Ata Idotenyịn Mme Akpan̄kpa

EYENAN̄WAN kiet edide isua ekewet ete: “Ke 1981 cancer ama owot eka oro ekemende mi akama. N̄kpa esie ama otụk mi ke idem ata idiọk idiọk ye eyeneka mi eren oro ẹkemende-men ẹkama. Ami n̄kedi isua 17, ndien eyenekami eren ekedi 11. Mma ntaba enye ata etieti. Ke ẹma ẹkekpep mi ẹte ke enye okodu ke heaven, ih, ami mma nyom ndiwot idemmi man n̄kodu ye enye. Enye ekedi ata ufan mi.”

N̄kpa ndinyene odudu ndida owo oro afo amade etie nte ọdiọk akaha. Ndien ke ini oro otịbede, ekikere oro nte ke afo tutu amama udutịn̄ke ikọ, usakke imam, m̀mê umụmke owo ima fo ubọk aba ekeme ndidi ata ọkpọsọn̄ n̄kpọ ndiyọ. Owo isimenke ubiak oro ifep ke ndidọhọ fi nte ke owo ima fo odu ko ke heaven.

Nte ededi, Bible ọnọ ata isio isio idotenyịn. Nte nnyịn ikokụtde ke mbemiso, N̄wed Abasi owụt ete ke emekeme ndifiak ndiana kiet ye owo ima fo oro akakpade ke n̄kpet n̄kpet ini iso, idịghe ke heaven emi owo mîfiọkke edi mi ke isọn̄ emi ke idak emem emem ndinen idaha. Ndien ke ini oro mme owo ẹyenyene idotenyịn edidara mfọnmma nsọn̄idem, ndien mmọ idinyeneke ndikpa aba tutu amama. Ndusụk owo ẹkeme ndidọhọ ẹte, ‘Edi oro ke akpanikọ edi se ẹkerede-kere!’

Nso ke oyom man afo onịm ke akpanikọ ete emi edi ata idotenyịn? Man onịm un̄wọn̄ọ ke akpanikọ, oyoyom afo onịm ke akpanikọ ete ke enyeemi ọn̄wọn̄ọde un̄wọn̄ọ oro aduak onyụn̄ ekeme ndisu oro. Anie, ndien, edi enyeemi ọn̄wọn̄ọde ke mme akpan̄kpa ẹyefiak ẹdu uwem?

Ke ini utọ eke 31 E.N., Jesus Christ ama ọn̄wọn̄ọ uko uko ete: “Nte Ete anamde mme akpan̄kpa ẹset ọnọ mmọ uwem, kpa ntre ke Eyen anam owo eke Enye amade odu uwem. Ẹkûyịk n̄kpọ emi, koro ini ke edi eke kpukpru mme andidu ke udi ẹdikopde Enye [Jesus] uyo ẹwọn̄ọ ẹdi.” (John 5:21, 28, 29) Ih, Jesus Christ ama ọn̄wọn̄ọ ete ke ediwak miliọn mme akpan̄kpa kemi ẹyefiak ẹdu uwem ke isọn̄ emi ẹnyụn̄ ẹnyene idotenyịn ndikaiso ndu ke enye ke nsinsi ke idak mme emem emem idaha paradise. (Luke 23:43; John 3:16; 17:3; men Psalm 37:29 ye Matthew 5:5 domo.) Sia edide Jesus ọkọn̄wọn̄ọ un̄wọn̄ọ emi, odot ndikere nte ke enye onyịme ndisu enye. Edi nte enye enyene ukeme ndinam ntre?

Ke se isụhọrede ikan isua iba nte enye ọkọn̄wọn̄ọ un̄wọn̄ọ oro, Jesus ama anam ke okopodudu usụn̄ owụt nte ke imọ imonyịme imonyụn̄ ikeme ndinam owo eset ke n̄kpa.

“Lazarus, Wọrọ Di”

Ekedi n̄kpọntịbe oro otụkde owo ke idem. Lazarus ama ọdọn̄ọ n̄kpa n̄kpa. Nditọeka esie iban iba, Mary ye Martha, ẹma ẹnọ etop ẹsọk Jesus, emi okodude ke edem Akpa Jordan oko, ẹte: “Ọbọn̄, owo emi Afo amade ke ọdọn̄ọ.” (John 11:3) Mmọ ẹma ẹfiọk ẹte ke Jesus ama ama Lazarus. Nte Jesus ikpoyomke ndikụt ufan esie oro ọdọn̄ọde? Ye ọkpọsọn̄ udọn̄, utu ke ndika Bethany ndondo oro, Jesus ama akaiso ndidu ke ebiet emi enye okodude ke usen iba en̄wen.—John 11:5, 6.

Lazarus ama akpa esisịt ini ke ẹma ẹkenọ etop udọn̄ọ esie aka. Jesus ama ọfiọk ini Lazarus akakpade, enye ama onyụn̄ aduak ndinam n̄kpọ mban̄a oro. Etisịm ini emi Jesus ke akpatre ebehede ke Bethany, edima ufan esie ama akpakpa ke usen inan̄. (John 11:17, 39) Nte Jesus eyekeme ndinam owo oro ama akakpa ke anyanini ntre ọtọn̄ọ ntak odu uwem?

Ke okopde ete ke Jesus ke edi, Martha, n̄wan oro ọfiọkde nditịbe n̄kpọ nnam, ama efehe ọwọrọ aka ndisobo ye enye. (Men Luke 10:38-42 domo.) Sia mfụhọ Martha otụkde enye, Jesus ama ọn̄wọn̄ọ ọnọ enye ete: “Eyeneka fo eyeset ke n̄kpa.” Ke ini Martha okowụtde mbuọtidem esie ke ediset ke n̄kpa ini iso, Jesus ama ọdọhọ enye in̄wan̄în̄wan̄ ete: “Ami ndi ediset ye uwem: owo eke ọbuọtde idem ye Ami, okposụkedi nte enye ama akpa, enye eyedu uwem.”—John 11:20-25.

Ke osịmde udi, Jesus ama ọnọ uyo ete ẹkpat itiat oro ẹkeberide ke inua udi ẹsio. Do, ke ama ọkọbọn̄ akam ke ọkpọsọn̄ uyo, enye ama ofiori ete: “Lazarus, wọrọ di.”—John 11:38-43.

Enyịn kpukpru owo ẹkewụhọ ke udi. Ekem, mbiet oto ke n̄kịmn̄kịm ebiet oro ọwọrọ edi. Ẹma ẹda ọfọn̄ ẹwan̄ enye ukot ye ubọk, ẹma ẹnyụn̄ ẹwan̄ enye ọfọn̄ ke iso. Jesus ama ọnọ uyo ete, “Ẹtat enye, ẹyak enye ọnyọn̄ ufọk.” Akpatre ọfọn̄ oro ẹketatde ama ọfọrọde ọduọ ke isọn̄. Ih, ekedi Lazarus, eren oro ama akakpa ke usen inan̄!—John 11:44.

Nte Emi Ama Enen̄ede Otịbe?

Ẹnọ mbụk aban̄ade edinam Lazarus eset ke Gospel John nte edide mbụk akpanikọ. Ọyọhọ mbụk emi otịm an̄wan̄a akan enye ndikpedi ikpîkpu mbụk ẹkerede-kere. Ndineni akpanikọ oro enye edide ọkpọwọrọ ndineni ofụri utịben̄kpọ ke Bible, esịnede ediset ke n̄kpa Jesus Christ ke idemesie. Ndien ndineni ediset ke n̄kpa Jesus edi ndikan̄ mbuọtidem Christian ke ofụri ofụri.—1 Corinth 15:13-15.

Ke akpanikọ, edieke afo onyịmede ete ke Abasi odu, afo ukpenyeneke mfịna baba kiet ndinyene mbuọtidem ke ediset ke n̄kpa. Ke ndinọ uwụtn̄kpọ: Owo ekeme ndida tape video mmụm akpatre mbiere-nnịm uduak ye ediomi esie, ndien ke enye ama akakpa, mme iman ye ufan esie ẹkeme ndikụt nnyụn̄ n̄kop ikọ esie, mi, nte enye anamde an̄wan̄a usụn̄ nte imọ iyomde ẹse ẹban̄a inyene imọ. Isua ikie ko ke edem, orụk n̄kpọ ntre ikodụkke-dụk owo ekikere. Ndien ye ndusụk owo oro ẹdụn̄de idahaemi ke nsannsan ebiet ke ererimbot, ifiọk usio obufa n̄kpọ ndi eke edimụm ndise ye ikọ ndọn̄ ke video ayan̄a mmọ ifiọk tutu editie nte utịben̄kpọ. Edieke mme owo ẹkemede ndida mme edumbet ifiọk ntaifiọk oro Andibot okowụkde ndiọn̄ utọ n̄kpọ oro ẹkemede ndikụt nnyụn̄ n̄kop uyo owo do, nte Andibot ikpekemeke ndinam se ikponde ikan oro? Nte iwụtke ifiọk, ndien, nte ke Enyeemi okobotde uwem enyene ukeme ndifiak mbot enye?

Utịben̄kpọ aban̄ade edinam Lazarus afiak odu uwem anam mbuọtidem ẹnyenede ke Jesus ye ediset ke n̄kpa ọkọri. (John 11:41, 42; 12:9-11, 17-19) Ke usụn̄ otụkde owo ke idem, emi n̄ko ayarade unyịme ye udọn̄ oro Jehovah ye Eyen esie ẹnyenede ndinam owo eset ke n̄kpa.

‘Abasi Eyenyene Udọn̄’

Nte Jesus akanamde n̄kpọ aban̄a n̄kpa Lazarus ayarade ata esịtima oro Eyen Abasi enyenede. Ntotụn̄ọ esịtmbọm esie ke ini emi ke in̄wan̄în̄wan̄ usụn̄ ayarade ọkpọsọn̄ udọn̄ esie ndinam mme akpan̄kpa ẹset. Nnyịn ikot ite: “Ke adan̄emi Mary osịmde ebiet oro Jesus odude, onyụn̄ okụtde Enye, ọduọ Enye ke ukot, ete Enye, Ọbọn̄, edieke afo okpodude mi, eyeneka mi ikpakpaha. Ntem ke ini Jesus okụtde nte Mary atuade eyet, ye nte mme Jew ẹmi ẹsan̄ade ye enye ẹtuan̄ade, Enye omụm mmụm ke spirit, esịt onyụn̄ otịmede Enye: ndien Enye ete, Mbufo ẹkenịm okpo ke m̀mọ̀n̄? Mmọ ẹte Enye, Ọbọn̄, di dise. Jesus atua eyet. Ntem ke mme Jew ẹte, Sese, adan̄a nte Enye amade owo oro.”—John 11:32-36.

Se iwụtde mbọm esịt akpanikọ Jesus edi ikọ ita ẹmi: “omụm mmụm,” “esịt . . . otịmede,” ye “atua eyet.” Mme ikọ akpasarade usem oro ẹkedade ndiwet n̄kpọntịbe otụkde owo ke idem mi ẹwụt ẹte ke n̄kpa Lazarus edima ufan esie ye enye ndikụt eyeneka Lazarus an̄wan atuade eyet ama otụk Jesus ntotụn̄ọ ntotụn̄ọ tutu mmọn̄eyet ọyọhọ Enye enyịn.a

Se itịmde idi n̄wọrọnda edi nte ke Jesus ama ananam owo iba en̄wen ẹfiak ẹdidu uwem. Ndien enye ama enen̄ede aduak ndinam kpasụk ntre ye Lazarus. (John 11:11, 23, 25) Edi, enye ama “atua eyet.” Do, ndinam mme owo ẹfiak ẹdidu uwem idịghe ikpîkpu n̄kpọ inọ Jesus. Ima ye ntotụn̄ọ esịtmbọm esie nte okowụtde ke n̄kpọntịbe emi ke in̄wan̄în̄wan̄ usụn̄ owụt ọkpọsọn̄ udọn̄ esie ndibiat odudu n̄kpa mfep.

Sia Jesus edide ‘ata mbiet idem Jehovah Abasi,’ nnyịn nte enende idori enyịn ndikụt Ete nnyịn eke heaven anamde ukem ukem ntre. (Mme Hebrew 1:3) Kaban̄a unyịme Jehovah ndinam mme akpan̄kpa ẹset, anam-akpanikọ eren oro, Job, ama ọdọhọ ete: “Ke owo akpade, nte enye ediset? . . . Afo okpokot, ndien ami n̄kpeyere fi, utom ubọk fo ọkpọdọn̄ fi.” (Job 14:14, 15) Mi ikọ akpasarade usem oro ẹkabarede “ọkpọdọn̄ fi” owụt ọkpọsọn̄ udọn̄ ye uduak Abasi. (Genesis 31:30; Psalm 84:2) Nte an̄wan̄ade, anaedi Jehovah enen̄ede enyene udọn̄ aban̄a ediset ke n̄kpa.

Nte nnyịn imekeme ndinen̄ede nnịm un̄wọn̄ọ ediset ke n̄kpa ke akpanikọ? Ih, eyịghe ndomokiet idụhe nte ke Jehovah ye Eyen esie ẹnyịme ẹnyụn̄ ẹkeme ndisu emi. Nso ke emi ọwọrọ ọnọ fi? Afo emenyene idotenyịn edifiak ndiana kiet ye mbonima fo oro ẹkekpade mi ke isọn̄ edi ke idak ata nsio nsio idaha!

Jehovah Abasi, emi ekesịnde akpa owo ke ediye in̄wan̄, ọmọn̄wọn̄ọ ndifiak n̄wụk Paradise ke isọn̄ emi ke idak ukara Obio Ubọn̄ Esie eke heaven ke ubọk Jesus Christ oro ẹnọde ubọn̄ idahaemi. (Genesis 2:7-9; Matthew 6:10; Luke 23:42, 43) Ke Paradise oro ẹfiakde ẹwụk do, ubonowo eyenyene idotenyịn edidu uwem oro mînyeneke utịt, ọbọhọde kpukpru udọn̄ọ. (Ediyarade 21:1-4; men Job 33:25; Isaiah 35:5-7 domo.) Ofụri usua, asari eke orụk, afai eke ekpụk, ye ufịk ndutịm uforo ẹyebe ẹfep n̄ko. Edidi ke utọ isọn̄ oro ẹnamde asana do ke Jehovah Abasi ebe ke Jesus Christ edinam mme akpan̄kpa ẹset.

Oro idahaemi edi idotenyịn Christian an̄wan oro ẹkesiakde ke ntọn̄ọ ntọn̄ọ ikpehe emi. Ke ndusụk isua ẹma ẹkebe tọn̄ọ nte eka esie akakpa, Mme Ntiense Jehovah ẹma ẹn̄wam enye ndikpep Bible ye ntịn̄enyịn. Enye eti ete: “Ke mma n̄kekpep n̄kpọ mban̄a idotenyịn ediset ke n̄kpa, ami mma ntua eyet. Ekedi utịben̄kpọ ndifiọk nte ke ami nyetọn̄ọ ntak n̄kụt eka mi.”

Edieke esịt fo ukem ntre enen̄erede oyom ndifiak n̄kụt owo ima, Mme Ntiense Jehovah ẹyedat esịt ndin̄wam fi ndikpep nte afo ekemede ndinam ata idotenyịn emi edi okwommọ. Ntak mûsoboke ye mmọ ke Ufọkmbono Obio Ubọn̄ oro ekperede fi, mîdịghe ewet n̄wed ọnọ ẹsọk adres oro ekperede akan emi ẹwụtde ke page 32.