Ibuot 14

Mme Akpa Mbet Jesus

KE AMA okodu usen 40 ke wilderness, Jesus afiak etiene John, oro okonịmde enye baptism. Nte enye asan̄ade ekpere, John nte an̄wan̄ade anyan enye ubọk onyụn̄ ofiori ọnọ mbon oro ẹdude do ete: “Sese, Eyenerọn̄ Abasi emi emende mme idiọkn̄kpọ ererimbot efep. Emi edi Owo eke ndọhọde mban̄a Enye nte, Owo etiene mi ke edem emi ọwọrọde ebem mi iso; koro Enye ekebemde mi iso odu.” Okposụkedi John ọsọn̄de Jesus, eyen eyeneka eka esie, ke emana, John ọfiọk ete ke Jesus ama ebebem imọ iso odu nte owo eke spirit ke heaven.

Edi, ke urua ifan̄ mbemiso oro, ke ini Jesus ekedide ndina baptism, John nte an̄wan̄ade ikotịmke idiọn̄ọ ite ke Jesus ekenyene ndidi Messiah. John ọdọhọ ete, “Ami n̄konyụn̄ ndiọn̄ọke Enye; edi n̄kedi ndida mmọn̄ nnịm baptism, man ẹyarade Enye ẹnọ Israel.”

John akaiso ndinam an̄wan̄a mme andikpan̄ utọn̄ nnọ enye se ikotịbede ke ini enye okonịmde Jesus baptism ete: “Mma n̄kụt spirit nte otode ke enyọn̄ osụhọrede nte ibiom odoro Enye ke idem. Ndien n̄kọdiọn̄ọke Enye; edi Enyeemi ọkọdọn̄de mi ete nda mmọn̄ nnịm baptism ọdọhọ mi ete, Owo eke edikụtde nte spirit osụhọrede odoro Enye ke idem edi Enyeemi onịmde owo baptism ke edisana spirit. Ami mma nnyụn̄ n̄kụt, nnyụn̄ ntie ntiense nte, Emi edi Eyen Abasi.”

Ke ndan̄nsiere John ke adada ye mbet esie iba. N̄ko-n̄ko, nte Jesus asan̄ade ekpere, enye ọdọhọ ete: “Sese, Eyenerọn̄ Abasi!” Kemi, mbet John Andinịm owo baptism mbiba ẹmi ẹtiene Jesus. Kiet ke otu mmọ edi Andrew, ndien enye eken, nte an̄wan̄ade, edi kpa owo oro ekewetde n̄kpọ ẹmi onịm, oro n̄ko ẹkekotde John. John emi, nte ekemde ye uyarade, nte an̄wan̄ade, edi n̄ko eyen eyeneka eka Jesus, sia edide eyen Salome, eyeneka Mary.

Ke ọwọn̄ọrede okụt Andrew ye John nte ẹtienede enye, Jesus obụp ete: “Mbufo ẹyom nso?”

Mmọ ẹbụp ẹte, “Rabbi . . . odụn̄ ke m̀mọ̀n̄?”

Jesus ọbọrọ ete, “Ẹdi ẹdise.”

Edi n̄kpọ nte n̄kanika inan̄ uwemeyo, ndien Andrew ye John ẹdu ye Jesus ke ofụri usen oro. Ekem Andrew okop nduaidem etieti tutu eyedi se enye ọsọpde aka ndiyom eyeneka esie, oro ẹkotde Peter. Enye asian Peter ete, “Nnyịn imokụt Messiah.” Ndien enye ada Peter aka ke ọtọ Jesus. Eyedi John ke ukem ini emi omokụt eyeneka esie James onyụn̄ ada enye edi ke ọtọ Jesus; edi, nte anade in̄wan̄În̄wan̄, John osio mbụk idemesie emi efep ke n̄wed Gospel esie.

Ke ndan̄nsiere, Jesus omokụt Philip, emi otode Bethsaida, kpa obio oro Andrew ye Peter ke akpa ẹketode. Enye ọdọhọ enye ete: “Tiene Mi.”

Ndien Philip okụt Nathanael, emi n̄ko ẹkotde Bartholomew, onyụn̄ ọdọhọ ete: “Nnyịn imokụt Enyeemi Moses ekewetde aban̄a Enye ke ibet, mme prọfet ẹkenyụn̄ ẹwetde ẹban̄a, kpa Jesus eyen Joseph, emi otode ke Nazareth.” Nathanael odu ke eyịghe. Enye obụp ete, “Nte baba eti n̄kpọ ekeme ndito ke Nazareth?”

Philip akpak ete, “Di dise.” Ke ini mmọ ẹsan̄ade ẹkpere Jesus, Jesus etịn̄ aban̄a Nathanael ete: “Sese, ata eyen Israel, emi n̄kari mÎdụhe enye ke esịt.”

Nathanael obụp ete, “Asan̄a didie ọdiọn̄ọ mi?”

Jesus ọbọrọ enye ete, “Ke ini Philip mîkokotke fi kan̄a, ke adan̄aemi afo etiede ke idak eto fig, n̄kokụt fi.”

Nathanael odu ke n̄kpaidem. Enye ọdọhọ ete, “Rabbi [emi ọwọrọde Andikpep], Afo edi Eyen Abasi; Afo edi Edidem Israel.”

Jesus obụp ete, “Ke emi ndọhọde fi nte, N̄kokụt fi ke idak eto fig, nte omonịm ke akpanikọ? Eyekụt se ikponde ikan emi.” Ekem enye ọn̄wọn̄ọ ete: “Ke akpanikọ ke ndọhọ mbufo nte, Mbufo ẹyekụt nte enyọn̄ okụbọrede, ye nte mme angel Abasi ẹdọdọk ẹsosụhọde ẹdoro Eyen Owo ke idem.”

Ndondo oro ke emi ebede, Jesus, ọkọrọ ye mme mbet oro enye ọkọde obufa mi, ẹkpọn̄ Itịghede Jordan ẹka ke Galilee. John 1:29-51.

▪ Mmanie ẹdi mme akpa mbet Jesus?

▪ Didie ke ẹmen Peter, ọkọrọ ye iso-ọfọn James, ẹwụt Jesus?

▪ Nso inam Nathanael onịm nte ke Jesus edi Eyen Abasi?