Mme Owo Ẹbọp Akwa Tower

EDIWAK isua ẹma ẹbe. Nditọ Noah ẹma ẹnyene ediwak nditọ. Nditọ mmọ ẹkọri ẹnyụn̄ ẹnyene ediwak nditọ efen. Ibịghike ediwak owo ẹma ẹdu ke isọn̄.

Kiet ke otu mmọ emi ekedi eyen eyeyen Noah ẹkekotde Nimʹrod. Enye ekedi idiọk owo emi ekebịnde ikọt owot mme unam ye mme owo. Nimʹrod n̄ko ama anam idemesie edidem ndikara mbon efen. Abasi ikaman̄a Nimʹrod.

Kpukpru owo ini oro ẹkesem usem kiet. Nimʹrod okoyom ndinịm mmọ kpukpru ọtọkiet man ekeme ndikara mmọ. Ntre nte ọmọfiọk se enye akanamde? Enye ama ọdọhọ mme owo ẹbọp obio ye akwa tower ke esịt. Se mmọ ke ndise nte ẹnamde brik.

Esịt ikenemke Jehovah Abasi ye ubọp ufọk emi. Abasi okoyom mme owo ẹwọrọ ẹkedụn̄ ke ofụri iso isọn̄. Edi mme owo ẹkedọhọ: ‘Edi! Ẹyak ibọp obio inọ idem nnyịn, ye tower eke etịn̄e esie osịmde ke enyọn̄. Do nnyịn iyewọrọ etop!’ Mme owo ẹkeyom ukpono ẹnọ idem mmọ, idịghe Abasi.

Ntre, Abasi ama anam mmọ ẹtre ndibọp tower oro. Nte ọmọfiọk nte enye akanamde? Ke ndinam mme owo ẹtịn̄ nsio nsio usem ini kiet utu ke kiet kpọt. Mme andibọp ikekemeke ndikop aba se kiet eken etịn̄de. Oro edi ntak ekedikotde obio mmọ Baʹbel mme Babylon, ọwọrọde “Ndutịme.”

Mme owo ndien ẹma ẹtọn̄ọ ndiwọrọ n̄kpọn̄ Baʹbel. Otu mme owo ẹketịn̄de ukem usem ẹma ẹka ẹkedụn̄ ọtọkiet ke mbak isọn̄ efen.