Ibuot 94

Ufọn Akam ye Nsụhọdeidem

MBEMISO, ke ini enye okodude ke Judea, Jesus ama ọnọ uwụtn̄kpọ aban̄ade ufọn edikọbọ ke akam. Idahaemi, ke akpatre isan̄ esie ndika Jerusalem, enye afiak ọsọn̄ọ owụt ufọn mîkpanaha ẹkpa mba ke edibọn̄ akam. Etie nte Jesus osụk odu ke Samaria m̀mê ke Galilee ke ini enye etịn̄de n̄kaiso uwụtn̄kpọ emi ọnọ mme mbet esie ete:

“Ebiereikpe okodu ke obio kiet emi mîbakke Abasi, mînyụn̄ ikereke owo: ebeakpa onyụn̄ odu ke obio oro; ndien enye etiene ebiereikpe ediwak ini, ete, Sio owo-utọk mi usiene nọ mi. Edi enye inyịmeke ke ndusụk ini: edi ekem enye ọdọhọ ke esịt esie ete, okposụkedi nte mmembakke Abasi, mmenyụn̄ n̄kereke owo, sia ebeakpa emi efefen mi eyọ, nyesio usiene esie, mbak enye edifịna mi ke ediyọrọ esie kpukpru ini.”

Jesus ndien anam se mbụk esie ọwọrọde an̄wan̄a, ọdọhọde ete: “Ẹkop se ukwan̄ ebiereikpe ọdọhọde. Nte Abasi idinyụn̄ isioho usiene inọ ndimek ikọt Esie, ẹmi ẹsemede ẹnọ Enye uwemeyo ye okoneyo, okposụkedi nte Enye emede anyanime ke ikọ mmọ?”

Ikọ Jesus iwọrọke ite ke Jehovah Abasi ke ­usụn̄ ekededi ebiet ukwan̄ ebiereikpe oro. Utu ke oro, idem edieke ukwan̄ ebiereikpe edinamde n̄kpọ aban̄a uyịre uyị­re n̄kpeubọk, eyịghe ndomokiet ikpodụhe nte ke Abasi, oro ke ofụri ofụri edide edinen onyụn̄ ọfọnde ido, idibọrọke akam ikọt esie edieke mmọ mîkpaha mba. Ntem Jesus akaiso ete: “Ndọhọ mbufo nte, Enye [Abasi] eyewara osio usiene ọnọ mmọ.”

Owo isiwakke ndinọ mme usụhọde owo ye mme ubuene unenikpe, ke adan̄aemi edide mme okopodudu ye mme enyene n̄kpọ owo ke ẹsiwak ndiwụt mfọn. Nte ededi, idikụreke ke Abasi ndikụt nte ke ẹnọ mme anamidiọk ufen oro odotde edi n̄ko eyekụt ete ke ẹnam n̄kpọ ye mme asan̄autom esie ke usụn̄ enende ke ndinọ mmọ nsinsi uwem. Edi owo ifan̄ ẹtịm ẹnịm ke akpanikọ ẹte ke Abasi eyewara anam unenikpe odu?

Ke etịn̄de akpan akpan otụk mbuọtidem oro enyenede ebuana ye odudu akam, Jesus obụp ete: “Ke adan̄aemi Eyen Owo edidide, nte Enye eyekụt mbuọtidem ke isọn̄?” Okposụkedi owo mîbọrọke mbụme oro, se ikọ oro ọwọrọde ekeme ndidi nte ke idimemke utom owo ndikụt utọ mbuọtidem oro ke ini Christ edide ke ukara Obio Ubọn̄.

Ke otu mbon oro ẹkpan̄de utọn̄ ẹnọ Jesus edi ndusụk owo oro ẹtịmde ẹkere ke imenyene mbuọtidem. Mmọ ẹberi edem ke idemmọ nte ke mmimọ idi ndinen owo, mmọ ẹnyụn̄ ẹse mbon en̄wen ke usụhọde. Otu emi ekeme idem ndisịne ndusụk mbet Jesus. Ntre enye ọnọ utọ mbon oro uwụtn̄kpọ etienede mi:

“Owo iba ẹkedọk ke temple ndibọn̄ akam: kiet edi Pharisee, enye eken edi publican. Pharisee ada ọbọn̄ akam ye idemesie, ete, Abasi, mmọkọm Fi, koro mmentiehe nte owo en̄wen, mbon nnama, mme anam-ukwan̄ido, mme esịn-efụbe, kpa ye nte publican emi. Ntre udia utịm ikaba ke urua; nsosio ubak kiet ke itie duop ke kpukpru se nnyenede nnọ Abasi.”

Ẹtịm ẹdiọn̄ọ mme Pharisee ke an̄wan̄wa uwụtidem mmọ nte ndinen owo man mmọ en̄wen ẹkụt. Mme mmek-nnịm usen utre udia idemmọ ẹsiwak ndidi ke Monday ye Thursday, ndien mmọ ẹyetịm ẹkpeme ndikpe ọyọhọ ubak duop ke idem ata n̄kpri ikọn̄ in̄wan̄. Ọfiọn̄ ifan̄ ke mbemiso, usụn̄ nte mmọ ẹsede mme usụhọde owo ke ndek ama otịm owụt idem ke ini Usọrọ Mme Ataya ke ini mmọ ẹkedọhọde ẹte: “Amaedi otuowo eke mîfiọkke ibet [oro edi, ukabade ikọ oro mme Pharisee ẹnọde enye], mmọ ẹdi mbukpo owo.”

Ke akade iso ke uwụtn̄kpọ esie, Jesus etịn̄ aban̄a utọ “mbukpo” owo oro ete: “Edi publican ada nsannsan, inyụn̄ inyịmeke ndimenede kpa enyịn esie nse enyọn̄, edi amia ubọk ke ikpanesịt esie, ete, Abasi, tua mi, idiọkowo, mbọm.” Sia publican oro ke nsụhọdeidem ọdiọn̄ọde idaha idiọkn̄kpọ esie, Jesus ọdọhọ ete: “Ndọhọ mbufo nte, owo emi osụhọde ọnyọn̄ ufọk enyene utebeikpe akan enye eken: koro kpukpru owo eke ẹmenerede idemesie, ke ẹyesụhọde enye ẹnịm; edi owo eke osụhọrede idemesie, ke ẹyemenede enye.”

Ntem Jesus afiak ọsọn̄ọ etịn̄ ufọn edisụhọde idem. Sia ẹkebọkde mmọ ke n̄kaowo emi mme Pharisee oro ẹkụtde idem ke ndinen owo ẹnyenede uku ntre ẹnyụn̄ ẹdoride nsọn̄uyo kpukpru ini ke edikon̄ itie ye idaha, idịghe n̄kpọ n̄kpaidem kemi enye otụkde idem mme mbet Jesus. Edi, nso eti ukpepn̄kpọ nsụhọdeidem ke Jesus ekpep ntem! Luke 18:​1-14; John 7:⁠49.

▪ Ntak emi ukwan̄ ebiereikpe oro ọnọde eben̄e ebeakpa oro, ndien nso ukpepn̄kpọ ke uwụtn̄kpọ Jesus ekpep?

▪ Nso mbuọtidem ke Jesus ediyom ke ini enye edide?

▪ Mmanie ke Jesus ọkọwọn̄ọde uwụtn̄kpọ aban̄ade Pharisee ye publican ọnọ?

▪ Nso edu mme Pharisee ke nnyịn ikpenyene ndifep?