Ikpehe 5
Uwem Enyene Akwa Uduak
1, 2. Didie ke nnyịn ikeme nditịn̄ ke Abasi ekere aban̄a nnyịn, ndien m̀mọ̀n̄ ke nnyịn ikpọwọn̄ọde ibịne kaban̄a ibọrọ mme mbụme ẹban̄ade uwem?
1 Usụn̄ oro ẹkenamde isọn̄ ye mme oduuwem n̄kpọ esie owụt ke Andibot mmọ edi Abasi ima oro enen̄erede ekere aban̄a. Ndien Ikọ esie, kpa Bible, owụt ete ke enye ekere aban̄a; enye ọnọ nnyịn mme ata nnennen ibọrọ kaban̄a mme mbụme ẹmi: Ntak emi nnyịn idude mi ke isọn̄-ọ? ye, M̀mọ̀n̄ ke nnyịn ika?
2 Oyom nnyịn idụn̄ọde Bible iyom mme ibọrọ oro. Ikọ Abasi ọdọhọ ete: “Edieke mbufo ẹdiyomde enye, mbufo ẹyekụt enye; edi edieke mbufo ẹdikpọn̄de enye, enye eyekpọn̄ mbufo.” (2 Chronicles 15:2) Ntre ndien, nso ke edidụn̄ọde Ikọ Abasi ayarade aban̄a uduak esie kaban̄a nnyịn?
Ntak Emi Abasi Okobotde Owo
3. Ntak emi Abasi okobotde isọn̄-ọ?
3 Bible owụt ete ke Abasi okotịm isọn̄ akpan akpan ye mme owo ke ekikere. Isaiah 45:18 ọdọhọ kaban̄a isọn̄ ete ke Abasi “ibotke enye ke ikpîkpu, [edi] obot enye man ẹdụn̄ ke esịt.” Ndien enye ama esịn kpukpru n̄kpọ oro mme owo ẹyomde ke isọn̄, idịghe man ẹkam ẹdu uwem, edi man ẹdara uwem ọyọhọ ọyọhọ.—Genesis, ibuot 1 ye 2.
4. Ntak emi Abasi okobotde mme akpa owo?
4 Ke Ikọ esie, Abasi etịn̄ aban̄a edibot oro ẹbotde mme akpa owo, Adam ye Eve, onyụn̄ ayarade se enye ekenyenede ke ekikere ọnọ ekpụk ubonowo. Enye ọkọdọhọ ete: “Ẹyak nnyịn inam owo isịn ke mbiet nnyịn, etie nte nnyịn: yak mmọ ẹnyụn̄ ẹkara iyak ke akamba mmọn̄, ye inuen ke enyọn̄, ye ufene, ye ofụri isọn̄, ye kpukpru mme andinyọni eke ẹnyọnide ke isọn̄.” (Genesis 1:26) Mme owo ẹkenyene ndise mban̄a “ofụri isọn̄” ye mme edibotn̄kpọ esie ẹdide unam.
5. M̀mọ̀n̄ ke ẹkenịm mme akpa owo oro?
5 Abasi ama anam akamba, mbiet in̄wan̄ inemesịt ke ikpehe oro ẹkotde Eden, emi odude ke Ufọt Ufọt Edem Usiahautịn. Ekem enye “ada owo oro edinịm ke in̄wan̄ Eden, ete ọdiọn̄ enye onyụn̄ ekpeme enye.” Enye ekedi paradise oro ọkọdọn̄ọde kpukpru se mme akpa owo oro ẹkeyomde ndidia. Ndien enye ama esịne “kpukpru eto eke enemde ndise ẹnyụn̄ ẹfọnde ndidia,” ọkọrọ ye mme ikọn̄ eken ye ediwak ndiye orụk unam.—Genesis 2:7-9, 15.
6. Ẹkebot owo ye mme edu ekikere ye eke ikpọkidem ewe?
6 Ẹkebot ikpọkidem mme akpa owo oro ẹdi mfọnmma, man mmọ ẹdidọn̄ọ, ẹdisọn̄, m̀mê ẹdikpa. Ẹma ẹnọ mmọ mme edu en̄wen n̄ko, utọ nte eke ifụre umek n̄kpọ. Ẹnam usụn̄ oro ẹkenamde mmọ an̄wan̄a ke Genesis 1:27 ẹte: “Abasi obot owo esịn ke mbiet esiemmọ, ke mbiet Abasi ke obot enye; eren ye n̄wan ke obot mmọ.” Sia ẹbotde nnyịn ke mbiet Abasi, owo ikọnọhọ nnyịn mme edu ikpọkidem ye eke ekikere kpọt edi n̄ko eke ido uwem ye eke spirit, ndien ana ẹyụhọ mmọemi edieke nnyịn iyomde ndikop ata inemesịt. Abasi ọmọnọ usụn̄ ndida nyọhọ mme udọn̄ oro ọkọrọ ye udọn̄ udia, mmọn̄, ye ofụm. Nte Jesus Christ ọkọdọhọde, “idịghe uyo ikpọn̄ ke owo edida idu uwem, edi edida kpukpru ikọ eke ẹwọrọde Abasi ke inua odu.”—Matthew 4:4.
7. Nso ewụhọ ke ẹkenọ akpa owo iba oro?
7 Akan oro, Abasi ama ọnọ akpa owo iba oro utịbe utịbe ewụhọ ke adan̄aemi mmọ ẹkedude ke Eden ete: “Mbufo ẹtọt, ẹnyụn̄ ẹwak, ẹnyụn̄ ẹyọhọ ke isọn̄.” (Genesis 1:28) Ntre mmọ ẹkpekeme nditọt nnyụn̄ nsion̄o mfọnmma nditọ ndi. Ndien nte ibatowo ọkpọkọride, mmọ ẹkpenyene inem inem utom eke editat mme adan̄a akpa mbiet in̄wan̄ inemesịt oro, kpa ikpehe paradise eke Eden. Ke akpatre, ofụri isọn̄ akpakabade edi paradise, oro mme mfọnmma owo oro ẹkopde inemesịt oro ẹkpekemede ndidu uwem ke nsinsi ẹkpedụn̄de. Bible asian nnyịn ete ke enye ama ọkọnọ kpukpru n̄kpọ ẹmi ntọn̄ọ, “Abasi okụt kpukpru se enye akanamde, ndien, sese ẹfọn etieti.”—Genesis 1:31; se n̄ko Psalm 118:17.
8. Didie ke akana mme owo ẹse ẹban̄a isọn̄?
8 Ana in̄wan̄în̄wan̄ nte ke akana mme owo ẹda isọn̄ oro mmọ ẹkarade ẹnam n̄kpọ ke ufọn mmọ. Edi ẹkenyene ndinam emi ke usụn̄ oro enende. Akana mme owo ẹdi mme andikpeme isọn̄ ẹmi ẹwụtde ukpono, idịghe mme andisobo enye. Edisobo oro ẹsobode isọn̄ oro nnyịn ikụtde mfịn atuaha ye uduak Abasi, ndien mbon oro ẹbuanade ke enye ẹnam se idide isio ye uduak uwem ke isọn̄. Mmọ ẹyekpe utịp kaban̄a oro, koro Bible ọdọhọ ete ke Abasi “[eyesobo] mmọemi ẹsobode isọn̄.”—Ediyarade 11:18.
Osụk Edi Uduak Abasi
9. Ntak emi nnyịn inyenede mbuọtidem nte ke uduak Abasi eyesu-o?
9 Ntem, toto ke editọn̄ọ ekedi uduak Abasi mfọnmma ekpụk ubonowo ndidụn̄ ke isọn̄ ke nsinsi ke paradise. Ndien osụk ededi uduak esie! Ye unana edikpu, ẹyesu uduak oro. Bible ọdọhọ ete: “Jehovah mme udịm ọmọn̄wọn̄ọ, ete, Iditreke ndiwọrọ kpa nte n̄kekerede; onyụn̄ osu kpa nte n̄kaduakde.” “N̄kọm mma ndọhọ, nyenyụn̄ nnam enye edi n̄ko; mma mbot nyenyụn̄ nnam enye.”—Isaiah 14:24; 46:11.
10, 11. Didie ke Jesus, Peter, ye David andiwet psalm ẹketịn̄ ẹban̄a Paradise?
10 Jesus Christ ama etịn̄ aban̄a uduak Abasi ndifiak n̄wụk paradise ke isọn̄ ke ini enye akasiande eren kiet oro okoyomde idotenyịn kaban̄a ini iso ete: “Afo eyedu ye Ami ke Paradise.” (Luke 23:43) Apostle Peter n̄ko ama etịn̄ aban̄a obufa ererimbot oro edidide ke ini enye ekebemde iso etịn̄ ete: “Nnyịn itie ibet obufa enyọn̄ [obufa ndutịm ukara oro akarade oto heaven] ye obufa isọn̄ [obufa n̄kaowo ke isọn̄], nte un̄wọn̄ọ [Abasi] edide; ndien edi do ke edinen ido edidụn̄.”—2 Peter 3:13.
11 David andiwet psalm ama ewet n̄ko aban̄a obufa ererimbot oro edide ye adan̄a nte enye edibịghide. Enye ama ebem iso etịn̄ ete: “Nti owo ẹyeda isọn̄ ẹnyene, ẹnyụn̄ ẹdụn̄ ke esịt ke nsinsi.” (Psalm 37:29) Oro edi ntak emi Jesus ọkọn̄wọn̄ọde ete: “Ọfọfọn ọnọ mmọ eke ẹnyenede ifụre ifụre ido: koro mmọ ẹyeda isọn̄ ẹnyene.”—Matthew 5:5.
12, 13. Tịn̄ ibio ibio ban̄a akwa uduak Abasi kaban̄a ubonowo.
12 Nso akwa idotenyịn ke oro edi ntem, ndidu uwem ke nsinsi ke paradise isọn̄ oro ọbọhọde kpukpru idiọkido, ubiatibet, udọn̄ọ, mfụhọ, ye ubiak! Ke akpatre n̄wed Bible, ntịn̄nnịm Ikọ Abasi etịn̄ akwa uduak emi ibio ibio ke ndidọhọ: “[Abasi] eyekwọhọde kpukpru mmọn̄eyet ke enyịn mmọ efep. N̄kpa idinyụn̄ idụhe aba; eseme ye ntuan̄a ye ubiak idinyụn̄ idụhe aba; koro ebeiso n̄kpọ ẹma ẹbe ẹfep.” Enye adian do ete: “Anditie ke ebekpo onyụn̄ ọdọhọ ete, Sese, mmanam kpukpru n̄kpọ ẹdi mbufa. Enye onyụn̄ ọdọhọ ete, Wet: koro mme ikọ ẹmi ẹdi akpanikọ ye se owo okponịmde.”—Ediyarade 21:4, 5.
13 Ih, Abasi enyene akwa uduak ke ekikere. Enye edidi obufa ererimbot edinen ido, kpa nsinsi paradise, emi Enyeemi ekemede edinyụn̄ anamde se enye ọn̄wọn̄ọde, ekebemde iso etịn̄, koro “ikọ” esie “ẹdi akpanikọ ye se owo okponịmde.”
[Mme ndise ke page 20, 21]
Abasi akaduak ete mme owo ẹdụn̄ ke nsinsi ke paradise isọn̄. Oro osụk ededi uduak esie
[Ndise ke page 22]
Enyeneufọk ekeme ndidọhọ mme odudụn̄ oro ẹbiatde ufọk esie ẹdinam ibat