Ibuot 97

Mbonutom ke In̄wan̄ Vine

JESUS ndisụk n̄kụre ndidọhọ ke “ediwak mmọ eke ẹbemde iso ẹyekpere edem, mme ekperedem ẹyenyụn̄ ẹbe iso,” edi emi. Idahaemi enye anam emi an̄wan̄a ke ndinọ mbụk. Enye ọtọn̄ọ ntem, “Obio Ubọn̄ Heaven ebiet eteufọk kiet, emi abakde ọwọrọ ke usenubọk ndikpe mbonutom nsịn ke in̄wan̄ vine esie.”

Jesus akaiso ete: “Ndien ke [eteufọk] ama okodiomi ye mbonutom ndinọ mmọ okụk kiet ke usen kiet, enye ọdọn̄ mmọ ẹka ke in̄wan̄ vine. Ekem ke ini ekperede ọyọhọ hour usụkkiet ke usenubọk, enye ọwọrọ okụt mmọ efen ẹdade ke an̄waurua efen efen, onyụn̄ ọdọhọ mmọ ete, Mbufo n̄ko ẹdụk ke in̄wan̄ vine, ndien nyenọ mbufo se inende. Ndien mmọ ẹka. Ke ini ekperede ufọt uwemeyo, ye ebe ufọt uwemeyo hour ita, enye ọtọn̄ọ ntak ọwọrọ anam kpasụk ntre. Edi ke ini ekperede ọyọhọ hour ition ke mbubịteyo enye ọwọrọ okụt owo efen ẹdade do, onyụn̄ ọdọhọ mmọ ete, Nsinam mbufo ẹkedade mi ofụri usen efen efen? Mmọ ẹte enye, Koro baba owo kiet mîkekpehe nnyịn utom. Enye ete mmọ, Mbufo nde ẹdụk ke in̄wan̄ vine.”

Eteufọk, m̀mê enyene-in̄wan̄ vine, edi Jehovah Abasi, ndien in̄wan̄ vine edi idụt Israel. Mbonutom ke in̄wan̄ vine ẹdi mme owo ẹmi ẹdade ẹsịn ke Ibet ediomi; mmọ akpan akpan ẹdi mme Jew ẹmi ẹkedude uwem ke eyo mme apostle. Edi ye mbonutom ọyọhọ-usen ikpọn̄îkpọn̄ ke ẹnam ediomi ukpe okụkutom. Okụkutom edi okụk kiet ke utom usen kiet. Sia “ọyọhọ hour usụkkiet” edide n̄kanika 9 usenubọk, mbon oro ẹkotde ke ọyọhọ hour 3, ọyọhọ 6, ọyọhọ 9, ye ọyọhọ hour 11, ndisiak ke adiana ke adiana, ẹkenyene hour unam utom 9, 6, 3, ye 1 kpọt.

Mbonutom hour-⁠12, m̀mê ọyọhọ-usen, ẹda ẹban̄a mme adaiso ido ukpono mme Jew ẹmi ẹkekade-kaiso ndisịn idem ke utom ido ukpono. Mmọ ibietke mme mbet Jesus, ẹmi, ke ofụri ini uwem mmọ, ẹkeyakde idem ẹsịn ke utom ukọ iyak m̀mê ke utom idịbi-udia eken. Ibọhọke ke utịt utịt 29 C.E. ke “eteufọk” ọkọdọn̄ Jesus Christ nditan̄ mmọemi mbok ọtọkiet man ẹdi mbet esie. Mmọ ke ntre ẹma ẹkabade ẹdi “mme ekperedem,” m̀mê mbonutom in̄wan̄ vine ẹmi ẹkedide utom ke ọyọhọ hour 11.

Ke akpatre, ndamban̄a usenutom oro omosịm utịt ye n̄kpa Jesus, ndien ini ukpe mbonutom okụkutom edisịm. Ẹtiene esen esen ido edibem iso n̄kpe ekperedem owo okụkutom, nte ẹnamde an̄wan̄a ẹte: “Ekem ke ini osịmde mbubịteyo, enyene-in̄wan̄ vine ọdọhọ akama-ukpọhọde esie ete, Kot mbonutom ẹdi, nyụn̄ nọ mmọ okụk mmọ, ọtọn̄ọde ke ekperedem osịm ebeiso. Ndien ke ini mmọemi ẹkekotde mmọ ke ini ekperede ọyọhọ hour ition ke mbubịteyo ẹdide, mmọ ẹbọ owo kiet okụk kiet, owo kiet okụk kiet. Edi ke ini mme ebeiso ẹdide, mmọ ẹdori enyịn ẹte ke mmimọ iyebọ ikan; mmọ ẹnyụn̄ ẹbọ kpa ukem ukem, owo kiet okụk kiet, owo kiet okụk kiet. Edi ke adan̄aemi mmọ ẹbọde, mmọ ẹsụk eteufọk oro uyo ẹte, Mme ekperedem ẹmi ẹma ẹnam utom hour kiet kpọt, ndien afo anam mmọ ẹdi ukem ye nnyịn, ẹmi ikobiomde mbiomo usen inyụn̄ ifọbọde eyo. Edi enye ọbọrọ owo mmọ kiet ete, Ufan, ntụkke fi: nte ukodiomike ye ami ke okụk kiet? Men se inyenede fi, nyọn̄; edi uduak mi ndinọ ekperedem emi kpa nte nnọde fi. Nte inenke ami ndida se inyenede mi nnam nte mmade? M̀mê nte enyịn fo ọdiọk, koro ami mfọnde ido?” Ke ndiberi, Jesus afiak etịn̄ akpan n̄kpọ oro eketịn̄de ke mbemiso, ọdọhọde ete: “Ntre ke mme ekperedem ẹyebemiso, mme ebeiso ẹyenyụn̄ ẹkpere edem.”

Edibọ okụk kiet oro ada itie, idịghe ke n̄kpa Jesus, edi ke Pentecost eke 33 C.E., ke ini Christ, kpa “akama-ukpọhọde,” an̄wan̄ade edisana spirit ofụk mme mbet esie ke idem. Mme mbet Jesus ẹmi ẹbiet “mme ekperedem,” m̀mê mbonutom ẹmi ẹkedide utom ke ọyọhọ hour 11. Okụk oro idaha iban̄a enọ edisana spirit oro ke idemesie. Okụk oro edi n̄kpọ oro mme mbet ẹmi ẹdidade ẹnam n̄kpọ mi ke isọn̄. Enye edi n̄kpọ oro ọwọrọde uwem ọnọ mmọ, kpa nsinsi uwem mmọ. Enye edi ifet edidi nditọ Israel eke spirit, emi ẹyetde aran ndikwọrọ Obio Ubọn̄ Abasi.

Ibịghike mbon oro ẹkebemde iso ẹkpe utom mi ẹkụt ẹte ke ẹkpe mme mbet Jesus okụkutom, mmọ ẹmenyụn̄ ẹkụt nte mmọ ẹdade ndamban̄a okụk emi ẹnam n̄kpọ. Edi mmọ ẹyom se ikande edisana spirit ye mme ifetutom Obio Ubọn̄ oro asan̄ade ye enye. N̄kụni ye mme mfan̄a mmọ ẹdi edikọbọ oro mmọ ẹkọbọde mme mbet Christ, kpa “mme ekperedem” mbonutom ke in̄wan̄ vine.

Nte edisu eke akpa isua ikie oro edi n̄kukụre edisu ke uwụtn̄kpọ Jesus? Baba, mme ọkwọrọ ederi Christendom ke ọyọhọ isua ikie 20 emi, ke ntak mme idaha ye mme mbiomo mmọ, ẹkedi mme “ebeiso” owo ẹmi ẹdade ke utom ndamban̄a in̄wan̄ vine Abasi. Mmọ ẹkese mme ọkwọrọikọ oro ẹma ẹkeyak idem ẹnọ ẹmi ẹbuanade ye Watch Tower Bible and Tract Society nte “mme ekperedem” owo ndinyene eti utom ekededi ke utom Abasi. Edi kpa mbon ẹmi mme ọkwọrọ ederi ẹsịnde ke ndek mi, ke akpanikọ, ẹkebọ okụk kiet oro​—⁠kpa ukpono unam utom nte mme isụn̄utom Obio Ubọn̄ Abasi eke heaven ẹmi ẹyetde aran. Matthew 19:⁠30–20:⁠16.

▪ Nso ke in̄wan̄ vine ada aban̄a? Mmanie ẹda ẹban̄a enyene-in̄wan̄ vine ye mbonutom ẹmi ẹnamde utom hour-⁠12 ye mbonutom ẹmi ẹnamde utom hour-⁠1?

▪ Ini ewe ke ndamban̄a usenutom eketre, ndien ini ewe ke ẹkekpe okụkutom?

▪ Nso ke edikpe okụk kiet oro ada aban̄a?