Ibuot 19
Ke Ini Ifiọk Abasi Ọyọhọde Isọn̄
1, 2. Ẹkesan̄a didie ẹdibiat edibotn̄kpọ Jehovah?
YAK idọhọ ke ewet ndise ndisụk n̄kụre ndiwet ata ediye ndise edi oro. Enye nte enende ekere ke emi ọfọn etieti—ata ediye ndise! Edi ke okoneyo owo ufụp edibiat enye. Nte an̄wan̄ade, emi enen̄ede abiak ewet ndise oro. Ọdọn̄ enye didie ntem ndikụt nte ke ẹkọbi owo ibak oro! Ndien afo emekeme ndikụt nte ọdọn̄de ewet ndise oro ndinam ndise esie afiak eye nte ekeyede.
2 Ukem nte ewet ndise oro, Jehovah ama obot ata ediye itie ke nditịm isọn̄ nnyụn̄ nsịn ubonowo ke esịt esie. Ke ama okobot eren ye n̄wan, enye ama ọdọhọ ke kpukpru utom imọ ke isọn̄ “ẹfọn etieti.” (Genesis 1:31) Adam ye Eve ẹkedi nditọ Abasi, ndien enye ama ama mmọ. Enye ama okụt inem inem, ubọn̄ ubọn̄ ini iso oro akanade ke iso ebet mmọ. Edi akpanikọ, Satan ama anam mmọ ẹsọn̄ ibuot, edi owo ikabiatke utịbe utịbe edibotn̄kpọ Abasi ibe udomo oro ẹkemede ndidiọn̄.—Genesis 3:23, 24; 6:11, 12.
3. Nso idi “ata uwem”?
3 Abasi emebiere ndinen̄ede mme n̄kpọ mbon. Enye enen̄ede oyom ndikụt nte nnyịn idude uwem ke usụn̄ oro enye ke akpa akaduakde. Ibio ibio uwem nnyịn oro onyụn̄ ọyọhọde ye mfịna idịghe “ata uwem,” koro enye enen̄ede osụhọde akan se Jehovah ekenyenede ke ekikere. “Ata uwem” oro Abasi oyomde nnyịn inyene edi “nsinsi uwem” ke mme mfọnmma idaha.—1 Timothy 6:12, 19.
4, 5. (a) Didie ke idotenyịn Paradise edisu? (b) Ntak emi nnyịn ikpekerede iban̄a idotenyịn ini iso nnyịn?
4 Ifiọk Abasi ada mbiomo edi ke iso Jehovah. (James 4:17) Edi kere ban̄a mme edidiọn̄ ẹmi afo edibọde edieke afo adade ifiọk oro esịn ke edinam onyụn̄ anyanade ebịne nsinsi uwem. Ke Ikọ esie, kpa Bible, Jehovah Abasi emewet ediye ndise oro aban̄ade nte uwem oro editiede ke Paradise isọn̄ oro enen̄erede ekpere. Nte ededi, nte ikọt Jehovah nnyịn inamke n̄kpọ Abasi n̄kukụre ke ntak udọn̄ edibọ utịp. Nnyịn inam n̄kpọ Abasi koro nnyịn imade enye. (Mark 12:29, 30) Akan oro, nnyịn inyeneke uwem nte utịp edinam n̄kpọ Jehovah. Nsinsi uwem edi enọ Abasi. (Rome 6:23) Eyefọn nnyịn itie ikere iban̄a utọ uwem oro koro idotenyịn Paradise etide nnyịn aban̄a orụk Abasi oro Jehovah edide—kpa ima ima “Andinọ mmọemi ẹyomde Enye utịp.” (Mme Hebrew 11:6) Idotenyịn emi edide ata idem n̄kpọ ke ekikere ye esịt nnyịn eyen̄wam nnyịn ndiyọ nsọn̄ọn̄kpọ ke ererimbot Satan.—Jeremiah 23:20.
5 Ẹyak nnyịn idahaemi iwụk ntịn̄enyịn nnyịn ke idotenyịn nsinsi uwem ke Paradise isọn̄ eke ini iso oro ọkọn̄ọde ke Bible. Uwem editie didie ke ini ifiọk Abasi ọyọhọde isọn̄?
KE ARMAGEDDON EBEDE—PARADISE ISỌN̄
6. Armageddon edi nso, ndien nso ke enye ediwọrọ ọnọ ubonowo?
6 Nte ẹkebemde iso ẹwụt, Jehovah Abasi eyesọp ndisobo idiọk editịm n̄kpọ oro odude kemi. Ererimbot ke asan̄a usọp usọp ekpere se Bible okotde Har–Magedon, m̀mê Armageddon. Ikọ oro ekeme ndinam ndusụk owo ẹkere ẹban̄a nsobo nuclear oro idụt ẹmi ẹn̄wanade ekọn̄ ẹdade ẹdi, edi Armageddon idịghe orụk n̄kpọ oro. Nte Ediyarade 16:14-16 owụtde, Armageddon edi “ekọn̄ akwa usen Abasi, Andikara kpukpru n̄kpọ.” Enye edi ekọn̄ emi abuanade “ndidem kpukpru ekondo,” m̀mê mme idụt. Eyen Jehovah Abasi, kpa Edidem oro ẹmekde, eyesọp ndiwat n̄ka ekọn̄ oro. Utịp edi ọyọhọ edikan. Ẹyesọhi kpukpru mbon oro ẹbiọn̄ọde Obio Ubọn̄ Abasi ẹnyụn̄ ẹdide ubak idiọk editịm n̄kpọ Satan ẹfep. Mbon oro ẹnamde akpanikọ ẹnọ Jehovah kpọt ẹdibọhọ.—Ediyarade 7:9, 14; 19:11-21.
7. Satan ye mme demon esie ẹdidu ke m̀mọ̀n̄ ke Tọsịn Isua Ukara Christ, ndien didie ke emi edinyene ufọn ọnọ ubonowo?
7 Yak idọhọ ke afo ọmọbọhọ nsobo oro. Uwem editie didie ke isọn̄ ke obufa ererimbot oro Abasi ọn̄wọn̄ọde? (2 Peter 3:13) Iyomke nnyịn itie ikere, sia edide Bible asian nnyịn, ndien se enye etịn̄de aduai owo idem. Nnyịn imekpep ite ke ẹyedori Satan ye mme demon esie ukpan, ẹkọbi ke editụn̄ọ ukpe unana edinam ke Tọsịn Isua Ukara Jesus Christ. Ndiọi, ubi ubi edibotn̄kpọ oro ididịbeke aba ke edem inam ibak, ẹsịnde nsọk ẹnọ ntịme ẹnyụn̄ ẹdomode ndinyịk nnyịn inam mme edinam unana edinam akpanikọ idian Abasi. Nso ubọhọ ke emi edidi ntem!—Ediyarade 20:1-3.
8, 9. Ke obufa ererimbot, nso iditịbe inọ ubiak, udọn̄ọ, ye usọn̄?
8 Nte ini akade, kpukpru orụk udọn̄ọ ididụhe aba. (Isaiah 33:24) Adan̄aoro mbụn̄ọ ẹyedaha ẹda, ẹsan̄a isan̄, ẹfehe itọk, ẹnyụn̄ ẹnyene nti ukot ẹnek unek. Ke ẹma ẹkedu uwem ediwak isua ye unana edikop n̄kpọ, mbon inan ẹyekop uyom idatesịt oro akande mmọ okụk. N̄kpen̄eyen̄ eyemụm mme nnan nte mmọ ẹdade enyịn mmọ ẹkụt ererimbot oro ọyọhọde ye ndiye uduot ye orụk. (Isaiah 35:5, 6) Ke akpatre, mmọ ẹyekụt iso mbonima mmọ! Eyedi adan̄aoro mmọn̄eyet idatesịt eyekịm mmọ enyịn ke ata esisịt ini.
9 Kam kere! Akrasi enyịn idụhe aba, eto isan̄ ye esan̄ idụhe aba, ibọk idụhe aba, mme itie usọbọ edet m̀mê mme ufọkibọk idụhe aba! Udọn̄ọ ntụk ye mfịghe idibọhọ mme owo aba inemesịt iduọk. Udọn̄ọ ididọn̄ọke aba nditọwọn̄. Ẹyetre mme afanikọn̄ ini usọn̄. (Job 33:25) Nnyịn iyetịm ikop nsọn̄idem, itịm ikop odudu. Kpukpru usenubọk nnyịn iyedemede ke inem inem idap okoneyo ye obufa odudu, ikopde nsọn̄idem inyụn̄ inyenede udọn̄ ndikụt inem inem uwem obufa usen ye utom oro ọnọde uyụhọ.
10. Nso utom ke mme andibọhọ Armageddon ẹdinam?
10 Akpakịp inem inem utom ẹyedu ẹnọ mme andibọhọ Armageddon ndinam. Mmọ ẹyenam isọn̄ akabade edi paradise. Ẹyekpọri idiọn̄ọ akani editịm n̄kpọ ekededi oro ẹsabarede ẹfep. Mme itie inemesịt ye mme in̄wan̄esa ẹyeda itie ndedehe ebiet ye isọn̄ oro ẹkebiatde. Kpukpru owo ẹyenyene nti, inem inem ufọkidụn̄. (Isaiah 65:21) Nte ini akade, mme ikpehe isọn̄ ẹmi ẹdide paradise mi ẹyetara ẹnyụn̄ ẹbuaha kiet tutu ofụri ekondo osịm idaha uyai oro Andibot okonịmde ke in̄wan̄ Eden. Edidi n̄kpọ oro ọnọde uyụhọ didie ntem ndibuana ke utom edifiak n̄wụk oro!
11. Nso itie ebuana ke ubonowo edinyene ye n̄kann̄kụk isọn̄ ye uwem unam ke ini iso?
11 Ẹdinam ofụri emi ke idak ndausụn̄ Abasi mbak owo edibiat n̄kann̄kụk. Mme owo ẹyedu ke emem ye mme unam. Utu ke ediwot mmọ ke ọkwọkudịm, owo eyetọn̄ọ ntak anam utom nte andikpeme isọn̄, otịmde ese aban̄a mmọ. Se ke enyịn ikike nte mme wolf ye nditọerọn̄, ekpe ye nditọenan̄, ẹdiade udia ọtọkiet—ndien ufene ẹnen̄ede ẹdu ke ata ifụre. Idem ekpri eyen idinyeneke ntak ndomokiet ndifehe unamikọt, m̀mê ibak ibak mbon afai nditịmede emem emem obufa ererimbot oro. (Isaiah 11:6-8) Nso emem emem obufa ererimbot ke oro edidi ntem!
ẸKPỤHỌDE UBONOWO
12. Didie ke Isaiah 11:9 osu mfịn, ndien didie ke enye edisu ke Paradise?
12 Isaiah 11:9 asian nnyịn ntak emi owo mîdinamke idiọk ndomokiet ke ofụri isọn̄. Enye ọdọhọ ete: “Ifiọk Jehovah eyeyọhọ ke ererimbot, kpa nte mmọn̄ ofụkde inyan̄.” Emi aban̄a mme owo koro mme unam ikemeke ndinyene “ifiọk Jehovah” nnyụn̄ nnam mme ukpụhọde, sia mmọ ẹdude uwem ke ntụk. Edi ifiọk Andibot nnyịn okpụhọde mme owo ke akpan. Eyịghe idụhe nte ke afo amananam ndusụk ukpụhọde ke idemfo nte utịp edida ifiọk Abasi nsịn ke edinam ke uwem fo. Ediwak miliọn owo ẹnam ntre. Ke ntre, prọfesi emi ọtọtọn̄ọ ndisu ke idem mbon oro ẹnamde n̄kpọ Jehovah. Edi, enye n̄ko anyan ubọk owụt ini emi mme owo ke ofụri ererimbot ẹdifọrọrede mme edu unam m̀mê afai afai edu ẹbon ẹnyụn̄ ẹkabade ẹtie emem emem ke nsinsi.
13. Nso ndutịm unọ ukpep edida itie ke isọn̄?
13 Edidi utịben̄kpọ didie ntem ke ini ifiọk Abasi ọyọhọde isọn̄! Ntatara ndutịm unọ ukpep eyedu ke idak ndausụn̄ Edidem Jesus Christ ye owo 144,000 ẹdide nsan̄a mme andikara ye enye. Ẹyekama mbufa “n̄wed” adan̄aoro. Nte an̄wan̄ade mmọemi ẹdi mme item Abasi oro ẹwetde-wet ẹmi ẹdidade ẹnọ mme andidụn̄ isọn̄ ukpep. (Ediyarade 20:12) Ubonowo idikpepke ekọn̄, edi edikpep emem. Ẹyesobo kpukpru n̄kpọekọn̄ oro akamade nsobo ẹfep ke nsinsi. (Psalm 46:9) Ẹyekpep mme andidụn̄ obufa ererimbot ndinam n̄kpọ ye ekemmọ owo ke ima, ukpono, ye uku.
14. Didie ke ererimbot edikpụhọrede ke ini ubonowo edide ubon kiet emi adianade kiet?
14 Ubonowo eyekabade edi ubon oro adianade kiet. N̄kpọ ndomokiet idibiọn̄ọke edidianakiet ye itie nditọete. (Psalm 133:1-3) Owo ndomokiet idikọbike ufọk mbak inọ ẹdidụk. Emem eyeyọhọ ke esịt kpukpru owo, ke kpukpru ufọk, ke ofụri ikpehe isọn̄.—Micah 4:4.
IDARA IDARA EDISET KE N̄KPA
15. Ewe otu iba ke ẹdinam ẹset ke isọn̄?
15 Ke Tọsịn Isua oro, ediset ke n̄kpa eyeda itie. Owo idinamke mbon oro ẹkoide-koi ẹnam idiọkn̄kpọ ẹdian edisana spirit Abasi, m̀mê anamutom odudu, ebe ke ndinam n̄kpọ oro atuahade ye mme uyarade m̀mê ndausụn̄ esie ye unana edikabade esịt, ẹset. (Matthew 23:15, 33; Mme Hebrew 6:4-6) Nte ededi, Abasi edibiere m̀mê anie anam orụk idiọkn̄kpọ oro. Edi ẹyenam nsio nsio otuowo iba ẹset—“nti owo ye mme idiọkowo.” (Utom 24:15) Sia eti ndutịm edidude, owụt ifiọk ndibiere nte ke akpa mbon oro ẹdikụtde nte ẹfiakde ẹdinyene uwem ke isọn̄ edidi nti owo, mbon oro ẹkenamde n̄kpọ Jehovah ke edinam akpanikọ.—Mme Hebrew 11:35-39.
16. (a) Mmanie ẹdidu ke otu “nti owo” oro ẹnamde ẹset ke isọn̄? (b) Mme anam-akpanikọ eke eset ewe ke afo enen̄ede oyom ndisobo, ndien ntak-a?
16 Utu ke ndikop mbụk mban̄a ekọn̄, afanikọn̄, ye n̄kpa, mme asan̄autom Jehovah ẹdibọ utịbe utịbe ntọt aban̄ade ediset ke n̄kpa. Edidi n̄kpọ nduaidem ndikop nte ke mme utọ anam-akpanikọ iren ye iban nte Abel, Enoch, Noah, Abraham, Sarah, Job, Moses, Rahab, Ruth, David, Elijah, Esther ẹfiak ẹdidu uwem. Nso edemede owo udọn̄ mbụk akpanikọ ke mmọ ẹdinọ ntem nte mmọ ẹtịn̄de ke nde ke nde nte ediwak mbụk Bible ẹkesan̄ade! Nte eyịghe mîdụhe mmọ ye ndinen owo ẹmi ẹkpan̄ade ke mme isua ndondo ẹmi ẹyenyene udọn̄ ndikop n̄kpọ mban̄a utịt editịm n̄kpọ Satan ye nte Jehovah akanamde edisana enyịn̄ esie asana onyụn̄ owụtde unen itie edikara esie.
17. Nso un̄wam ke mme anam-akpanikọ ẹdinọ mbon eken oro ẹnamde ẹset?
17 Mme anam-akpanikọ ẹmi ẹdin̄wam didie ntem ke ikpehe ediset ke n̄kpa efen, ke ini ẹdisiode ediwak biliọn “mme idiọkowo” ke n̄kpọkọbi n̄kpa! Ata ediwak ke otu ubonowo akanam inyeneke ifet ndidiọn̄ọ Jehovah. Satan ama anam ‘ikike mmọ okịm.’ (2 Corinth 4:4) Edi ẹyediọn̄ se Devil akabiatde. Mme idiọkowo ẹyefiak ẹdidu uwem ke ediye ye emem emem isọn̄. Mme owo oro ẹtịmde mfọn mfọn man ẹkpep mmọ ẹban̄a Jehovah ye Jesus Christ Eyen esie oro akarade ẹyedara mmọ. Nte ediwak biliọn mbon oro ẹsetde ke n̄kpa ẹdide ẹdifiọk ẹnyụn̄ ẹmade Andibot mmọ, ifiọk Jehovah eyeyọhọ isọn̄ ke usụn̄ oro ananade mbiet.
18. Afo ekere ke editie fi didie ke idem ke ini adarade mbonima oro ẹnamde ẹset?
18 Nso idatesịt ke ediset ke n̄kpa edida ọsọk nnyịn ntem! Anie mîbọhọ ndutụhọ ke ntak asua nnyịn n̄kpa? Ke akpanikọ, anie mîsinen̄ekede ikop mmemidem ke ini ẹtịmerede mbọbọ ima m̀mê itie ufan nte udọn̄ọ, usọn̄, mbabuat n̄kpọntịbe, m̀mê afai adade uwem owo oro ẹmade? Do, kere ban̄a idatesịt edifiak ndiana kiet ke Paradise. Mme ete ye eka, nditọiren ye nditọiban, mme ufan ye iman, ẹyefehe ẹkefat kiet eken, ẹsakde imam ẹnyụn̄ ẹtuan̄ade ke idatesịt.
MFỌNMMA KE AKPATRE!
19. Nso utịben̄kpọ edida itie ke Tọsịn Isua?
19 Ke ofụri Tọsịn Isua oro, ndyọ ndyọ utịben̄kpọ eyesida itie. Ye ubonowo, eyedi enye edidi n̄kpọ oro aduaide owo idem akan ke Tọsịn Isua Ukara Christ. Jehovah eyeda Eyen esie usụn̄ ke ndida mme ufọn uwa ufak nnam n̄kpọ nnọ kpukpru anam-akpanikọ ye okopitem iren ye iban. Ebede ke usụn̄ oro, ẹyesio kpukpru idiọkn̄kpọ ẹfep ndien ẹyeda ubonowo ẹkesịm mfọnmma.—1 John 2:2; Ediyarade 21:1-4.
20. (a) Nso ke ndidi mfọnmma ediwọrọ? (b) Ini ewe ke mme andibọhọ Armageddon ye mbon oro ẹnamde ẹset ẹditọn̄ọ ndidu uwem ke ọyọhọ ọyọhọ usụn̄ifiọk?
20 Mfọnmma! Nso ke enye ediwọrọ? Enye ediwọrọ edifiak n̄kodu uwem ke usụn̄ oro Adam ye Eve ẹkedude mbemiso mmọ ẹkenamde idiọkn̄kpọ ẹdian Jehovah Abasi. Ke n̄kan̄ ikpọkidem, n̄kan̄ ekikere, n̄kan̄ ntụk, n̄kan̄ ido uwem, n̄kan̄ spirit—ke kpukpru usụn̄ oro ẹkemede ndikekere—mme mfọnmma owo ẹyesịm mme idaha Abasi ọyọhọ ọyọhọ. Edi nte kpukpru owo adan̄aoro ẹdibiet kiet eken? N̄wan̄ansa-o! Mme edibotn̄kpọ Jehovah—eto, flawa, unam—kpukpru ẹkpep nnyịn ẹte ke enye ama n̄kpọ ẹdi ke orụk ke orụk. Mme mfọnmma owo ẹyenyene nsio nsio edu ye ukeme. Owo kiet kiet eyekop inem uwem nte Abasi okoyomde enye edi. Ediyarade 20:5 ọdọhọ ete: “Mme akpan̄kpa eken ẹtre ndidu uwem tutu tọsịn isua oro ebe.” Ukem nte akwa otuowo eke mme andibọhọ Armageddon, mbon oro ẹnamde ẹset ẹdidu uwem ọyọhọ ọyọhọ ke ini mmọ ẹsịmde mfọnmma oro mînyeneke ndo.
21. (a) Nso iditịbe ke utịt Tọsịn Isua Ukara Christ? (b) Nso iditịbe ke akpatre inọ Satan ye kpukpru mbon oro ẹdade ke n̄kan̄ esie?
21 Mme mfọnmma owo ẹyesobo akpatre udomo kiet. Ke utịt Tọsịn Isua oro, ẹyesion̄o Satan ye mme demon esie ke editụn̄ọ ukpe ke ibio ini ndien ẹyeyak mmọ ẹsịn akpatre ukeme ndiwọn̄ọde mme owo n̄kpọn̄ Jehovah. Ndusụk owo ẹyema ndiọi udọn̄ ẹkan Abasi, edi nsọn̄ibuot emi idibịghike. Jehovah eyesobo mbon ibụk ẹmi ọkọrọ ye Satan ye kpukpru mme demon esie. Adan̄aoro kpukpru mme anamidiọk ẹyebe ẹfep ke nsinsi.—Ediyarade 20:7-10.
NSO KE AFO EDINAM?
22. Nso ke afo odori enyịn ndinam ke Paradise?
22 Nsinsi ini eyedu ọnọ mbon oro ẹmade Jehovah Abasi ẹnyụn̄ ẹdụn̄de ke Paradise isọn̄. Ọsọsọn̄ nnyịn ndidiọn̄ọ nte idatesịt mmọ edikponde, ndien afo n̄ko emekeme ndibuana ke emi. Ikwọ, utomusọ, ubọkusọ—kamse, se mfọnmma ubonowo edinamde ẹyekan mfọnn̄kan utom nta ewet ndise eke akani ererimbot emi! Kamse, mme owo ẹdidi mfọnmma ndien anana-utịt ini eyedu mmọ ke iso. Kere se afo edikemede ndinam nte mfọnmma owo. Kere, n̄ko, ban̄a se afo ye ekemmọ owo ẹdikpepde ẹban̄a edibotn̄kpọ Jehovah—ọtọn̄ọde ke ediwak biliọn uyọ ntantaọfiọn̄ ke ofụri ekondo tutu osịm ata n̄kpri-n̄kan n̄kpatan̄a n̄kpọ ẹkpride ẹkan atọm. Kpukpru n̄kpọ ẹmi ubonowo anamde eyekaiso ndidat ima ima Ete nnyịn eke heaven, Jehovah, esịt.—Psalm 150:1-6.
23. Ntak emi uwem ke Paradise mîdifekke owo tutu amama?
23 Uwem idifekke owo adan̄aoro. Enye eyetotịm enyene inem nte ini akade. Omokụt do, ifiọk Abasi inyeneke utịt. (Rome 11:33) Ke nsinsi, ekese n̄kpọ ẹyedu kpukpru ini ndikpep ye mbufa n̄kpọ ndiyarade ndiọn̄ọ. (Ecclesiastes 3:11) Ndien nte afo akade iso ndikpep n̄kpọ mban̄a Jehovah Abasi, afo eyekaiso ndidu uwem—idịghe ke isua ifan̄ kpọt edi ke nsinsi!—Psalm 22:26.
24, 25. Ntak emi afo idahaemi okpodude uwem ke n̄kemuyo ye ifiọk Abasi?
24 Nte inem inem ini iso ke paradise isọn̄ ikemke ye ukeme m̀mê n̄kpọ ekededi oro afo ayakde atak? Ke akpanikọ enye ekem! Ọfọn, Jehovah ọmọnọ fi ukpọhọde adade osịm nyayama ini iso oro. Ukpọhọde oro edi ifiọk Abasi. Nte afo eyeda enye anam n̄kpọ?
25 Edieke afo amade Jehovah, afo eyekop idatesịt ndinam uduak esie. (1 John 5:3) Nte afo ebịnede usụn̄uwem oro, nso edidiọn̄ ke afo edinyene ntem! Edieke afo adade ifiọk Abasi esịn ke edinam, enye ekeme ndinọ fi uwem oro enyenede inem akan idem ke ntịme ntịme ererimbot emi. Ndien mme utịp ini iso ẹwak etieti, koro emi edi ifiọk oro adade osịm nsinsi uwem! Idahaemi edi eti ini afo ndinam n̄kpọ. Biere ndidu uwem ekekem ye ifiọk Abasi. Yarade ima oro afo amade Jehovah wụt. Kpono edisana enyịn̄ esie nyụn̄ wụt ke Satan edi osu nsu. Ekem, Jehovah Abasi, Ebiet emi ọniọn̄ ye ifiọk akpanikọ ẹtode, eyekop idatesịt aban̄a fi ke akwa ye ima ima esịt esie. (Jeremiah 31:3; Zephaniah 3:17) Ndien enye eyema fi ke nsinsi!
DOMO IFIỌK FO SE
Nso idi “ata uwem”?
Ke Armageddon ebede, nso idida itie ke isọn̄?
Mmanie ke ẹdinam ẹset ke isọn̄?
Didie ke ubonowo edikabade edi mfọnmma onyụn̄ edi se ẹdomode ke akpatre?
Nso idi idotenyịn fo kaban̄a Paradise?
[Ndise ke page 188, 189]
Nte afo omodori enyịn ndidu uwem ke Paradise, ke ini ifiọk Abasi ediyọhọde isọn̄?