Ibuot 18

John Ekpekpri, Jesus Okpokpon

KE PASSOVER okụrede ke ini-uto eke 30 C.E., Jesus ye mme mbet esie ẹkpọn̄ Jerusalem. Nte ededi, mmọ ifiakke inyọn̄ ufọk mmọ ke Galilee edi ẹbe ẹka obio Judea, emi mmọ ẹnịmde mme owo baptism. John Andinịm owo baptism ke akanam ukem utom emi ke n̄kpọ nte isua kiet idahaemi, ndien enye ke osụk enyenyene mme mbet ẹmi ẹbuanade ye enye.

Ke akpanikọ, Jesus ke idemesie inịmke owo ekededi baptism, edi mme mbet esie ẹnam emi ke idak ndausụn̄ esie. Baptism mmọ enyene ukem se ọwọrọde ye enyeoro John onịmde, koro enye edide idiọn̄ọ nte ke eyen Jew akabade esịt ke idiọkn̄kpọ oro enye anamde adian Ibet ediomi Abasi. Nte ededi, ke enye ama ekeset ke n̄kpa, Jesus eteme mme mbet esie ete ẹnịm mme owo baptism oro enyenede isio isio se ọwọrọde. Baptism Christian edi idọn̄ọ nte ke owo ayak idem ọnọ ndinam n̄kpọ nnọ Jehovah Abasi.

Nte ededi, ke ntọn̄ọ ntọn̄ọ ikpehe utom Jesus emi, enye ye John, okposụkedi ẹnamde utom isio isio, ke ẹkpep ẹnyụn̄ ẹnịm mbon oro ẹkabade esịt baptism. Edi mme mbet John ẹfụbe ufụp ẹnyụn̄ ẹtọt ẹnọ enye ẹban̄a Jesus ẹte: “Rabbi, . . . Sese, Enye ke onịm baptism, kpukpru owo ẹnyụn̄ ẹtiene Enye.”

Utu ke ndifụbe ufụp, John adara aban̄a uforo oro Jesus okụtde onyụn̄ oyom mme mbet esie ẹdara n̄ko. Enye eti mmọ ete: “Mbufo ke idem mbufo ẹdi ntiense ẹnọ mi, ẹte, mmọdọhọ nte, ami ndịghe Christ, edi ẹdọn̄ mi mbem Enye iso.” Ekem enye otop inem inem n̄ke kiet ete: “Enyene an̄wanndọ edi eben̄wan: edi ufan eben̄wan, emi adade-da okop enye uyo, adara etieti ndikop uyo eben̄wan: ntem ke idara mi emi ama akabade ọyọho.”

John, nte ufan Eben̄wan, ama adara ke n̄kpọ nte ọfiọn̄ itiokiet oro ekebede ke ini enye akadade mme mbet esie owụt Jesus. Ndusụk owo ke otu mmọ ẹma ẹkabade ẹnyene idotenyịn ndidi mme andibuana ke otu n̄wanndọ Christ eke heaven emi ẹdide mme Christian oro ẹyetde aran ke spirit. John oyom mme mbet esie ẹdude kemi ẹtiene Jesus n̄ko, sia uduak esie edide ndidiọn̄ usụn̄ nnọ utom Christ oro okụtde unen. Nte John Andinịm owo baptism anamde an̄wan̄a ete: “Enye enyene ndidiọn̄ n̄kpon n̄ka iso, edi ami nnyene ndidiọn̄ n̄kabade n̄kpri.”

John, obufa mbet Jesus, emi ke akpa ekedide n̄ko mbet John Andinịm owo baptism, ewet aban̄a ntọn̄ọ uwem Jesus ye akpan udeme Esie ke edinyan̄a ubonowo, ọdọhọde ete: “Enyeemi otode ke heaven akan kpukpru owo. . . . Ete amama Eyen, omonyụn̄ ayak kpukpru n̄kpọ esịn Enye ke ubọk. Owo eke ọbuọtde idem ye Eyen enyene nsinsi uwem; edi owo eke mîbuọtke idem ye Eyen idikwe uwem, edi iyatesịt Abasi osụk ọkọbọ enye.”

Ibịghike tọn̄ọ nte John Andinịm owo baptism ekeneme aban̄a utom esie ndisụhọde, Edidem Herod omụm enye. Herod amada Herodias, n̄wan eyeneka esie, Philip, nte n̄wan esiemmọ, ndien ke ini John ayararede mme edinam esie an̄wan̄wa nte se mîdotke, Herod anam ẹsịn enye ke ufọk-n̄kpọkọbi. Ke ini Jesus okopde ete ke ẹmụm John, enye ye mme mbet esie ẹkpọn̄ Judea ẹka Galilee. John 3:​22–4:3; Utom 19:4; Matthew 28:19; 2 Corinth 11:2; Mark 1:14; 6:​17-20.

▪ Nso ke baptism ẹmi ẹkenịmde ke idak ndausụn̄ Jesus mbemiso ediset esie ke n̄kpa ọwọrọ? Ye ke ediset ke n̄kpa esie ebede?

▪ Didie ke John owụt ete ke n̄kụni oro mme mbet esie ẹkụnide inyeneke ufọn?

▪ Ntak emi ẹsịnde John ke ufọk-n̄kpọ-kọbi-e?