Ikpehe 7
Uduak Abasi Oro Ẹdikụtde ke Mîbịghike
1, 2. Ntak emi nnyịn ikemede ndinịm ke akpanikọ nte ke Abasi eyenam n̄kpọ ndida utịt nsọk idiọkido ye ndutụhọ?
1 Okposụkedi Abasi ayakde unana mfọnmma ye ndutụhọ odu ke anyanini ke idaha usen̄kpọ owo, enye idiyakke mme idiọk idaha ẹkaiso ke nsinsi. Bible asian nnyịn ete ke Abasi enyene akpan ikpehe ini ke ndiyak mme n̄kpọ ẹmi ẹtịbe.
2 “Ẹmenịm ini ẹnọ kpukpru n̄kpọ.” (Ecclesiastes 3:1) Ke ini oro Abasi onịmde ke ndiyak idiọkido ye ndutụhọ odu osịmde utịt, adan̄aoro enye eyesịbe odụk mme mbubehe owo. Enye eyeda utịt ọsọk idiọkido ye ndutụhọ eyenyụn̄ osu akpa uduak esie ndinam isọn̄ ọyọhọ ye mfọnmma, okop inemesịt ekpụk ubonowo oro ẹdarade ọyọhọ emem ye ifụre ndutịm uforo ke ufọt mme idaha Paradise.
Ubiereikpe Abasi
3, 4. Didie ke n̄wed Mme N̄ke etịn̄ aban̄a mme utịp edisịbe oro Abasi edisịbede odụk?
3 Tịmfiọk ibat ibat ke otu ediwak prọfesi Bible ẹmi ẹtịn̄de se Abasi ndisịbe ndụk, oro edi, utịp ubiereikpe esie, ediwọrọde ke mîbịghike ọnọ ekpụk ubonowo:
4 “Mbon edinen ido ẹyedụn̄ ke obio, mmọ eke ẹfọnde ẹma ẹyenyụn̄ ẹbịghi ke esịt. Edi ẹyesobo mme idiọkowo ke isọn̄ ẹfep, ẹnyụn̄ ẹsọhi mbon abian̄a ẹfep ke esịt.”—Mme N̄ke 2:21, 22.
5, 6. Didie ke Psalm 37 owụt se iditịbede ke ini Abasi edisịbede odụk?
5 “Ẹyekpok mme idiọkowo ẹfep: edi mmọ eke ẹbetde Jehovah ẹyeda isọn̄ ẹnyene. Koro osụk esisịt idiọkowo ididụhe . . . Edi mbon nsụkidem ẹyeda isọn̄ ẹnyene; ediwak emem ẹyenyụn̄ enem mmọ esịt.”—Psalm 37:9-11.
6 “Bet Jehovah, nyụn̄ nịm ido esie, ndien enye eyemenede fi onịm ke enyọn̄, man ada isọn̄ enyene. [Ke ini ẹdikpokde mme idiọkowo ẹfep, afo eyekụt, NW.] Tịn̄ enyịn ke owo eke ọfọnde ama, nyụn̄ se edinen owo: koro eti utịt anade ọnọ owo emem. Ẹyenyụn̄ ẹsobo mme idiọkowo ọtọkiet: ẹyesịbe eti utịt mme idiọkowo ẹfep.”—Psalm 37:34, 37, 38.
7. Nso eti item ke Ikọ Abasi ọnọ nnyịn?
7 Ke ntre, ye utịbe utịbe ini iso oro edisịmde mbon oro ẹwụtde ukpono ẹnọ unen ata ọkpọsọn̄ Andibot ndikara nnyịn ke ekikere, ẹkpak nnyịn ẹte: “Yak esịt fo ekpeme mme ewụhọ mi: koro ẹyekọrọ anyan usen, ye isua uwem, ye ifụre ẹnọ fi.” Ke akpanikọ, ẹyedian nsinsi uwem ẹnọ mbon oro ẹmekde ndinam uduak Abasi! Ntem, Ikọ Abasi eteme nnyịn ete: “Buọt idemfo ye Jehovah ke ofụri esịt fo; ndien kûberi edem ke asian fo. Diọn̄ọ enye ke kpukpru usụn̄ fo, ndien enye eyenen̄ede usụn̄ fo onịm.”—Mme N̄ke 3:1, 2, 5, 6.
Abasi Akara Oto Heaven
8, 9. Nso ke Abasi edida anam isọn̄ emi asana?
8 Abasi edinam isọn̄ emi asana ebe ke mfọnn̄kan ukara oro akanam ubonowo ekemede ndinyene. Enye edi ukara oro owụtde ọniọn̄ emi otode heaven sia enye edikarade oto heaven ke idak ndausụn̄ Abasi. Ndien Obio Ubọn̄ eke heaven oro eyesio kpukpru orụk ukara owo efep ke isọn̄. Mme owo iditọn̄ọke aba ntak inyene ifet ndidomo ndida ke idem n̄kara ke ẹsiode Abasi ẹfep.
9 Ke afan̄ emi prọfesi oro ke Daniel 2:44 ọdọhọ ete: “Ke eyo ndidem oro [mme ukara eyomfịn], Abasi enyọn̄ eyenam ubọn̄ [ke heaven] eke mîdisoboke ke nsinsi, adaha ada: ndien idikpọn̄ke ubọn̄ emi inọ mbio efen [owo idiyakke aba mme owo ẹda ke idem ẹkara ke ẹsiode Abasi ẹfep]: enye eyenuak onyụn̄ ama kpukpru mme idụt ẹmi [oro ẹdude kemi], ndien enye eyeda ke nsinsi.”—Se n̄ko Ediyarade 19:11-21; 20:4-6.
10. Ntak emi nnyịn ikemede nditịm nnịm nte ke idak Obio Ubọn̄ Abasi eke heaven, ke mbiara iditọn̄ọke aba ntak idu ke itie edikara tutu amama?
10 Ntem, ubonowo iditọn̄ọke aba ntak inyene mme mbiara orụk ukara, koro ke Abasi ama akada editịm n̄kpọ emi okosịm utịt esie, ukara owo oro adade ke idem ọkpọn̄ enye ididụhe aba tutu amama. Ndien Obio Ubọn̄ oro akarade oto heaven idibiarake, sia Abasi edide Anditọn̄ọ ye Andikpeme enye. Utu ke oro, enye edinam n̄kpọ ke mfọnn̄kan ufọn mme owo oro ẹdude ke idak esie. Ẹyenam uduak Abasi adan̄aoro ke ofụri isọn̄ nte ẹnamde ke heaven. Oro edi ntak emi Jesus ekekpepde mme mbet esie ndibọn̄ akam nnọ Abasi nte: “Yak Ubọn̄ Fo edi; yak inam uduak Fo; nte ẹnamde ke heaven, yak inam ke isọn̄ kpasụk ntre.”—Matthew 6:10.
Nnyịn Isan̄a Ikpere Adan̄a Didie?
11. M̀mọ̀n̄ ke Bible ke nnyịn ikeme ndikụt mme prọfesi ẹmi ẹdin̄wamde nnyịn ndibiere adan̄a nte nnyịn isan̄ade ikpere utịt editịm n̄kpọ emi?
11 Adan̄a didie ke nnyịn isan̄a ikpere utịt editịm n̄kpọ emi mînọhọ uyụhọ mi ye ntọn̄ọ obufa ererimbot Abasi? Prọfesi Bible ọnọ nnyịn ibọrọ in̄wan̄în̄wan̄. Ke uwụtn̄kpọ, Jesus ke idemesie ama ebem iso etịn̄ aban̄a se ikpoyomde man nnyịn ikeme ndibiere idaha nnyịn ke ebuana ye, nte Bible esịnde enye, “akpatre ini eyo emi.” Ẹwet emi ẹnịm ke Matthew ibuot 24 ye 25, Mark 13, ye Luke 21. N̄ko, nte ẹkewetde ẹnịm ke 2 Timothy ibuot 3, apostle Paul ama ebem iso etịn̄ ete ke ikpehe ini emi ẹkotde “ukperedem ini” eyedu emi nsio nsio n̄kpọntịbe ẹdikade iso ndiwụt ebiet emi nnyịn idude ke ubatini.
12, 13. Nso ke Jesus ye Paul ẹketịn̄ ẹban̄a utịt ini?
12 Jesus ọkọdọhọ ke ikpehe ini emi editọn̄ọ ye mme n̄kpọntịbe ẹmi: “Idụt eyedaha an̄wana ye idụt, obio edidem kiet eyenyụn̄ adaha an̄wana ye obio edidem efen: akan̄ ye unyekisọn̄ ẹyenyụn̄ ẹdu ke nsio nsio ebiet.” (Matthew 24:7) Luke 21:11 owụt ke enye ama ọdọhọ n̄ko ke “idiọk udọn̄ọ ẹyenyụn̄ ẹdu ke nsio nsio ebiet.” Ndien enye ama ọtọt, n̄ko, aban̄a ‘ukwan̄ido nditọt.’—Matthew 24:12.
13 Apostle Paul ama ebem iso etịn̄ ete: “Edi fiọk emi, ete ndiọkeyo eyedu ke ukperedem ini. Koro mme owo ẹyedi mme ama idem, ye mme ama inyene; ẹnyụn̄ ẹbụre idiọk mbụre, ẹseri iseri, ẹsụn̄i isụn̄i, ẹsọn̄ ibuot ye ete ye eka, ẹnana esịtekọm, ẹnana uten̄e Abasi, ẹnana ima uduot owo; ẹnyụn̄ ẹbiet un̄wọn̄ọ; ẹma ẹbiari, ẹyak idiọkitọn̄ akan mmọ ubọk, ẹtie obom obom, ẹnyụn̄ ẹsua se ifọnde; mmọ ẹdi mme ada owo nnọ mme asua, ye mbon idiọk iwụk, ye mbon n̄kohodeidem; mmọ ẹma mbre ẹkan Abasi; ẹnyene enyọn̄ enyọn̄ ido uten̄e Abasi, edi isan̄ake n̄kpọ ye odudu eke odude ke uten̄e Abasi. . . . Ndiọi owo ye mbon abian̄a ẹyedọdiọn̄ ẹdiọk ẹkaiso, ẹbian̄a owo, owo ẹyenyụn̄ ẹbian̄a mmọ.”—2 Timothy 3:1-5, 13.
14, 15. Didie ke mme n̄kpọntịbe ọyọhọ isua ikie-20 emi ẹwụt ke nnyịn ke akpanikọ idu ke ukperedem ini?
14 Nte mme n̄kpọ oro Jesus ye Paul ẹkebemde iso ẹtịn̄ ẹmeda itie ke eyo nnyịn? Ih, ke akpanikọ mmọ ẹmeda itie. Ekọn̄ Ererimbot I ekedi ata ndiọk n̄kan ekọn̄ tutu osịm ini oro. Enye ekedi akpa ekọn̄ ererimbot ye ini oro n̄kpọ ọkọwọn̄ọrede ke mbụk eyomfịn. Adianade ye ekọn̄ oro ekedi unana udia, udọn̄ọ nditara, ye mme afanikọn̄ eken. Mme n̄kpọntịbe oro ọkọtọn̄ọde ke 1914 kaiso ekedi, nte Jesus ekesịnde enye, “ntọn̄ọ ubiak uman.” (Matthew 24:8) Mmọ ẹketọn̄ọ ikpehe ini oro ẹkebemde iso ẹtịn̄ ẹban̄a emi ẹkotde “ukperedem ini,” kpa ntọn̄ọ akpatre emana emi Abasi ediyakde idiọkido ye ndutụhọ ẹdu.
15 Anaedi afo ememehe ye mme n̄kpọntịbe eke ọyọhọ isua ikie-20 emi. Afo ọmọfiọk aban̄a mme ndutịme oro ẹkedemerede. Ẹmewot n̄kpọ nte owo miliọn 100 ke mme ekọn̄. Ediwak miliọn owo en̄wen ke mme itie ikie ẹmekpan̄a ẹto biọn̄ ye udọn̄ọ. Unyekisọn̄ ẹmeda anana-ibat uwem. Unana ukpono kaban̄a uwem ye inyene ọmọkọri. Ndịk ke ntak ubiatibet amakabade edi ubak uwem ofụri usen. Ẹmenụk mme idaha ido uwem ẹnịm n̄kan̄ kiet. Ibatowo ndiwak n̄kaha omonịm mme mfịna oro owo mîkọkke. Usabaden̄kpọ ke abiat uduot uwem ndien ke akam edi n̄kpọndịk ọnọ uwem. Ke akpanikọ, nnyịn idu ke ukperedem ini toto ke 1914 ndien ke isan̄a ikpere utịt mme prọfesi Bible ẹmi ẹbuanade eyo nnyịn.
16. Ikpehe ini eke ukperedem ini emi ebịghi adan̄a didie?
16 Ukperedem ini ẹmi ẹdibịghi adan̄a didie? Jesus eketịn̄ aban̄a emana oro edikụtde “ntọn̄ọ ubiak uman” emi ọkọtọn̄ọde ke 1914 kaiso ete: “Emana emi idibehe ifep tutu kpukpru n̄kpọ ẹmi ẹwọrọ ẹsu.” (Matthew 24:8, 34-36) Ntem, ana kpukpru ikpehe ukperedem ini ẹda itie ke ini uwem emana kiet, kpa emana eke 1914. Ntre ndusụk owo ẹmi ẹkedude uwem ke 1914 ẹyesụk ẹdu ke uwem ke ini editịm n̄kpọ emi edisịmde utịt esie. Emana mme owo oro aka anyan kemi etieti ke isua emana, owụtde ete ke ini oro osụhọde mbemiso Abasi adade editịm n̄kpọ oro odude kemi osịm utịt iniọn̄ke aba.
17, 18. Prọfesi ewe owụt ke nnyịn imenen̄ede ikpere utịt ererimbot emi?
17 Prọfesi efen oro owụtde ke utịt editịm n̄kpọ emi enen̄ede ekpere edi enyeoro apostle Paul ọkọnọde, emi ekebemde iso etịn̄ ete: “Usen Ọbọn̄ mọn̄ edi nte inọ ke okoneyo. Ini mme owo ẹdọhọde ẹte, idu ke emem ye ifụre, kpa adan̄aoro ke nsobo abuat mmọ . . . , ndien mmọ idikwe usụn̄ ubọhọ.”—1 Thessalonica 5:2, 3; se n̄ko Luke 21:34, 35.
18 Mfịn En̄wan Ukaraidem okụre, ndien ekọn̄ ofụri ererimbot ekeme nditre ndidi n̄kpọndịk. Ntre mme idụt ẹkeme ndikere ke mmimọ imotịm ikpere ndutịm obufa ererimbot. Edi ke ini mmọ ẹkerede ke ukeme mmimọ ẹmekụt unen, emi ediwọrọ ision̄kpọ ye se mmọ ẹkerede, koro oro edidi akpatre idiọn̄ọ nte ke nsobo editịm n̄kpọ emi ke ubọk Abasi ekpere. Ti ete, mme ediomi ye unam emem eke ukaraidem inamke ata ukpụhọde ndomokiet ke idem mme owo. Mmọ inamke mme owo ẹma kiet eken. Ndien mme adaiso ererimbot idaha utịt isọk ubiatibet, m̀mê mmọ ndisio udọn̄ọ ye n̄kpa mfep. Ntre kûbuọt idemfo ke edinam emem ye ifụre eke owo ekededi unyụn̄ ukere ke ererimbot emi odu ke idaha ndikọk mme mfịna esie. (Psalm 146:3) Se utọ mfiori oro edinen̄erede ọwọrọ edi nte ke ererimbot emi enen̄ede ekpere utịt esie.
Ndikwọrọ Eti Mbụk
19, 20. Prọfesi ewe oro abuanade edikwọrọ ikọ ke ukperedem ini ke nnyịn ikụt osude?
19 Prọfesi efen oro owụtde ke nnyịn idu ke ukperedem ini toto ke 1914 edi enyeoro Jesus ọkọnọde ete: “Ẹnyene ndibemiso n̄kwọrọ gospel nnọ kpukpru mme idụt.” (Mark 13:10) Mîdịghe nte Matthew 24:14 esịnde emi: “Ẹyenyụn̄ ẹkwọrọ gospel Ubọn̄ Abasi emi ke ofụri ekondo nte ntiense ẹnọ kpukpru mme idụt, ndien adan̄aoro ke utịt eyedi.”
20 Mfịn akan nte akanam edide ke mbụk, ẹmekwọrọ eti mbụk utịt ererimbot emi ye eke Paradise obufa ererimbot oro edide ke idak Obio Ubọn̄ Abasi ke ofụri isọn̄. Ebe ke mmanie? Ediwak miliọn Mme Ntiense Jehovah. Mmọ ẹmekwọrọ ikọ ke kpukpru idụt ke isọn̄.
21, 22. Nso, akpan akpan, ke ẹda ẹdiọn̄ọ Mme Ntiense Jehovah nte mme ata Christian?
21 Ke adianade ye edikwọrọ oro mmọ ẹkwọrọde ẹban̄a Obio Ubọn̄ Abasi, Mme Ntiense Jehovah ẹdu uwem ke ido oro anamde ẹdiọn̄ọ mmọ nte mme ata anditiene Christ, koro enye ọkọdọhọ ete: “Mbufo ẹma ẹma kiet eken, kpukpru owo ẹyeda oro ẹfiọk ẹte mbufo ẹdi mbet Mi.” Ntem, mbọbọ ima oro mîkemeke ndikịbe adian Mme Ntiense Jehovah ọtọkiet ke itie nditọete ofụri ererimbot.—John 13:35; se n̄ko Isaiah 2:2-4; N̄wed Mbon Colossae 3:14; John 15:12-14; 1 John 3:10-12; 4:20, 21; Ediyarade 7:9, 10.
22 Mme Ntiense Jehovah ẹnịm se Bible ọdọhọde ete: “Abasi iten̄eke owo enyịn: edi ke kpukpru idụt Enye adadara owo ekededi eke abakde Enye onyụn̄ anamde nti ido.” (Utom 10:34, 35) Mmọ ẹse ekemmọ Mme Ntiense mmọ ke kpukpru idụt nte nditọete iren ye iban eke spirit, ikereke iban̄a orụk m̀mê uduot. (Matthew 23:8) Ndien akpanikọ oro nte ke utọ itie nditọete ofụri ererimbot oro odu ke ererimbot mfịn adian n̄kpọ ke uyarade oro nte ke ibịghike uduak Abasi ọmọn̄ ada itie.
[Ndise ke page 26]
Mfọnmma Obio Ubọn̄ Abasi eke heaven edidi n̄kukụre itie edikara ubonowo ke obufa ererimbot