Ẹkọbọ ke Ntak Edinen Ido
Afo emekeme ndikop nto mme ufan ye iman nte ke Mme Ntiense Jehovah ẹsinyene mfịna ye ibet, nte ke ndusụk ukara ẹsidori mmọ ukpan, mîdịghe nte ke mmọ ke usụn̄ efen ẹdi ndiọi owo. Ntak ẹtịn̄de ndiọi ikọ ẹmi ẹban̄a mmọ-ọ?
Ntak idịghe koro Mme Ntiense mîsiwụtke ukpono inọ ibet, edi koro mmọ ẹtienede nde ikpat Jesus. Jesus ama ọdọhọ mme mbet esie ete ke mme owo ẹyesụn̄i mmọ, ẹkọbọ mmọ, ẹnyụn̄ ẹtịn̄ kpukpru ndiọi ikọ nsu ẹdian mmọ. Emi edi koro Satan, akwa andibiọn̄ọ Abasi, edide abasi ererimbot emi, ndien enye akpama ndiwọn̄ọde mme owo n̄kpọn̄ edinam n̄kpọ nnọ Abasi.—Matthew 5:10-12; 10:16-22, 34-39; 24:9, 10; John 15:17– 16:3; 2 Timothy 3:12; 1 Peter 5:8; Ediyarade 12:17.
Ke ini ẹkemụmde mme apostle ẹnyụn̄ ẹdade ẹka esopikpe, ikedịghe koro mmọ ẹkedide mme abiatibet, mbon afai, m̀mê mme andin̄wana ye ukara. Ntak ekedi koro mmọ ẹkekwọrọde eti mbụk. Ke ini apostle Paul okosiode ikpe esie aka akwa esopikpe, ekedi man anyan̄a onyụn̄ ọsọn̄ọ owụk unen emi mme Christian ẹnyenede ndikwọrọ eti mbụk nte ekemde ye ibet.—Utom 4:18-20; 5:28-32; Philippi 1:7.
Mfịn, Mme Ntiense Jehovah ẹdi mme Christian ẹmi ẹnịmde ibet, ẹmi ẹkpede tax mmọ ẹnyụn̄ ẹwụtde ukpono ẹnọ mbon oro ẹkarade. Mmọ ẹsiyak se inyenede Caesar ẹnọ Caesar ẹnyụn̄ ẹyak se inyenede Abasi ẹnọ Abasi. Edieke mmọ ẹnyenede mfịna ye odudu ukara ekededi, emi edi koro ukara oro mînọhọ utom ukwọrọikọ mmọ unyịme, mîdịghe ke ntak edida san̄asan̄a mmọ ke mme mbubehe idụt. Edi ke emi ana Mme Ntiense Jehovah ẹda ukem idaha oro mme apostle ẹkedade, ẹmi ẹkedọhọde ẹte: “Ana nnyịn ikop uyo Abasi nte andikara ikan uyo owo.”—Utom 5:29, NW; Mark 12:17; John 18:36; Titus 3:1, 2.
Mme Ntiense Jehovah iyomke ukọbọ edi ẹsimek ndidu sụn̄sụn̄ ye ifụre ifụre uwem. Nte ededi, edieke ẹkọbọde mmọ ke ntak mmọ ẹtienede ibet Abasi ye uwụtn̄kpọ Jesus Christ, mmọ ẹsikop inemesịt ndiyọ enye.—Matthew 5:10-12; Utom 5:40, 41; 1 Corinth 4:12; 1 Timothy 2:2; 1 Peter 3:14, 15; 4:12-16.
• Ntak emi ẹsisụn̄ide ẹnyụn̄ ẹkọbọde mme asan̄autom Jehovah?
• Ntak emi Mme Ntiense Jehovah ke ndusụk ini ẹsinyenede mfịna ye mme odudu ukara, nte mme apostle ẹkedide Christian ẹkenyenede-e?
• Didie ke mme asan̄autom Jehovah ẹsise ukọbọ?
[Mme ndise ke page 29]
Ẹma ẹda Jesus ẹka iso Pilate ẹma ẹnyụn̄ ẹkọbi apostle Paul ke ntak edikwọrọ Obio Ubọn̄ Abasi