Ibuot 122

Ọkpọn̄ Pilate Ebịne Herod Onyụn̄ Afiak Edi

OKPOSỤKEDI Jesus mîdomoke ndidịp Pilate nte ke imọ idịghe edidem, enye anam an̄wan̄a nte ke Obio Ubọn̄ imọ idịghe n̄kpọndịk inọ Rome. Jesus ọdọhọ ete, “Obio Ubọn̄ Mi idịghe eke ererimbot emi: edieke Obio Ubọn̄ Mi ekpedide eke ererimbot emi, ikọt Mi ẹkpen̄wana en̄wan, mbak ẹdiyak Mi ẹsịn mme Jew ke ubọk: edi Obio Ubọn̄ Mi itoho do.” Jesus ke ntre onyịme utịm ikata ete ke imọ imenyene Obio Ubọn̄, okposụkedi mîdịghe eke isọn̄.

Edi, Pilate akaiso akpak enye ete: “Nte Afo edi edidem nan̄a?” Oro edi, nte afo edi edidem idem okposụkedi Obio Ubọn̄ fo mîdịghe eke ererimbot emi?

Jesus anam Pilate ọfiọk ete ke enye amanam nnennen ubiere, ọbọrọde ete: “Omotịm etịn̄ ete ndi Edidem. N̄kamana kaban̄a ntak emi, n̄konyụn̄ ndụk ke ererimbot kaban̄a n̄kpọ emi, man ndi ntiense nnọ akpanikọ. Kpukpru mmọ eke ẹdide eke akpanikọ ẹkop uyo Mi.”

Ih, edidu oro Jesus odude ke isọn̄ edi man etie ntiense ọnọ “akpanikọ,” akpan akpan akpanikọ aban̄ade Obio Ubọn̄ esie. Jesus eben̄e idem ndisọn̄ọ nda nnọ akpanikọ oro idem ọkpọkọm oro akpa enye uwem esie. Okposụkedi Pilate obụpde ete: “Nsidi akpanikọ?” enye idaha ibet n̄kaiso edinam an̄wan̄a. Se enye okopde ekem ndinọ ubiereikpe.

Pilate afiak etiene otuowo ẹbetde ke an̄wa ufọkubọn̄. Nte an̄wan̄ade ye Jesus ke n̄kan̄ esie, enye ọdọhọ ikpọ oku ye mbon oro ẹbude ye mmọ ete: “Ami n̄kwe Enye idiọk ke idem.”

Ke ẹyatde esịt ke ntak ubiere emi, otuowo ẹsọn̄ọ ẹyịre ẹte: “Enye obụbede mbio obio, ekpep mmọ n̄kpọ ke ofụri Judea, ọtọn̄ọ ke Galilee osịm ebiet emi.”

Anaedi ifiopesịt unana ekikere eke mme Jew anam idem akpa Pilate. Ntre, nte ikpọ oku ye mbiowo ẹkade iso ndifiori, Pilate ọwọn̄ọde ese Jesus onyụn̄ obụp ete: “Nte ukopke adan̄a ediwak n̄kpọ eke mmọ ẹtịn̄de ẹdian Fi?” Edi, Jesus idomoke ndibọrọ. Ndopuyo esie ke iso afai afai edori ikọ anam Pilate eyịk.

Ke ọfiọkde ete ke Jesus edi eyen Galilee, Pilate okụt usụn̄ ndisio idemesie mfep ke nduduọhọ. Andikara Galilee, Herod Antipas (eyen Akamba Herod), odu ke Jerusalem kaban̄a Passover, ntre Pilate ọnọ Jesus ẹsọk enye. Mbemiso emi, Herod Antipas ama anam ẹbịghi John Andinịm owo baptism ibuot, ndien ekem Herod okop ndịk ke ini enye okopde aban̄a mme utịbe utom oro Jesus anamde, efehede ndịk nte ke Jesus ekenen̄ede edi John oro ẹnamde eset ke n̄kpa.

Idahaemi, Herod enen̄ede okop idatesịt ke idotenyịn ndikụt Jesus. Emi idịghe koro enye enyenede udọn̄ aban̄a mfọnọn̄kpọ Jesus mîdịghe nte ke enye oyom ndidomo ndifiọk m̀mê ikọ eke ẹdoride enye edi akpanikọ m̀mê idịghe. Utu ke oro, enye n̄kukụre enyene udọn̄ onyụn̄ odori enyịn ndikụt Jesus anamde ndusụk utịben̄kpọ.

Nte ededi, Jesus esịn ndiyụhọ udọn̄ Herod. Ke akpanikọ, nte Herod obụpde enye mbụme, enye itịn̄ke ndomo ikọ kiet. Sia idotenyịn esie akpade mfụhọ, Herod ye mbonekọn̄ ukpeme esie ẹda Jesus ẹnam mbubru. Mmọ ẹsịne enye nyayama ọfọn̄ ẹnyụn̄ ẹsak enye nsahi. Ekem mmọ ẹfiak ẹnọ enye ẹsọk Pilate. Nte utịp, Herod ye Pilate, ẹmi ke akpa ẹkesuade kiet eken, ẹkabade ẹdi ata ufan.

Ke ini Jesus afiakde edi, Pilate okot ikpọ oku, mme andikara Jew, ye mbio obio obon ọtọkiet onyụn̄ ọdọhọ ete: “Mbufo ẹkeda owo emi ẹsọk mi nte owo eke abiatde mbio obio ibuot: ndien sese, n̄kodomo Enye ke iso mbufo, edi n̄kwe baba idiọkn̄kpọ kiet ke Idem Esie mban̄a mme ikọ eke mbufo ẹdoride Enye. Herod inyụn̄ ikwe: koro ọnọ Enye ẹfiak ẹsọk nnyịn; ndien sese, Enye inamke baba n̄kpọ kiet eke odotde n̄kpa. Mmọdo nyemia Enye, nnyụn̄ nsana Enye nyak.”

Ntem, Pilate etịn̄ utịm ikaba ete ke Jesus iduehe isop. Ọdọn̄ enye ndisana Jesus nyak, koro enye ọfiọkde ete ke edi n̄kukụre ke ntak isịnenyịn anam mme oku ẹyak enye ẹnọ. Nte Pilate akade iso odomo ndisana Jesus nnyak, enye ọbọ ọkpọsọn̄ n̄kpọ nsịnudọn̄ efen ndinam ntre. Ke adan̄aemi etiede ke itie ikpe esie, n̄wan esie ọnọ etop edi, akpakde enye ete: “Kûsan̄a n̄kpọ ye eti owo emi; koro mma n̄kụt etieti ke ndap [nte an̄wan̄ade otode Abasi] mfịn emi mban̄a Enye.”

Edi, didie ke Pilate ekeme ndisana anana-ndudue owo emi nnyak, nte enye ọfiọkde ete ke akpana imọ inam? John 18:​36-38; Luke 23:​4-16; Matthew 27:​12-14, 18, 19; 14:​1, 2; Mark 15:​2-5.

▪ Didie ke Jesus ọbọrọ mbụme aban̄ade itie edidem esie?

▪ Nso idi “akpanikọ” emi Jesus akabiatde uwem esie eke isọn̄ nditie ntiense mban̄a?

▪ Nso idi ubiereikpe Pilate, didie ke mme owo ẹnam n̄kpọ, ndien nso ke Pilate anam Jesus?

▪ Anie edi Herod Antipas, ntak emi enye enen̄erede okop idatesịt ndikụt Jesus, ndien nso ke enye anam Jesus?

▪ Ntak emi ọdọn̄de Pilate ndisana Jesus nnyak-a?