkemeke ndikpa, ndutụhọ hell ikan̄ ye Abasi-Ita-ke-Kiet, ẹnyụn̄ ẹfiak ẹwụk mme ukpepn̄kpọ Bible oro aban̄ade ufak Jesus, ediset ke n̄kpa ye Obio Ubọn̄ Abasi. Toto ke 1879, mmọ ẹmekaiso ndimịn̄ magazine Enyọn̄-Ukpeme nte andin̄wana nnọ akpanikọ Bible. Ke se iwakde ibe isua 30, ọkọn̄ọde ke ubatini Bible, mmọ ẹma ẹnyan ubọk ẹwụt 1914 nte edide akpan isua ke prọfesi Bible. Ndien ke ini 1914 ekedide edisịm, Ekọn̄ Ererimbot I ama asiaha, emi mme mfịna eken ẹketienede, ẹnịmde “ntọn̄ọ ubiak uman” idiọn̄ọ, kpa nte Jesus ekebemde iso etịn̄. Ke ini oro, mme adaiso ido ukpono ererimbot ẹma ẹsụn̄i ẹnyụn̄ “ẹsua” mme anam-akpanikọ ntiense Jehovah, edi etisịm 1919 mmọemi ẹma ẹkịbe ẹbọhọ kpukpru ufụn oro ẹkedụkde ẹnọ ukara ererimbot eke nsunsu ido ukpono—kpa “Akwa Babylon.” (Matthew 24:3-9; Ediyarade 17:5) Mmọ ẹma ẹsan̄a ẹka iso iso ke “usụn̄ edinen owo,” tutu ẹbe ẹdụk ke paradise eke spirit emi prọfet oro ekewetde ke anyanini ẹmi ẹkebede ete:
“Ndien mmọ eke Jehovah akafakde ẹyefiak ẹdi . . . , nsinsi idatesịt onyụn̄ ayara mmọ ke ibuot: mbre ye idatesịt ẹyesịm mmọ, mfụhọ ye esuene ẹyefen̄e.”—Isaiah 35:8-10.
6. (a) Mmanie ke ẹbemiso ẹda ẹsịn ke paradise eke spirit emi? (b) Otu ewe ndien ọwọrọ owụt idem? (Isaiah 2:2-4)
6 Mme prọfesi ẹnyene ekese n̄kpọ nditịn̄ mban̄a uyai paradise eke spirit emi. Akpa kan̄a, ẹma ẹda nsụhọ “ekpri otuerọn̄” Jesus oro ẹyetde aran ẹsịn ke idaha eke paradise emi. (Luke 12:32) Edi ke ama eketịn̄ aban̄a edimek oro ẹmekde nditọ Israel eke spirit 144,000 ẹmi, Ediyarade oro ẹkenọde John etịn̄ aban̄a mbon efen oro ẹnọde ifet ndidụk ediye paradise emi:
“Ndien sese, akwa otuowo, eke baba owo kiet mîkemeke ndibat, eke ẹtode ke kpukpru obio ye esien ye idụt ye usem ẹda ke iso ebekpo [Jehovah] ye ke iso Eyenerọn̄ [Jesus oro inikiet ẹkewade edi ẹnọde ubọn̄ kemi], ẹsịne mfia ọfọn̄idem.” (Ediyarade 7:1-4, 9)
Mi ke isọn̄ emi, “akwa otuowo” ẹtiene nsụhọ “ekpri otuerọn̄” ẹdu ke idaha oro ẹnyịmede ke paradise eke spirit.
7. Ke nso udomo ke paradise eke spirit atara? (Isaiah 60:22)
7 “Akwa otuowo” ẹnen̄ede ẹwụt idem mfịn! Ke ini nsụhọ “ekpri otuerọn̄” ẹkebọhọde mme ukọbọ eke Ekọn̄ Ererimbot I, ibat mmọ ekedi tọsịn ifan̄, ẹdude ke ibat ibat ikpọ idụt Christendom. Edi ke April 14, 1995, ke ini Mme Ntiense Jehovah ẹkesopde idem ke mme esop ẹwakde ẹbe 78,000 ke idụt ye mme efakutom 232 ke ofụri isọn̄, ndinịm usọrọ Udia Mbubịteyo Ọbọn̄ ke editi n̄kpa Jesus, ofụri ibat owo oro ẹkedụkde ekedi owo 13,147,201. Ke akpanikọ, paradise eke spirit amatara idahaemi ke udomo eke ofụri ererimbot!
SESE PARADISE ISỌN̄!
8. Nso ke paradise isọn̄ ediwụt? (Ediyarade 21:2, 3)
8 Kpasụk nte ubom oro ye mme andidu ke esịt esie ẹkebọhọde ukwọ eke eyo Noah, ntre ke paradise eke spirit ye mbon oro ẹdụn̄de ke esịt ẹdibọhọ “akwa ukụt” ẹbe ẹdụk isọn̄ oro ọbọhọde usabade n̄kpọ. Nso uyai ẹdiwụt idem ntem ke isọn̄ adan̄aoro! “Akwa otuowo” oro ẹbọhọde ẹyenyene utom ndinam ke ‘ndikan isọn̄’ nnyụn̄ n̄kpụhọde enye nsịn ke ediye itie oro owụtde kpukpru uyai paradise eke spirit oro Isaiah ekewetde aban̄a ete:
“Wilderness ye nsatitọn̄ ẹyedara; desert eyenyụn̄ ebre, onyụn̄ asiaha ikọn̄ nte rose. Eyediọn̄ asiaha ikọn̄, onyụn̄ ebre mbre, onyụn̄ ọkwọ: . . . mmọ ẹyekụt ubọn̄ Jehovah, uyai Abasi nnyịn.” (Isaiah 35:1, 2)
Nduaidem nduaidem uyai eke paradise ofụri ererimbot oro ke akpanikọ eyetoro akwa Andibot enyọn̄ ye isọn̄!
9. Nso orụk itie edidem edidu ke paradise, ndien edibe ke anie? (Psalm 72:12)
9 Ke paradise isọn̄ oro, mme owo n̄ko ẹyedian uyo ọtọkiet ke nditoro Jehovah nnyụn̄ mmenede itie edidem esie ke enyọn̄:
“Mmọ ẹbụk ubom ubọn̄ fo, ẹnyụn̄ ẹtịn̄ ẹban̄a odudu fo. Ẹnyụn̄ ẹnam nditọ owo ẹfiọk ese esie, ye ubom uyai ubọk esie.” (Psalm 145:10-13)
Ti ete ke itie edidem eke tọsịn isua eyedu, oro Jehovah edikarade ebe ke Eyen esie, Christ Jesus, man ẹdiọn̄ ofụri orụk ye ekpụk ubonowo. Enye edidi ukara emem. Ẹyeda kpukpru ndutịm oro ẹtọn̄ọde man ẹmenede ubonowo ẹkesịm utịt ye akwa edikụt unen. Unana ibụk ye ima ẹyeda itie idiọkitọn̄ ye n̄wo. Mme andikara idikọhọ aba inọ mbon inyene inyụn̄ ifịk mbon ubuene ye unana, koro prọfet Abasi ofiori ete: “Sese, edidem kiet eyekama obio nte enende; amaedi mbọn̄ [mi ke isọn̄], mmọ n̄ko ẹyeda ubọn̄ ke eti ido.” (Isaiah 32:1) Ke idak ukara ererimbot kiet, oro edidi paradise ke akpanikọ!
10. (a) Mmanie ẹdidu “uwem” ke paradise? (Ediyarade 20:12, 13) (b) Didie ke ẹwụt ofụri ndutịm Jehovah kaban̄a uwem? (Ezekiel 47:1, 9)
10 Nso idatesịt ke edi ntem ndifiọk nte ke mme akpan̄kpa “ẹyedu uwem” man ẹbuana ke paradise oro! (John 11:25) Akpatre ibuot Ediyarade etịn̄ ọnọ nnyịn aban̄a ofụri ndutịm oro Jehovah anamde ebe ke Jesus Christ ndinọ mbio ẹmi ye mmọ eken ke otu ubonowo uwem ke ini oro. Enye etie nte “akpa mmọn̄ uwem, emi asakde nte crystal, emi otode ke ebekpo Abasi ye eke Eyenerọn̄.” Ndamban̄a inyan̄ emi ewet osụhọde ufọt efak obio heaven, “Obufa Jerusalem,” kpa ebiet emi Jesus oro ẹnọde ubọn̄ ye nsan̄a “ndidem” esie 144,000 ẹdụn̄de.
“Eto uwem ada ke n̄kan̄ akpa emi ye ke n̄kan̄ oko, on̄wụm orụk mfri duopeba, on̄wụm mfri esie ke ọfiọn̄ ke ọfiọn̄; ẹnyụn̄ ẹda ikọn̄ eto oro ẹkọk mme idụt udọn̄ọ.” (Ediyarade 22:1, 2)
Ntem, mme owo ke isọn̄ ẹyedara usọbọ oro uwa Christ adade edi man osio mme idiọkn̄kpọ mmọ ẹfep onyụn̄ ọkọk kpukpru udọn̄ọ ye unana mfọnmma mmọ. Kaban̄a ukara Obio Ubọn̄ Christ, ẹwet ẹte:
“Enye enyene ndida ubọn̄ tutu Enye [“Abasi,” NW] onụk kpukpru mme asua Esie ke idak ikpat. Akpatre usua emi Enye edisobode edi n̄kpa.” (1 Corinth 15:25, 26)
Ke paradise isọn̄, n̄kpa oro ẹdade ẹmana ẹto idiọkn̄kpọ Adam “idịnyụn̄ idụhe aba”!—Ediyarade 21:4.
UWEM KE PARADISE ORO N̄KPA MÎDỤHE
11. Ntak emi n̄kpa otode udọn̄ọ ye mbabuat n̄kpọntịbe mîdidụhe aba-a? (Isaiah 25:8; Job 33:25)
11 Ndiọi udọn̄ọ oro ẹkamade n̄kpa, utọ nte cancer, udọn̄ọ esịt ye usọn̄, ẹyebe ẹfep ke ntak ufọn uwa usio-isop Christ. Owo ekeme ndibụp ete, ‘Edi nso kaban̄a n̄kpa otode mbabuat n̄kpọntịbe?’ Emi n̄ko eyebe efep, koro ẹdinam paradise isọn̄ ebiet eke heaven, emi owo mîfiọkke “idiọk” m̀mê ‘ubiat n̄kpọ.’ (Isaiah 11:9) Idaha eke spirit owo eyekpeme enye osio ke nditen̄ nditen̄ edisịn idem ke afanikọn̄. Mfọnmma owo idibiereke aba n̄kpọ ukwan̄ ukwan̄ ukem nte ebot ikọt ọfrọde ke itiat kiet odoro ke eken ke mben ebeden̄ ye unana edidorode nduọ. N̄ko, ke se iban̄ade n̄kpọndịk unana idotenyịn, mme angel Abasi nte eyịghe mîdụhe ẹyenọ ukpeme, idem kpa nte mmọ idahaemi ẹnyenede ‘ewụhọ’ ndikpeme ikọt Abasi ke itie ifụre eke spirit mmọ.—Psalm 91:11.
12. Ke nso udomo ke owo ẹdidụn̄ọ ke isọn̄? (Matthew 22:30)
12 Owo efen ekeme ndibụp ete, ‘Edieke mme owo mîkpaha, nte owo idiwakke ikaha ke isọn̄?’ Ọfọn, ko ke 1970 Esop Kaban̄a Udia ye Utomin̄wan̄ Edidiana M’idụt ọkọdọhọ ete ke isọn̄ ekeme ndinọ mme owo ẹwakde utịm ike-40 ẹkan ibatowo ẹmi ẹdude uwem idahaemi udia oro awakde ekem! Idiọk ukara-owo edi n̄kukụre ntak mme owo ẹtiede biọn̄ idahaemi. Isọn̄ ekeme ndibọk akwa ibat ekpụk ubonowo akan nte enye ọbọkde mfịn, ndien oro eyesịne kpukpru mbon oro ẹnamde ẹset ke n̄kpa. N̄ko-n̄ko, akpa ewụhọ oro Abasi ọkọnọde owo ekedi “ẹyọhọ ke isọn̄, ẹnyụn̄ ẹkan enye,” idịghe ndiyọhọ n̄kaha ke enye tutu osịm idaha oro inem mîdụhe. Ke ini afo ọdọhọde owo esịn mmọn̄ ọyọhọ bọket, afo udorike enyịn ndikụt nte enye ọkpọhọrede ufakinua mmọn̄ ayak tutu mmọn̄ ọfiọrọ ke ofụri ufọk. Kpasụk ntre, imekeme ndidori enyịn nte ke Jehovah eyetre uman nditọ ke isọn̄ emi ke ekemini ye ke usụn̄ esie, ye unana edinam mfọnmma ubonowo okop mfụhọ.—Genesis 1:28.
13. Ntak emi nsinsi uwem mîdifekke owo tutu amama? (Psalm 145:16)
13 Owo efen ekeme ndibụp ete, ‘Edi nte nsinsi uwem idikabakede ifek owo?’ Oro ididehede itịbe! Ye mfre oro ẹfiakde ẹnam edi mfọnmma, ye ikpọkidem oro enyenede nsinsi nsọn̄idem ini uyen, ubonowo eyenyene ọkpọsọn̄ udọn̄ ndidụn̄ọde mme utịbe utịbe edibotn̄kpọ oro mînyeneke utịt. Mbufa n̄kpọ ẹyedu kpukpru ini ndidụn̄ọde mfiọk, mbufa usụn̄ ndida ikike nnam n̄kpọ, mme ifet ndineme se idude owo ke esịt nnyụn̄ mbuana ofụri n̄kpọ idatesịt eke isọn̄ oro ẹnamde ayama ye ekemmọ owo. Ndien ke ‘usen nduọkodudu’ Jehovah ama okosịm utịt, nso mbufa edibotn̄kpọ ke enye mîdidaha idi ndinam esịt enem mme edibotn̄kpọ esie?
14. Kaban̄a nso n̄wọrọnda ntak ke nsinsi uwem edidi inem inem n̄kpọ kpukpru ini? (Psalm 37:3, 4)
14 Akande kpukpru, inemesịt edikpon didie ntem ndikaiso n̄n̄wọn̄ mmọn̄ ke obube mmọn̄ “uwak uwak ọniọn̄ Abasi,” nnyụn̄ n̄kaiso mbọ akpakịp inyene ima ye ọniọn̄ esie! (Ephesus 3:10) Jesus, oro ekenyenede ebuana ye Jehovah anyanini mbemiso edide owo, ama etịn̄ aban̄a idemesie ete, ‘Ami ndu uwem nto Ete.’ Nte okop-inemesịt, ubon oro ẹfiakde ẹda ẹdisịn ke idak itie edikara Abasi, ediwak biliọn ubonowo, esịnede idem n̄kani anamidiọk, ‘ẹyedu uwem’ nde ke ntak utịbe utịbe ndutịm Jehovah. Mmọ ndikaiso ‘mbọ ifiọk’ Esie ediwọrọ mmọ ndidara uwem ọyọhọ ọyọhọ ke ofụri nsinsi ini iso oro edide!—John 6:57; 17:3.
[Ndise ke page 151]
Jesus ama akam ọnọ abiatibet oro okoyomde ndikpa idotenyịn paradise
[Ndise ke page 157]
Mme ndutịm Jehovah kaban̄a nsinsi uwem ẹbiet edemede-ukpọn̄ akpa ke ufọt eto ẹmi ẹn̄wụmde mfri