Ibuot 54

“Ata Uyo Emi Otode ke Heaven”

USEN enye eken ọkọyọhọ ye mme n̄kpọntịbe. Jesus ama ọnọ ediwak tọsịn owo udia ke utịbe utịbe usụn̄ onyụn̄ efehe ọbọhọ ubọk mme owo oro ẹkeyomde ndimụm enye nnịm ke edidem. Okoneyo oro enye ama asan̄a ke enyọn̄ Inyan̄ Galilee oro oyobio okofụmede; anyan̄a Peter, emi ọkọtọn̄ọde ndiden̄ ke ini enye akasan̄ade ke enyọn̄ mbufịt mmọn̄ oro; onyụn̄ anam mbufịt inyan̄ oro odobo man anyan̄a mme mbet esie oro ubom okoyomde ndisịp.

Idahaemi mme owo oro Jesus ọkọnọde udia ke utịbe utịbe usụn̄ ke edem edere usiahautịn Inyan̄ Galilee ẹkụt enye ke mbọhọ Capernaum ẹnyụn̄ ẹbụp ẹte: “Afo ekedi mi ini ewe?” Ke ndisua nnọ mmọ, Jesus ọdọhọ ke mmọ ẹyom imọ n̄kukụre koro mmọ ẹdoride enyịn ndifiak mbọ udia efen ke mfọn. Enye ọsọn̄ọ ọdọhọ mmọ ẹtre ndin̄wana nnyom udia eke edibiarade, edi ẹn̄wana ẹyom udia eke ebịghide osụn̄ọ ke nsinsi uwem. Ntre mme owo oro ẹbụp ẹte: “Nnyịn idisan̄a didie inam utom Abasi?”

Jesus asiak utom kiet oro ọsọn̄de urua akan. Enye anam an̄wan̄a ete: “Emi edi utom Abasi, ete, mbufo ẹbuọt idem ye Enyeemi Enye ọkọdọn̄de.”

Nte ededi, mme owo ẹmi ibuọtke idem ye Jesus, kpa ye ofụri utịben̄kpọ oro enye anamde. Ke unana edinịm ke akpanikọ, idem ke ama akanam ofụri utịben̄kpọ ẹmi, mmọ ẹbụp ẹte: “Afo anam nso nte idiọn̄ọ nan̄a, man nnyịn ikụt, inyụn̄ inịm Fi ke akpanikọ? Nso orụk utom ke anam? Mme ete nnyịn ẹkedia manna ke desert; nte ẹwetde ẹte, Enye osio udia ke heaven ọnọ mmọ ẹdia.”

Ke ndibọrọ mban̄a idiọn̄ọ oro mmọ ẹyomde, Jesus anam an̄wan̄a Enyeemi mme enọ utịben̄kpọ oro ẹtode, ọdọhọde ete: “Idịghe Moses ọkọnọ mbufo uyo emi otode ke heaven, edi Ete Mi ọnọ mbufo ata uyo emi otode ke heaven. Koro uyo Abasi edi Enyeemi otode ke heaven osụhọde edinọ ererimbot uwem.”

Mme owo oro ẹte: “Ọbọn̄, nọ nnyịn uyo emi kpukpru ini.”

Jesus anam an̄wan̄a ete: “Ami ndi uyo uwem: owo eke etienede Mi idikpaha biọn̄, owo eke onyụn̄ ọbuọtde idem ye Ami idikopke nsatitọn̄ tutu amama. Edi mma ndọhọ mbufo nte, mbufo ẹmekụt Mi, ndien inịmke ke akpanikọ. Kpukpru mmọ eke Ete ọnọde Mi ẹyetiene Mi; ndien owo eke etienede Mi ndibịnke enye nduọk. Koro nto ke heaven nsụhọde ndi, idịghe man nnam uduak Idem Mi, edi man nnam uduak Andidọn̄ Mi. Ndien emi edi uduak Andidọn̄ Mi, ete, ke otu kpukpru mmọ eke Enye ọkọnọde Mi, n̄kûyak ndomokiet ọbọhọ osop, edi nnam ofụri ẹset ke akpatre usen. Koro emi edi uduak Ete Mi, ete, kpukpru owo eke ẹkụtde Eyen, ẹnyụn̄ ẹbuọtde idem ye Enye, ẹnyene nsinsi uwem.”

Ke ntak emi mme Jew ẹtọn̄ọ ndikụni sia Jesus ọdọhọde ete, “Ami ndi uyo eke otode ke heaven osụhọde.” Mmọ isehe enye ke usụn̄ efen ikan eyenemi ete ye eka esie ẹdide owo, ke ntre ukem nte mbon Nazareth ẹkefan̄ade, mmọ ẹfan̄a, ẹdọhọde ẹte: “Nte emi idịghe Jesus, eyen Joseph, emi nnyịn idiọn̄ọde ete ye eka Esie? Enye anam didie ọdọhọ ndien ete, N̄koto ke heaven nsụhọde?”

Jesus ọbọrọ ete: “Ẹkûkụni ke otu idem mbufo. Baba owo kiet ikemeke nditiene Mi, ibọhọke Ete emi ọkọdọn̄de Mi odụri enye edi: ndien nyenam enye eset ke akpatre usen. Ẹma ẹwet ke mme prọfet ẹte, Abasi eyekpep mmọ kpukpru n̄kpọ; kpukpru owo eke ẹkopde uyo Ete ẹnyụn̄ ẹbọde ukpepn̄kpọ ẹtiene Mi. Emi ọwọrọ ete owo baba kiet ikwe Ete, ebe Enyeemi otode ke ọtọ Abasi: Enye okokụt Ete. Ke akpanikọ ke ndọhọ mbufo, Owo eke onịmde ke akpanikọ enyene nsinsi uwem.”

Ke ndikaiso, Jesus afiak ọdọhọ ete: “Ami ndi uyo uwem. Mme ete mbufo ẹma ẹdia manna ke desert, ẹnyụn̄ ẹkpan̄a. Emi edi uyo eke otode ke heaven osụhọde, man owo adia, okûkpa. Ami ndi odu-uwem uyo emi okotode ke heaven osụhọde: edieke owo ekededi adiade uyo emi, enye eyedu uwem ke nsinsi.” Ih, ke ndibuọt idem ye Jesus, kpa enyeemi Abasi okosiode ọdọn̄, mme owo ẹkeme ndinyene nsinsi uwem. Idụhe manna, m̀mê uyo efen ekededi eke etiede ntre, emi ekemede ndinọ nsinsi uwem!

Nneme aban̄ade uyo oro otode ke heaven mi nte an̄wan̄ade ọtọn̄ọ ndondo oro ke mme owo ẹma ẹkekụt Jesus ke mbọhọ Capernaum. Edi enye akakaiso, osịmde akpatre ke ukperedem ke adan̄aemi Jesus ekpepde mme owo n̄kpọ ke synagogue ke Capernaum. John 6:​25-51, 59; Psalm 78:24; Isaiah 54:13; Matthew 13:​55-⁠57.

▪ Nso mme n̄kpọntịbe ẹda itie mbemiso Jesus enemede aban̄a uyo eke otode heaven?

▪ Ke ẹkerede ẹban̄a se Jesus osụk anamde, ntak emi mmọ ndiyom idiọn̄ọ mînenke?

▪ Ntak emi mme Jew ẹkụnide ke Jesus ndidọhọ ke imọ idi ata uyo emi otode ke heaven osụhọde?

▪ M̀mọ̀n̄ ke nneme aban̄ade uyo eke otode heaven ada itie?