Ikpehe 8
Du Uwem ke Nsinsi ke Paradise Isọn̄
1, 2. Uwem editie didie ke idak ukara Obio Ubọn̄ Abasi?
1 Uwem editie didie ke ini Abasi osiode idiọkido ye ndutụhọ efep ke isọn̄ onyụn̄ adade obufa ererimbot edi ke idak ima ima ukara Obio Ubọn̄ esie eke heaven? Abasi ọn̄wọn̄ọ ‘nditat ubọk esie, nnyụn̄ nnọ kpukpru mme andidu uwem se mmọ ẹmade, ẹyụhọ.’—Psalm 145:16.
2 Nso idi mme ata udọn̄ fo? Nte idịghe kaban̄a inem inem uwem, eti utom, uwak n̄kpọ obụkidem, ndiye n̄kann̄kụk, emem ke ufọt kpukpru owo, ye edibọhọ ukwan̄ikpe, udọn̄ọ, ndutụhọ, ye n̄kpa? Ndien nso kaban̄a idara idara idotenyịn eke spirit? Ẹyekụt kpukpru n̄kpọ oro ke mîbịghike ke idak itie edikara Obio Ubọn̄ Abasi. Tịmfiọk se mme prọfesi Bible ẹtịn̄de ẹban̄a mme utịbe utịbe edidiọn̄ oro ẹdidide ke obufa ererimbot oro.
Ubonowo Odu ke Mfọnmma Emem
3-6. Nso un̄wọn̄ọ ke nnyịn inyene nte ke mme owo ẹyenyene emem ke obufa ererimbot?
3 “[Abasi] anam ekọn̄ etre tutu osịm ke utịt ekondo; eyebụn̄ utịgha, onyụn̄ osịbe eduat: eyenyụn̄ ọfọp mme chariot [ekọn̄] ke ikan̄.”—Psalm 46:9.
4 “Mmọ ẹyeda ofụt mmọ ẹdom n̄kpọ ufụn̄isọn̄, ẹda eduat mmọ ẹdom ikwa udiọn̄ vine: idụt idimenke ofụt itiene idụt, mmọ idinyụn̄ ikpepke aba ekọn̄.”—Isaiah 2:4.
5 “Mbon nsụkidem ẹyeda isọn̄ ẹnyene; ediwak emem ẹyenyụn̄ ẹnem mmọ esịt.”—Psalm 37:11.
6 “Ofụri ekondo ke ana sụn̄, ọduọk odudu; mmọ ẹsio n̄kpo idara.”—Isaiah 14:7.
Owo ye Mme Unam Ẹdu ke Emem
7, 8. Nso emem edidu ke ufọt mme owo ye mme unam?
7 “Wolf eyedụn̄ ye eyenerọn̄, nawụriekpe eyenyụn̄ osụhọde ana ye eyen ebot: eyen enan̄, ye abak lion, ye enan̄ ubom, ẹyenyụn̄ ẹna ọtọkiet: ekpri eyenọwọn̄ eyenyụn̄ akama mmọ. Ndien uman enan̄ ye bear ẹyeta mbiet; nditọ mmọ ẹyesụhọde ẹna ọtọkiet: lion eyenyụn̄ ata nnyanyan̄a nte enan̄. Ndien eyennsek eyebre mbre ke enyọn̄ odudu okụn̄, eyen emi adahade ke eba eyenyụn̄ ada ubọk esie odori odudu ibọm. Mmọ idinamke idiọk, idinyụn̄ ibiatke n̄kpọ.”—Isaiah 11:6-9.
8 “Ke usen oro ke ndidiomi ediomi ye unam ikọt, ye inuen enyọn̄, ye ọnyọni isọn̄, nnọ mmọ . . . nnyụn̄ nyak mmọ ẹna ke isọn̄ ke ifụre.”—Hosea 2:18.
Mfọnmma Nsọn̄idem, Nsinsi Uwem
9-14. Tịn̄ nte mme idaha nsọn̄idem editiede ke obufa ererimbot.
9 “Ndien enyịn ẹyen̄wan̄a mme nnan, utọn̄ ẹyenyụn̄ ẹsịrede mbon inan. Ndien mbụn̄ọ eyenek nte edop, edeme imụm eyenyụn̄ ọkwọ.”—Isaiah 35:5, 6.
10 “[Abasi] eyekwọhọde kpukpru mmọn̄eyet ke enyịn mmọ efep. N̄kpa idinyụn̄ idụhe aba; eseme ye ntuan̄a ye ubiak idinyụn̄ idụhe aba.”—Ediyarade 21:4.
11 “Andidụn̄ ididọhọke ite, Ndọdọn̄ọ.”—Isaiah 33:24.
12 “Obụkidem esie akabade nsek akan eke eyenọwọn̄: enye eyefiak ke mme usen uyen esie.”—Job 33:25.
13 “Enọ Abasi edi nsinsi uwem ke Christ Jesus Ọbọn̄ nnyịn.”—Rome 6:23.
14 “Owo ekededi eke ọbuọtde idem ye Enye . . . [eyenyene] nsinsi uwem.”—John 3:16.
Ẹnam Mme Akpan̄kpa Ẹfiak Ẹnyene Uwem
15-17. Nso idotenyịn idu inọ mbon oro ẹma ẹkekpa?
15 “Nti owo ye mme idiọkowo ẹyeset ke n̄kpa.”—Utom 24:15.
16 “Ini ke edi eke kpukpru mme andidu ke udi [ibuot uti n̄kpọ Abasi] ẹdikopde Enye uyo ẹwọn̄ọ ẹdi.”—John 5:28, 29.
17 “Inyan̄ibom asana mme akpan̄kpa ẹmi ẹdude ke esịt ayak; n̄kpa ye obio ekpo [udi] ẹnyụn̄ ẹsana mme akpan̄kpa mmọ ẹyak.”—Ediyarade 20:13.
Isọn̄, kpa Paradise Eduek
18-22. Ẹdiwọn̄ọde ofụri isọn̄ ẹsịn ke nso?
18 “Edịm nti n̄kpọ eyedu. Ndien eto ikọt eyenọ mfri esie, isọn̄ eyenyụn̄ on̄wụm n̄kpọ esie, ndien mmọ ẹyedu ke isọn̄ mmọ ke ifụre.”—Ezekiel 34:26, 27.
19 “Isọn̄ omon̄wụm mbun̄wụm esie; Abasi, kpa Abasi nnyịn eyediọn̄ nnyin.”—Psalm 67:6.
20 “Wilderness ye nsatisọn̄ ẹyedara; desert eyenyụn̄ ebre, onyụn̄ asiaha ikọn̄ nte rose.”—Isaiah 35:1.
21 “Ikpọ obot ye n̄kpri ẹyebụmede ẹkwọ ke iso mbufo, kpukpru eto akai ẹyenyụn̄ ẹkwak ubọk. Cypress ẹyetịbe ke itie akpap, myrtle ẹyetịbe ke itie n̄kukịm.”—Isaiah 55:12, 13.
22 “Afo eyedu ye Ami ke Paradise.”—Luke 23:43.
Eti Ufọk Odu Ọnọ Kpukpru Owo
23, 24. Nso un̄wọn̄ọ ke nnyịn inyene nte ke eti ufọk eyedu ọnọ kpukpru owo?
23 “Mmọ ẹyebọp ufọk ẹnyụn̄ ẹdụn̄ ke esịt . . . Mmọ idibọpke, ndien owo en̄wen odụn̄; iditọhọ, ndien owo efen adia: . . . edimek ikọt mi ẹyedia se ubọk mmọ ẹnamde. Mmọ idinamke utom ke ikpîkpu, idinyụn̄ imanke nditọ inọ n̄kpọndịk.”—Isaiah 65:21-23.
24 “Mmọ ẹyetie ke idak vine mmọ ye ke idak fig mmọ; ndien baba owo kiet eke edinamde mmọ ndịk ididụhe.”—Micah 4:4.
Afo Emekeme Ndidu Uwem ke Nsinsi ke Paradise
25. Nso utịbe utịbe idotenyịn ke nnyịn inyene kaban̄a ini iso?
25 Nso utịbe utịbe idotenyịn kaban̄a ini iso! Nso ata uduak ke uwem ekeme ndinyene idahaemi ntem ke ini ọkọn̄ọde ke ata eti idotenyịn nte ke obufa ererimbot Abasi ke kpukpru mfịna ẹmi ẹdude mfịn ẹdidi n̄kpọ eset ke nsinsi! “Owo iditịhi aba akpa oro, idinyụn̄ idụkke owo ke esịt.” (Isaiah 65:17) Ndien edi n̄kpọ ndọn̄esịt didie ntem ndifiọk nte ke uwem adan̄aoro edidi ke nsinsi: “[Abasi] eyemen n̄kpa ke nsinsi.”—Isaiah 25:8.
26. Nso idi ukpọhọde edidu uwem ke nsinsi ke obufa ererimbot Abasi?
26 Nte afo omoyom ndidu uwem ke nsinsi ke Paradise obufa ererimbot oro otịmde ekpere kemi mi? Afo emekeme ndibụp ete, ‘Nso ke oyom ami nnam man nnyene mfọn Abasi ke utịt ererimbot emi nnyụn̄ ndu uwem mbe ndụk obufa ererimbot esie?’ Oyom afo anam se Jesus okowụtde ke akam oro ọkọbọn̄de ọnọ Abasi ete: “Nsinsi uwem oro edi ndifiọk Fi, ata Abasi kierakiet, ye Enyeemi Afo ọkọdọn̄de, kpa Jesus Christ.”—John 17:3.
27. Nso ke ana afo anam man abuana ke uduak Abasi?
27 Ke ntre, nyene Bible, nyụn̄ sọn̄ọ se afo okotde ke ekpri ediye uduot n̄wed emi. Yom mbon efen oro ẹdụn̄ọde ẹnyụn̄ ẹkpepde owo mme akpanikọ Bible ẹmi. Kịbe bọhọ mme mbubịk mbubịk ido ukpono oro ẹkpepde ẹnyụn̄ ẹnamde mme n̄kpọ ẹmi ẹtuahade ye Bible. Kpep nte afo, ke adianade ye ediwak miliọn mbon efen oro ẹma ẹkenanam uduak Abasi, ẹkemede ndibuana ke uduak Abasi nte mme owo ẹdu uwem ke nsinsi ke paradise isọn̄. Nyụn̄ da se Ikọ Abasi eke odudu spirit etịn̄de aban̄a n̄kpet n̄kpet ini iso ke akpan n̄kpọ: “Ererimbot ke ebebe efep, ye mbumek esie; edi owo eke anamde se Abasi amade ododu ke nsinsi.”—1 John 2:17.
[Ndise ke page 31]
Ibịghike ẹyekụt uduak Abasi ndifiak n̄wụk paradise ke isọn̄