Ibuot 23
“Ana Nte Mbufo Ẹnyene Ime”
1. (a) Ntak emi Mme Ntiense Jehovah ẹdide mbon oro ẹnen̄erede ẹkop inemesịt-e? (b) Edi nso item ke Mme Hebrew 10:36 abuana kpukpru nnyịn?
MBON oro ẹbuọtde idem ye Jehovah ẹdi mbon oro ẹnen̄erede ẹkop inemesịt mfịn ke isọn̄. Mmọ ẹfiọk ebiet oro ẹkemede ndikụt ata mfọnn̄kan item ke nte ẹkpeyọde mme mfịna uwem—ke Ikọ Abasi. Mmọ ikopke ndịk nte mmọ ẹsakde iso ẹse ini iso, sia mmọ ẹfiọkde se idide uduak Abasi kaban̄a isọn̄ emi. (Jeremiah 17:7, 8; Psalm 46:1, 2) Kpa ye oro, apostle Paul ama ewet ọnọ ekemmọ mme Christian ete: “Ana nte mbufo ẹnyene ime man ẹbọ se Abasi ọkọn̄wọn̄ọde, ke ẹma ẹkenam se Enye amade.” (Mme Hebrew 10:36) Nso idi n̄kpọ oro anamde oyom ẹnyene ime?
2. Ntak oyomde mme mbet Jesus ẹnyene ime?
2 Mbemiso n̄kpa esie, Jesus ama anam mme apostle esie ẹdu ke edidemede ẹban̄a se ikanade ke iso, ọdọhọde: “Edieke mbufo ẹkpedide mbon ererimbot, ererimbot akpama ikọt esie: edi sia mbufo mîdịghe mbon ererimbot, edi Ami n̄kemekde mbufo nsio ke ererimbot, ke ntak oro ererimbot asua mbufo. Ẹti ikọ eke n̄ketịn̄de nnọ mbufo nte, Asan̄autom ikponke ikan eteufọk. Edieke mmọ ẹkesịnde Mi enyịn, ẹyesịn mbufo enyịn n̄ko: edieke mmọ ẹkenịmde uyo Mi, mmọ ẹyenịm uyo mbufo n̄ko. Edi mmọ ẹyenam mbufo kpukpru n̄kpọ ẹmi ke ntak enyịn̄ Mi, koro mmọ mîfiọkke Andidọn̄ Mi.” (John 15:19-21) Oro edi akpanikọ ntem didie!
3. (a) Didie ke edi nte ‘ke ntak enyịn̄ Jesus’ ke ẹkọbọ mme mbet esie? (b) Ke usụn̄ ewe ke mme andikọbọ “mîfiọkke” Enyeemi ọkọdọn̄de Jesus? (c) Anie enen̄ede edi ntak ukọbọ?
3 Mme anditiene Jesus ẹdi se ẹsuade sia mmọ ẹdụn̄de ke ufọt ererimbot oro esịnde se ata Ido Ukpono Christ adade aban̄a. Christ ọwọrọ “Enyeemi Ẹyetde Aran.” Jesus Christ edi enyeemi Jehovah eyetde aran ndidi Edidem, emi akarade ofụri isọn̄. Ntre ke ini Jesus ọkọdọhọde ete ke ẹyekọbọ mme mbet imọ ‘ke ntak enyịn̄ imọ,’ ikọ esie ọkọwọrọ ete ke ukọbọ oro edi ke ntak oro mmọ ẹnọde imọ ibetedem nte Edidem ye Messiah Jehovah, ke ntak oro mmọ ẹkopde uyo Christ ẹkan eke andikara ekededi ke isọn̄, ke ntak oro mmọ ẹnọde Obio Ubọn̄ esie ibetedem ke edinam akpanikọ mînyụn̄ isịnke idem ke mme mbubehe ukara owo. Jesus ama adian do ete ke ukọbọ oro edi ke ntak oro mme andikọbọ “mîfiọkke Andidọn̄ Mi”—oro edi, mmọ ẹsịn ndifiọk Jehovah Abasi nte Andikara Ekondo. (Men Exodus 5:2 domo.) Anie edi akpan owo emi esịnde nsọk ọnọ ukọbọ emi? Satan kpa Devil.—Ediyarade 2:10.
4. (a) Didie ke edisu eke Ediyarade 12:17 otụk uwem nnyịn? (b) Nso idi uduak Satan?
4 Mfịghe oro ẹdoride mme ata Christian ototịm ọsọn̄ ubọk, akpan akpan tọn̄ọ nte ẹkesio Satan ke heaven ẹduọk ke Obio Ubọn̄ Messiah Jehovah ama akamana ke 1914. Kûda enye ke ekpri n̄kpọ. Devil ye mme demon esie ke ẹn̄wana ọkpọsọn̄ ekọn̄ ye kpukpru mbon oro ẹdade ke n̄kan̄ Obio Ubọn̄ Abasi ke ubọk Jesus Christ. Kaban̄a emi, Ediyarade 12:17 ọdọhọ ete: “Ndien dragon [Satan kpa Devil] ayat esịt ye n̄wan [esop mbiet-n̄wan Abasi eke heaven], onyụn̄ adaba ndin̄wana ekọn̄ ye nditọ esie ẹmi ẹsụhọde [mme anditiene Christ oro ẹdade spirit ẹyet aran ke isọn̄] ẹmi ẹnịmde mme item Abasi, ẹnyụn̄ ẹyịrede ẹmụm ikọ ntiense Jesus ẹkama.” “Mme erọn̄ en̄wen,” n̄ko, ẹkụt idemmọ ke ufọt ọkpọsọn̄ en̄wan emi. Ebede ke n̄kari n̄kari usụn̄, Satan omodomo nditap m̀mê ndinyịk mmọ ẹtre ndinam mme ewụhọ Abasi. Enye oyom ndinam nsọn̄idem eke spirit mmọ emem ndien ekem abiat enye ofụri ofụri. Uduak esie edi ndinam ẹtre nditan̄a mban̄a Jesus nte Edidem ye Messiah Jehovah. Edi ke ekọn̄ eke spirit emi mme anam-akpanikọ asan̄autom Abasi ẹmekan.
DIDIE KE MME CHRISTIAN ẸKPENAM N̄KPỌ?
5. Nso ke mme ukara ẹnam ye Mme Ntiense Jehovah?
5 Ediwak ikpọ owo ukara ẹfiọk ẹte ke Mme Ntiense Jehovah ẹdi mme owo ẹnịmde ibet ye nte ke mmọ ẹnyene eti odudu ke obio. Edi, ofụri ukara owo ẹdi ubak editịm n̄kpọ eke ererimbot Satan. (1 John 5:19; Ediyarade 13:2) Ntre ikpedịghe n̄kpọ n̄kpaidem ke ini ndusụk ukara ẹkpande mme mbonoesop mbon oro ẹtuakde ibuot ẹnọ ata Abasi, ẹdoride ukpan ke mme n̄wed Bible mmọ, ẹtrede mmọ ndikwọrọ mban̄a Obio Ubọn̄ Abasi, ih, idem ẹkọbide ẹnyụn̄ ẹmiade mmọ ata edimamia. Edieke afo ke idemfo odude ke idak utọ mfịghe oro, nso ke afo edinam?
6. (a) Nso edu ke nnyịn ikpenyene ye ikpọ owo ukara? (b) Edi nso ke nnyịn isọn̄ọ ibiere ndinam? (c) Kpa ye oro ẹkọbọde nnyịn, didie ke nnyịn ikeme ndikaiso n̄kop inemesịt?
6 Mme apostle Jesus Christ ẹma ẹkpono mme ikpọ owo ukara. Ke ini ẹkekọbọde mmọ, mmọ ikosioho usiene. Edi ke ini ẹkewụkde ẹte ẹtre ndinam se Abasi okowụkde ete ẹnam, mmọ ye iwụk ẹma ẹbọrọ ẹte: “Nnyịn inyene ndikop uyo Abasi n̄kan uyo owo.” (Utom 5:29; Rome 12:19; 1 Peter 3:15) Idem ke ini ẹkedịghede mmọ uwem, ndịk n̄kpa ikanamke mmọ ẹkan̄ mbuọtidem. Mmọ ẹma ẹfiọk ẹte ke mmimọ inam n̄kpọ “Abasi emi anamde mme akpan̄kpa ẹset.” (2 Corinth 1:9; Mme Hebrew 2:14, 15) Okposụkedi ẹkekọbọde mmọ, mmọ ẹma ẹkop inemesịt—ẹnem esịt sia ẹkefiọkde ẹte mmimọ imenem Abasi esịt, ẹnem esịt ndinyene ifet ndibuana ke ndiwụt unen itie edikara esie nnyụn̄ n̄wụt edinam akpanikọ mmọ nnọ Edidem oro enye eyetde aran. (Utom 5:41, 42; Matthew 5:11, 12) Ndi afo edi utọ owo oro? Nte afo amanam ẹdiọn̄ọ fi an̄wan̄wa nte andibuana ye mbon oro ẹsobode mme utọ idaha ẹmi? Eʹbed-melʹech ekedi kiet oro mîkokopke ndịk ifiak edem. Anie ke enye ekedi?
7. (a) Eʹbed-melʹech ekedi anie, ndien ntak emi enye edide n̄kpọ udọn̄ ọnọ nnyịn idahaemi-e? (b) Ke ini enye okokopde ete ke ẹma ẹtop Jeremiah ẹsịn ke obube okpụk, nso ke Eʹbed-melʹech akanam, ndien ntak?
7 Eʹbed-melʹech ekedi abak-Abasi owo Ethiopia oro okodụn̄de ke Jerusalem ke ikpehe ini oro akadade okosụn̄ọ ke nsobo obio oro ke ubọk mbon Babylon. Ẹkeda enye ke utom ke ufọk Edidem Zedekiah. Ke ini oro Jeremiah akanam utom nte prọfet Jehovah ọnọ Obio Ubọn̄ Judah ye mme idụt oro ẹkekande ẹkụk. Sia enye ọkọsọn̄ọde ada etịn̄ etop nsobo Abasi ye unana edikan̄ mbuọtidem, enye ama osobo ata ọkpọsọn̄ ukọbọ. Ke ini ndusụk mbọn̄ ke Jerusalem ẹkesịnde nsọk, ẹma ẹkam ẹtop enye ẹsịn ke obube man okobụhọ ke okpụk akpa. Okposụkedi Eʹbed-melʹech mîkedịghe eyen Israel, enye ama owụt ukpono ọnọ Jeremiah nte prọfet Jehovah. Ke okopde se ẹkenamde, Eʹbed-melʹech ama adaha iwiwa okoyom edidem ke inuaotop obio man ekpe ubọk aban̄a Jeremiah. Ke anamde n̄kpọ etiene ewụhọ edidem, enye inikiet inikiet ama okot irenowo 30, ada urụk ye mme ntahaọfọn̄. Enye ama eteme Jeremiah ete ọdọn̄ ntahaọfọn̄ oro ke mkpafaha esie mbak urụk oro edita enye idem, ndien ekem mmọ ẹma ẹkot prọfet oro ẹsio ke obube oro.—Jeremiah 38:4-13.
8. Nso ọnọ-ndọn̄esịt un̄wọn̄ọ ke Jehovah ọkọdọn̄ ọnọ Eʹbed-melʹech, ndien ntak-a?
8 Nte an̄wan̄ade Eʹbed-melʹech ama okop ndịk aban̄a se mbọn̄ oro ẹdinamde enye ke ntak oro enye akabiatde ediomi mmọ, edi ukpono oro enye ekenyenede ọnọ prọfet Jehovah ye mbuọtidem esie ke Abasi ama ọsọn̄ akan editịmede esịt esie. Nte utịp, Jehovah ama ọn̄wọn̄ọ ọnọ Eʹbed-melʹech ebe ke Jeremiah ete: “Sese, ami mmọn̄ nda uyo mi ntiene obio emi ke idiọk, idịghe ke eti; enye eyesu ke iso fo ke usen oro. Ndien nyenyan̄a fi ke usen oro, Jehovah ọdọhọ; mmọ idinyụn̄ idaha fi isịn ke ubọk mme mmọemi afo edịghede ke iso mmọ. Koro menditreke ndiyak fi ọbọhọ, afo udûnyụn̄ uduọhọ ke ofụt: edi ukpọn̄ fo eyedi okuo ke n̄kpọ mbụme: koro afo ọkọbuọtde idem fo ye ami. Uyo Jehovah edi emi.”—Jeremiah 39:16-18.
9. (a) Didie ke “mme erọn̄ en̄wen” ẹbiet Eʹbed-melʹech? (b) Ntre, nso ke un̄wọn̄ọ oro Jehovah akanamde ọnọ Eʹbed-melʹech ọwọrọ ọnọ “mme erọn̄ en̄wen” mfịn?
9 Un̄wọn̄ọ oro edi ọsọn̄urua n̄kpọ didie ntem ọnọ mme asan̄autom Jehovah mfịn! Ukem nte Eʹbed-melʹech, “mme erọn̄ en̄wen” ẹkụt ukwan̄ikpe oro ẹnamde ye otu Jeremiah eyomfịn, kpa nsụhọ oro ẹyetde aran, ye ukeme oro ẹsịnde man ẹtre mmọ ndikwọrọ etop Jehovah. Mmọ imen̄eke ndinam se ededi oro mmọ ẹkemede man ẹkpeme ẹnyụn̄ ẹnọ otu oro ẹyetde aran mi ibetedem. Nte enende, ke ntre, un̄wọn̄ọ oro Jehovah ọkọn̄wọn̄ọde ọnọ Eʹbed-melʹech ọmọsọn̄ọ mmọ idem, ọsọn̄ọde mbuọtidem mmọ nte ke Abasi idiyakke mme andibiọn̄ọ ẹsobo mmọ edi nte ke Enye eyekpeme mmọ nte otu ebe nsobo ererimbot oro ekperede ada odụk edinen “obufa isọn̄” Esie.
10. Ke mme ikpehe ewe ke uwem ke mme Christian ẹsobo ukọbọ?
10 Idịghe kpukpru mbon oro ẹsan̄ade ke nde-ikpat Jesus Christ ẹsobo ndịghe edidi se ẹsịnde ke ufọk-n̄kpọkọbi, edi kpukpru mmọ ẹsobo ukọbọ ke usụn̄ kiet m̀mê eken. (2 Timothy 3:12) Ediwak tọsịn ibanndọ, ye mme ebe, ẹmeyọ ọkpọsọn̄ ubiọn̄ọ ke edinam akpanikọ idem ke esịt ufọk mmọ. Nditọwọn̄, n̄ko, ẹdi se mme ete ye eka ẹsịnde ke ntak udọn̄ oro mmọ ẹnyenede ndinam n̄kpọ Jehovah. (Matthew 10:36-38) Mme uyen Christian ẹkeme n̄ko ndisobo ukọbọ ke ufọkn̄wed; ikpọ owo, ke mme itieutom mmọ. Kpukpru owo ke otu Mme Ntiense Jehovah ẹsisobo enye nte mmọ ẹbuanade ke an̄wan̄wa edinọ ikọ ntiense mban̄a Obio Ubọn̄ Abasi. Mme ikọ Jesus ẹbuana kpukpru utọ mbon oro: “Ẹdida edime ime ke ukụt ẹbọ ukpọn̄ mbufo ẹda ẹnyene.”—Luke 21:19.
11. (a) Ewe mme idaha en̄wen ẹsịn ediwak owo ke ọkpọsọn̄ udomo? (b) Mmanie en̄wen ẹsobo mme n̄kpọ ẹmi, ndien ntak-a?
11 Ye ediwak owo, odu mme idaha efen oro ẹsịnde mmọ ke udomo. Mmọ ẹkeme ndinyene ọkpọsọn̄ udọn̄ọ, kiet oro anamde ẹtaba ekese idatesịt ke uwem. Mîdịghe, mmọ ẹkeme ndisobo ata ọkpọsọn̄ nsọn̄ọn̄kpọ ke n̄kan̄ ndutịm uforo. Ke ndusụk ini, ekeme ndidi nte ke mme n̄kpet n̄kpet nsan̄a ẹtịn̄ mme ikọ oro mîfọnke mînyụn̄ iwụtke mfọnido. Ke idaha oro akabuanade ete-ekpụk oro Job, Satan ama ada kpukpru usụn̄ ẹmi odomo ndibiat nsọn̄ọnda esie. Didie ke nnyịn idinam n̄kpọ edieke ikụtde idem nnyịn ke mme utọ idaha oro?—James 5:11.
12. (a) Ntak emi okoyomde Noah enen̄ede enyene ime ke utom esie? (b) Didie ke idaha oro edi ukem ke eyo nnyịn?
12 Ke n̄kan̄ eken, nso edieke edide ibat ibat owo ke nnyịn isikụt nte ẹnamde n̄kpọ ke eti usụn̄ ẹban̄a ukeme oro isịnde ndinọ ikọ ntiense mban̄a uduak Jehovah? Oro, n̄ko, oyom ime. Ti, ke kpukpru isua oro Noah ọkọkwọrọde ikọ mbemiso Ukwọ, sụk n̄wan esie ye nditọiren esie ye iban mmọ ẹketiene enye ẹnam n̄kpọ Jehovah. Ofụri ubonowo eken “ikọdọn̄ke enyịn.” (Matthew 24:39, NW) Kpasụk ntre, mfịn, ediwak owo ‘idọn̄ke enyịn.’ Nte ededi, ke ndusụk ikpehe emi inikiet ko esisịt ibat ẹkenamde n̄kpọ ke eti usụn̄ ẹban̄a etop Obio Ubọn̄, idahaemi ẹnyene akpakịp idọk eke mme andituak ibuot nnọ ata Abasi. Mbon oro ẹkeyọde unana udọn̄ m̀mê ikan̄ ikan̄ ubiọn̄ọ ke ediwak isua ke ẹkop inemesịt ndien ke ẹbuana idahaemi ke akwa utom editan̄ mbok emi!
‘ỌFỌFỌN YE MBON EKE ẸSỌN̄ỌDE ẸDA’
13. (a) Man ikaiso iyọ, nso ke ana nnyịn iwụk enyịn ise? (b) Nso ke oyom nnyịn ifiọk iban̄a mme usụn̄ edinam Satan?
13 Man owo okûtaba utịbe utịbe idotenyịn uwem ke “obufa isọn̄,” edi akpan n̄kpọ ndinyene in̄wan̄în̄wan̄ ke ekikere akwa eneni oro anade kpukpru edibotn̄kpọ ke iso—kpa eneni aban̄ade itie edikara ofụri ekondo. Nte nnyịn imada ke n̄kan̄ Jehovah ye unana edikan̄ mbuọtidem? Nte nnyịn imotịm ifiọk ite ke n̄kan̄ iba kpọt ẹdu, nte ke owo ikemeke nditre ndinyene n̄kan̄ emi enye adade ọnọ? Edieke nnyịn mîyomke ndikpa ke ekọn̄ emi, oyom nnyịn ifiọk ite ke usua ye etabi ẹdi mme n̄kpọ iba oro Satan akamade man abiat nsọn̄ọnda nnyịn, man anam nnyịn itre ndikop uyo Abasi, man ọwọn̄ọde nnyịn ọkpọn̄ akpan utom eke editie ntiense nnọ Obio Ubọn̄ Messiah.—1 Peter 5:8, 9; Mark 4:17-19.
14. (a) Nso itie ebuana ke ana nnyịn ikọri, ndien ye anie? (b) Didie ke enye edin̄wam nnyịn?
14 Ana nnyịn n̄ko ikọri ọyọhọ mbuọtidem ke Jehovah. Ekpedi ndisịme didie ntem ndidomo ndifep mme n̄kari n̄kari afia asua oro enyenede odudu akan owo ke odudu idem nnyịn ikpọn̄! Edi edieke nnyịn ibuọtde idem ye Jehovah ke ofụri esịt nnyịn, do ke ini nnyịn isobode nsọn̄ọn̄kpọ idomo onyụn̄ osịmde nnyịn iyenen̄ede isan̄a ikpere enye. (Ephesus 6:10, 11; Mme N̄ke 3:5, 6) Jehovah inyịkke nnyịn ndisan̄a ke akpan usụn̄ kiet. Enye idinyịkke nnyịn ndinam n̄kpọ oro nnyịn mînyịmeke. Edi edieke nnyịn iwọn̄ọrede ibịne Ikọ esie kaban̄a ndausụn̄, ibọn̄de akam inọ enye iyom ukeme, inyụn̄ isọn̄ọde idu ke esop esie, enye eyenọ nnyịn ndausụn̄. Ndien enye eyetọn̄ọ ntak ada uyarade ima esie oro mîkemeke ndikpu ọsọn̄ọ nnyịn idem.—Rome 8:38, 39.
15. (a) Anie ekpenyene ndidi akpa ke uwem nnyịn? (b) Didie ke nnyịn ikpese mme idaha oro ẹdomode mbuọtidem nnyịn?
15 Nsọn̄ọn̄kpọ ye mme idomo oro afo osobode ẹyesịn fi ke udomo. Anie ke afo onịm akpa ke uwem fo? Eneni Satan edi nte ke se kpukpru nnyịn ikerede akpan akpan iban̄a edi idem nnyịn. Ata ediwak owo ẹtie ntre. Jesus Christ ama okpụhọde. Nte afo omokpụhọde? Nte afo emekpep ndinịm edikpono enyịn̄ Jehovah akpa? Edieke edide ntre, do, utu ke ndifep mme idaha oro ẹdomode mbuọtidem fo, afo eyekeme ndisobo mmọ nnennen, ọbọn̄de akam eben̄e Jehovah ọnọ fi eti ibuot man ada mmọ anam n̄kpọ ndikpono enye. Ukụt oro afo ọyọde eyenam fi enyene ime; ime oro enyenede ke ntak ima oro amade Jehovah eyesụn̄ọ ke unyịme esie. “Ọfọfọn ye owo eke ọsọn̄ọde ada ke idomo, koro ke ẹma ẹkedomo enye ẹfiọk ẹte ọfọn, ẹnọnọ enye anyanya uwem, emi Ọbọn̄ ọkọn̄wọn̄ọde ndinọ mmọemi ẹmade Enye.”—James 1:2-4, 12; Rome 5:3, 4.
16. Nso utịtmbuba ke nnyịn ikpanyanade ibịne ndisịm?
16 Ikpîkpu editọn̄ọ ndinam n̄kpọ Jehovah m̀mê ndiyọ ke ibio ini ikemke. Nnyịn idu ke mbuba, ndien mbon oro ẹfehede ẹsịm utịt ẹbọ utịp. Kpukpru mbon oro ẹwụkde enyịn mmọ ke utịp emi ẹnyụn̄ ẹsụk ẹsịn̄ede idemmọ ẹyenem esịt ke ini akani editịm n̄kpọ emi ọduọde odụk nsobo! Nso ubọn̄ ubọn̄ ini iso ina ibet mmọ ntem ini oro!—Mme Hebrew 12:1-3; Matthew 24:13.