Ibuot 121
Ke Iso Sanhedrin, Ekem Ẹda Ẹsọk Pilate
EYO ọmọn̄ esiere. Peter amakan̄ Jesus ọyọhọ utịm ikata, ndien mbon Sanhedrin ẹmekụre nsahi nsahi ubiereikpe mmọ ẹnyụn̄ ẹsuana. Nte ededi, mmọ ẹfiak ẹsop idem ke usenubọk Friday ndondo oro eyo esierede, isan̄ enyeemi ke ufọkesop Sanhedrin. Anaedi uduak mmọ edi ndiwụt nte ke ibet onyịme ikpe okoneyo oro. Ke ini ẹdade Jesus ẹdi iso mmọ, mmọ ẹdọhọ nte ẹkedọhọde ke okoneyo oro ẹte: “Edieke Afo edide Christ, sian nnyịn.”
Jesus ọbọrọ ete, “N̄kpetetịn̄ nnọ mbufo, mbufo idinịmke ke akpanikọ; onyụn̄ edieke mbụpde mbufo mbụme, mbufo idibọrọke.” Nte ededi, Jesus ye uko anyan ubọk owụt owo emi enye edide, ọdọhọde ete, “Ọtọn̄ọde ke n̄kpọ emi ama ebe, Eyen Owo eyetie ke ubọk nnasia odudu Abasi.”
“Nte Afo edi Eyen Abasi nan̄a?” kpukpru mmọ ẹyom ndifiọk.
Jesus ọbọrọ ete, “Mbufo ẹmetịm ẹtịn̄ ẹte ndi Enye.”
Ye mbon ẹmi ẹduakde ndiwot owo mi, ibọrọ emi ekem. Mmọ ẹbat enye nte ikọ esuene. Mmọ ẹbụp ẹte, “Nnyịn iyom nso ye ntiense efen? Nnyịn ke idem nnyịn imokop ikọ ke inua Esie.” Ntre mmọ ẹbọp Jesus, ẹda enye ẹdaha, ẹnyụn̄ ẹyak enye ẹsịn ke ubọk Pontius Pilate, andikara Rome.
Judas, andida Jesus nnọ ke okop ikọ ikpe. Ke adan̄aemi enye okụtde ke ẹbiom Jesus ikpe, enye atua n̄kpọfiọk. Ntre, enye aka ebịne ikpọ oku ye mbiowo ndiyak mbak silver 30 oro nnọ, anamde an̄wan̄a ete: “Mmanam idiọkn̄kpọ, ke emi n̄kayakde iyịp emi mîduehe isop nnọ.”
Mmọ ebọrọ ye isọn̄esịt ẹte, “Nnyịn isan̄a nso do? Ikọ fo edi oro.” Ntre Judas otomo mbak silver oro ọduọn̄ọ ke temple onyụn̄ adaha ọnyọn̄ okodomo ndiyịri idem n̄wot. Nte ededi, n̄kọk eto emi Judas eyịride urụk nte an̄wan̄ade obụn̄ọ, ndien enye editọ idem ke ikpọ itiat ke isọn̄ onyụn̄ asiaha.
Ikpọ oku ifiọkke se ẹkpedade mbak silver oro ẹnam, mmọ ẹbiere ẹte, “Inenke ndisịn okụk emi ke itie unịm-okụk temple, sia edide ekọmurua iyịp.” Ntre, ke ẹma ẹkedụk ediomi, mmọ ẹda okụk oro ẹdep in̄wan̄ obot-eso ndibụk isenowo. Mmọdo ẹkotde in̄wan̄ oro “In̄wan̄ iyịp.”
Osụk edi tụhi tụhi usenubọk ke ini ẹdade Jesus ẹka okụre andikara. Edi mme Jew ẹmi ẹsan̄ade ye enye imaha ndibe ndụk sia mmọ ẹnịmde ẹte ke orụk editịm mmehe ntre ye mme Gentile eyesabade mmimọ. Ntre man ekem ye uduak mmọ, Pilate ọwọrọ edi. Enye obụp ete, “Mbufo ẹtịn̄ nso ẹdian owo emi?”
Mmọ ẹbọrọ ẹte, “Edieke owo emi mîkpedịghe anamidiọk, nnyịn ikpadaha Enye idisịn fi ke ubọk.”
Ke oyomde nditre ndisịn idem, Pilate ọbọrọ ete: “Ẹda Enye ke idem mbufo ẹkekpe ikpe Esie, nte ibet mbufo asan̄ade.”
Ke ẹyararede uduak uwotowo mmọ, mme Jew ẹdọhọ ẹte: “Nnyịn inyeneke unen ndiwot owo.” Ke akpanikọ, edieke mmọ ẹwotde Jesus ke ini Usọrọ Passover, anaedi oro ekpesịn ndutịme ke otu mbio obio, sia ediwak owo ẹkponode Jesus etieti. Edi edieke mmọ ẹdikemede ndinam mbon Rome ẹwot enye ke edori ikọ aban̄ade ukaraidem, emi eyenam mmọ ẹbọhọ nduduọhọ ke iso mme owo.
Ntre mme adaiso ido ukpono, ke mînamke ẹfiọk ẹban̄a ikpe oro mmọ ẹkebemde iso ẹkpe, emi ẹkebiomde Jesus ikpe editịn̄ ikọ esuene, idahaemi ẹtịbi nsio nsio edori ikọ efen. Mmọ ẹtịbi edori ikọ oro edide ikpehe ita ẹte: “Nnyịn imokụt owo emi nte [1] abiatde mbio obio ibuot, [2] akpan ete ẹkûnọ Caesar utomo, onyụn̄ [3] ọdọhọ ete, Imọ ke Idem Imọ idi Christ Edidem.”
Se ibehede Pilate edi edori ikọ oro nte Jesus ọdọhọ ke imọ idi edidem. Ke ntre enye ọtọn̄ọ ntak odụk ufọkubọn̄, okot Jesus, onyụn̄ obụp ete: “Nte Afo edi Edidem mme Jew?” Ke nditịn̄ ke usụn̄ efen, ndi afo amabiat ibet ke ndinam idemfo edidem ke ndin̄wana ye Caesar?
Jesus oyom ndifiọk adan̄a nte Pilate okopde n̄kpọ aban̄a enye, ntre enye obụp ete: “Nte afo etịn̄ emi ke idemfo; m̀mê mmọ efen ẹtịn̄ emi ẹnọ fi ẹban̄a Mi?”
Pilate ọdọhọ ke imọ ifiọkke n̄kpọ ndomokiet iban̄a enye onyụn̄ oyom ndifiọk se idide akpanikọ. Enye ọbọrọ ete, “Nte ndi Jew? Ikọt Fo ye ikpọ oku ẹkeda Fi ẹsịn mi ke ubọk: akanam nso?”
Jesus ke baba usụn̄ kiet idomoke ndifep eneni oro, emi edide eke itie edidem. Ibọrọ oro Jesus ọnọde idahaemi nte eyịghe mîdụhe akpa Pilate idem. Luke 22:66–23:3; Matthew 27:1-11; Mark 15:1; John 18:28-35; Utom 1:16-20.
▪ Ke nso uduak ke Sanhedrin afiak osop idem ke usenubọk?
▪ Didie ke Judas akpa, ndien nso ke ẹda mbak silver 30 oro ẹnam?
▪ Utu ke mmọ ndiwot enye ke idemmọ, ntak emi mme Jew ẹyomde mbon Rome ẹwot Jesus?
▪ Mme edori ikọ ewe ke mme Jew ẹdori Jesus?