Sịn Nsunsu Ido Ukpono!

Satan ye mme demon iyomke afo anam n̄kpọ Abasi. Mmọ ẹyom ndiwọn̄ọde kpukpru owo n̄kpọn̄ Abasi edieke mmọ ẹkemede. Didie ke mmọ ẹdomo ndinam emi? Usụn̄ kiet ebe ke nsunsu ido ukpono. (2 Corinth 11:13-15) Ido ukpono edi nsu edieke enye mîkpepke akpanikọ otode Bible. Nsunsu ido ukpono etie nte abian̄a abian̄a okụk—enye ekeme nditie nte ata okụk, edi enye inyeneke ufọn. Enye ekeme ndisịn fi ke ekese mfịna.

Tutu amama nsu eke ido ukpono ikemeke ndinem Jehovah, kpa Abasi akpanikọ, esịt. (Psalm 31:5) Ke ini Jesus okodude ke isọn̄, ama odu otu ido ukpono oro ẹkeyomde ndiwot enye. Mmọ ẹkekere ke usụn̄ utuakibuot mmimọ ekedi nnennen usụn̄. Mmọ ẹkedọhọ ẹte: “Nnyịn inyene ete kiet kpọt, kpa Abasi.” Ndi Jesus ama enyịme? Baba! Enye ọkọdọhọ mmọ ete: “Mbufo ẹdi nditọ ete mbufo, kpa Satan.” (John 8:41, 44) Mfịn ediwak owo ẹkere ke mmimọ ituak ibuot inọ Abasi, edi mmọ ẹnen̄ede ẹnam n̄kpọ ẹnọ Satan ye mme demon esie!—1 Corinth 10:20.

Kpa nte mbiara eto esin̄wụmde idiọk mfri, ntre ke nsunsu ido ukpono osion̄o mme owo oro ẹnamde ndiọi n̄kpọ edi. Ererimbot ọyọhọ ye afanikọn̄ ke ntak ndiọi n̄kpọ oro mme owo ẹnamde. Oburobụt ido, en̄wan, uyịpinọ, ufịk, uwotowo, ye idan̄ n̄kanubọk ẹdu. Ediwak owo oro ẹnamde ndiọi edinam ẹmi ẹnyene ido ukpono, edi ido ukpono mmọ inụkke mmọ ndinam se ifọnde. Mmọ ikemeke ndidi mme ufan Abasi ibọhọke mmọ ẹtre ndinam ndiọi edinam.—Matthew 7:17, 18.

Nsunsu ido ukpono ekpep mme owo ndibọn̄ akam nnọ ndisọi n̄kpọ. Abasi ọdọhọ owo okûbọn̄ akam unọ ndisọi n̄kpọ. Emi owụt eti ibuot. Nte afo akpama edieke owo etrede nditịn̄ ikọ ye afo edi etịn̄ ikọ n̄kukụre ọnọ ndise fo? Ndi owo oro ekpedi ata ufan fo? Baba, enye ikpedịghe. Jehovah oyom mme owo ẹtịn̄ ikọ ẹnọ imọ, iyomke ẹtịn̄ ẹnọ mbiet m̀mê ndise, oro mînyeneke uwem.—Exodus 20:4, 5.

Nsunsu ido ukpono ekpep nte ke enen ndiwot mbon efen ke ini ekọn̄. Jesus Christ ọkọdọhọ ete ke mme ufan Abasi ẹyenyene ima ke otu idemmọ. Nnyịn isiwotke mme owo oro nnyịn imade. (John 13:35) Ikam inenke nnyịn ndiwot mme idiọkowo. Ke ini mme asua Jesus ẹkedide ndimụm enye, enye ikayakke mme mbet esie ẹn̄wana man ẹkpeme enye.—Matthew 26:51, 52.

Nsunsu ido ukpono ekpep ete ke ndiọi owo ẹyebọ ufen ke hell ikan̄. Edi Bible ekpep ete ke idiọkn̄kpọ ada esịm n̄kpa. (Rome 6:23) Jehovah edi Abasi ima. Ndi ima ima Abasi okpotụhọde mme owo ke nsinsi? Ke akpanikọ ikpotụhọkede! Ke Paradise, ido ukpono kiet kpọt edidu, enye oro Jehovah enyịmede. (Ediyarade 15:4) Kpukpru ido ukpono oro ẹkọn̄ọde ke nsu Satan ẹyebe ẹfep.