Ukpepn̄kpọ 7
Ndisan̄a N̄kpere Abasi ke Akam
Ntak emi edide akpan n̄kpọ ndibọn̄ akam kpukpru ini? (1)
Nnyịn ikpenyene ndibọn̄ akam nnọ anie, ndien didie? (2, 3)
Nso idi mme n̄kpọ oro ẹdotde ẹbọn̄ akam ẹban̄a? (4)
Ini ewe ke afo ekpenyene ndibọn̄ akam? (5, 6)
Ndi Abasi esikpan̄ utọn̄ ọnọ kpukpru akam? (7)
1. Akam edi ndisụhọde idem ntịn̄ ikọ ye Abasi. Afo ekpenyene ndibọn̄ akam nnọ Abasi kpukpru ini. Ntem afo emekeme ndisan̄a n̄kpere enye nte emi asan̄ade ekpere edima ufan. Jehovah enen̄ede okpon onyụn̄ enyene odudu, kpa ye oro enye esikpan̄ utọn̄ ọnọ akam nnyịn! Nte afo emesibọn̄ akam ọnọ Abasi kpukpru ini?—Psalm 65:2; 1 Thessalonica 5:17.
2. Akam edi ubak utuakibuot nnyịn. Ntem, nnyịn ikpenyene ndibọn̄ akam nnọ Abasi, kpa Jehovah, kpọt. Ke ini Jesus okodude ke isọn̄, enye kpukpru ini ekesibọn̄ akam ọnọ Ete esie, ibọn̄ke inọ owo efen ekededi. Ikpenyene ndinam kpasụk ntre. (Matthew 4:10; 6:9) Nte ededi, ikpọbọn̄ kpukpru akam nnyịn ke enyịn̄ Jesus. Emi owụt ke nnyịn imokpono itie Jesus ye nte ke nnyịn imọbuọt idem ke uwa ufak esie.—John 14:6; 1 John 2:1, 2.
3. Ke ini nnyịn ibọn̄de akam nnyịn ikpenyene nditịn̄ ikọ ke ofụri esịt nnọ Abasi. Akam nnyịn ikpedịghe se imụmde-mụm idọn̄ ke ibuot m̀mê se ikotde ke n̄wed akam. (Matthew 6:7, 8) Nnyịn imekeme ndidu ke idaha ekededi owụtde ukpono, ke ini ekededi, ye ke ebiet ekededi, mbọn̄ akam. Abasi ekeme ndikop idem akam ndopuyo oro ibọn̄de ke esịt nnyịn. (1 Samuel 1:12, 13) Ọfọn ndikpọn̄ mbon en̄wen nyom ebiet oro uyom mîdụhe man ibọn̄ ọkpọkpọ akam nnyịn.—Mark 1:35.
4. Mme n̄kpọ ewe ke afo ekeme ndibọn̄ akam mban̄a? N̄kpọ ekededi oro ekemede nditụk itie ufan fo ye enye. (Philippi 4:6, 7) Akam uwụtn̄kpọ owụt ke nnyịn ikpenyene ndibọn̄ akam mban̄a enyịn̄ ye uduak Jehovah. Nnyịn imekeme n̄ko ndibụp mban̄a mme n̄kpọ obụkidem oro iyomde, mben̄e ẹfen mme idiọkn̄kpọ nnyịn, nnyụn̄ nyom un̄wam ndikan idomo. (Matthew 6:9-13) Akam nnyịn ikpenyeneke nditie ibụk ibụk. Nnyịn n̄kukụre ikpọbọn̄ akam iyom mme n̄kpọ oro ẹkemde ye uduak Abasi.—1 John 5:14.
5. Afo emekeme ndibọn̄ akam ini ekededi oro esịt fo onụkde fi ndikọm m̀mê nditoro Abasi. (1 Chronicles 29:10-13) Afo ekpenyene ndibọn̄ akam ke ini afo enyenede mme mfịna ye ini ẹdomode mbuọtidem fo ẹse. (Psalm 55:22; 120:1) Odot afo ọbọn̄ akam mbemiso adiade udia. (Matthew 14:19) Jehovah ọnọ nnyịn ikot ete ibọn̄ akam “kpukpru ini.”—Ephesus 6:18.
6. Oyom nnyịn inen̄ede ibọn̄ akam edieke edide imanam akwa idiọkn̄kpọ. Ke mme utọ ini oro ikpenyene ndiben̄e mbọm ye edifen nnọ otode Jehovah. Edieke iyararede mme idiọkn̄kpọ nnyịn inọ enye inyụn̄ inamde ofụri se ikemede nditre ndifiak nnam mmọ, Abasi “ama ndidahado.”—Psalm 86:5; Mme N̄ke 28:13.
7. Jehovah esikpan̄ utọn̄ kpọt ọnọ akam ndinen owo. Man Abasi okop akam fo, ana odomo ukeme fo ndidu uwem ekekem ye ibet esie. (Mme N̄ke 15:29; 28:9) Afo enyene ndisụhọde idem ke ini ọbọn̄de akam. (Luke 18:9-14) Oyom afo anam n̄kpọ ekekem ye se ọbọn̄de akam oyom. Afo ke ntem eyewụt ete ke imọ imenyene mbuọtidem ye nte ke imọ imada se itịn̄de ke akpan n̄kpọ. Adan̄aoro kpọt ke Jehovah edibọrọ akam fo.—Mme Hebrew 11:6.