Editịn̄ Ikọ Ye Uko

KE INI owo etịn̄de ikọ ye uko, mbon en̄wen ẹyekụt ke enye enen̄ede enịm se enye etịn̄de ke akpanikọ. Ẹma ẹkụt utọ uko oro ke utom ukwọrọikọ apostle Paul. Enye ekewet ọnọ mbon oro ẹkekabarede ẹdi mme andinịm ke akpanikọ ke Thessalonica ete: “Gospel nnyịn ikedịghe ke ọtọ mbufo nte ikọ ikpọn̄, edi ekedi . . . ye [ọkpọsọn̄ uko, NW].” (1 Thess. 1:4, 5) Uko oro ama owụt idem ke usụn̄ oro enye eketịn̄de ikọ ye ke usụn̄ oro enye okodude uwem. Ẹkpenyene n̄ko ndikụt ọkpọsọn̄ uko nnyịn ke usụn̄ oro nnyịn inemede akpanikọ Bible.

Nditịn̄ ikọ ye uko okpụhọde ye editie ukpọtiọ ukpọtiọ, uyịre uyịre, m̀mê ntan̄idem ntan̄idem. Utu ke oro, ke ini owo oro enyenede uko etịn̄de mme n̄kpọ oro ẹdude ke Ikọ Abasi, enye anam ntre ke usụn̄ oro owụtde ọkpọsọn̄ mbuọtidem.—Heb. 11:1.

Mme Idaha Nditịn̄ Ikọ ye Uko. Edi akpan n̄kpọ nditịn̄ ikọ ye uko ke ini afo odude ke an̄wautom. Mme owo ẹsiwak ndikụt edu utịn̄ikọ fo ẹkan nte ẹkopde etop fo. Mmọ ẹsikụt nte se afo etịn̄de enen̄erede otụk fi. Uko fo ekeme ndiwụt, ke usụn̄ oro okopde odudu akan ikọ, nte ke afo emenyene n̄kpọ oro enen̄erede enyene ufọn ndinọ.

Oyom owụt uko n̄ko ke ini etịn̄de ikọ ọnọ otuowo oro ẹdide mme andinịm ke akpanikọ. Apostle Peter ekewet akpa leta esie eke odudu spirit ‘man ọnọ [nsịnudọn̄, NW], onyụn̄ owụt ete, emi edi ata mfọn Abasi.’ Ntem, enye ama esịn udọn̄ ọnọ nditọete oro ete: “Ẹsọn̄ọ ẹda.” (1 Pet. 5:12) Ke ini ekewetde n̄wed ọnọ ẹsọk esop ke Rome, apostle Paul ama etịn̄ ikọ ye uko oro akadade ufọn ọsọk mmọ. Enye ekewet ete: “Koro mmetịm mbụre mfiọk nte, n̄kpa ye uwem, ye mme angel ye mbọn̄, ye n̄kpọ eke ẹdude ke emi, ye n̄kpọ eke ẹdidide, ye mme odudu, ye ukon̄ ye utụn̄ọ, ye n̄kpọ efen ekededi eke ẹbotde, idikemeke ndidian̄ade nnyịn ke ima Abasi, emi odude ke Christ Jesus Ọbọn̄ nnyịn.” (Rome 8:38, 39) Paul n̄ko ama ewet ke usụn̄ oro otụkde owo aban̄a ufọn edikwọrọ ikọ nnọ mbon efen, ndien ifịk esie ke utom oro ama ọnọ in̄wan̄-in̄wan̄ uyarade nte ke enye ke idemesie ama enịm ke akpanikọ nte ke utom emi edi akpan n̄kpọ. (Utom 20:18-21; Rome 10:9, 13-15) Mbiowo Christian mfịn ẹkpenyene ndiwụt ukem uko oro nte mmọ ẹnọde ukpep ke Ikọ Abasi.

Ke mme ini ukpepn̄kpọ ye mme ini eken, oyom mme ete ye eka ẹtịn̄ ikọ ye uko ke ini ẹnemede mme n̄kpọ eke spirit ye nditọ mmọ. Emi oyom mme ete ye eka ẹkọri ima ẹnọ Abasi ye mme usụn̄ esie ke esịt mmọ. Do mmọ ẹyekeme nditịn̄ ikọ ye uko emi otode esịt nnọ nditọ mmọ, “koro oto ke uyọhọ esịt ndien inua etịn̄.” (Luke 6:45; Deut. 6:5-7) Ndinyene utọ uko oro oyonụk mme ete ye eka n̄ko ndinịm uwụtn̄kpọ “ata mbuọtidem.”—2 Tim. 1:5.

Enen̄ede edi akpan n̄kpọ nditịn̄ ikọ ye uko ke ini ẹdomode mbuọtidem fo. Idem ekeme ndikpa nsan̄a ufọkn̄wed, andikpep, m̀mê nsan̄autom sia afo mûtieneke ubuana ke ndusụk usọrọ. Eti ibọrọ oro enyenede iwụk ekeme ndin̄wam enye owụt ukpono ọnọ idaha fo oro ọkọn̄ọde ke Bible. Nso edieke owo odomode nditap fi nsịn ke idiọk ido—unana edinam akpanikọ, edida n̄kpọsọn̄ ibọk ke idiọk usụn̄, m̀mê oburobụt ido idan̄? Edi akpan n̄kpọ nditịn̄ in̄wan̄-in̄wan̄ nte ke afo udubuanake ke utọ edinam oro ye nte ke ukeme ndomokiet oro ẹsịnde ndikpak fi idinamke fi okpụhọde ekikere. Emi oyom afo etịn̄ ikọ ye uko ke ini esịnde ekikere oro. Ke ini ekesịnde ndinam oburobụt ido ye n̄wan Potiphar, Joseph ama ọsọn̄ọ etịn̄ ete: “Ndinam didie ndien nnam akwa idiọk-n̄kpọ emi nnyụn̄ ndue Abasi?” Ke ini n̄wan oro okosụk eyịrede, Joseph ama efehe ọwọrọ ke ufọk.—Gen. 39:9, 12.

Nte Ẹwụtde Uko. Mme ikọ oro afo etịn̄de ẹkeme ndinam uko fo etịm owụt idem. Ke ediwak idaha mbemiso etịn̄de akpan n̄kpọ, Jesus ama esibem iso ọdọhọ ete: “Ke akpanikọ ke ndọhọ fi [mbufo] nte.” (John 3:3, 5, 11; 5:19, 24, 25) Paul ama owụt uko ke mme utọ ikọ nte “Mmetịm mbụre mfiọk,” “Mmọdiọn̄ọ nnyụn̄ mbụre mfiọk ke Ọbọn̄ Jesus,” ye “Ntịn̄ akpanikọ, nsụhu nsu.” (Rome 8:38; 14:14; 1 Tim. 2:7) Kaban̄a edisu ikọ esie, ndusụk ini Jehovah ama esinọ mme prọfet esie odudu spirit nditịn̄ ikọ oro owụtde nsọn̄uyo, utọ nte, “koro enye mîditreke ndidi.” (Hab. 2:3) Ke ini afo etịn̄de aban̄a mme ntịn̄nnịm ikọ emi, afo emekeme nditịn̄ ke ukem usụn̄ emi. Edieke afo eberide edem ke Jehovah idịghe ke idemfo, edieke afo onyụn̄ etịn̄de ikọ ọnọ mbon en̄wen ke edu ukpono, mme ikọ oro ẹwụtde utọ uko oro ẹyenọ uyarade nte ke afo emenyene ọkpọsọn̄ mbuọtidem.

Emekeme ndiwụt uko n̄ko ke ikọ oro afo etịn̄de ke ofụri esịt onyụn̄ esịnde udobi. Nte afo akamade iso, nte adade idem etịn̄ ikọ, ye nte ọwọn̄ọrede idem ẹtịp n̄kpọ ẹsịn ke emi, okposụkedi emi ekemede ndikpụhọde ke ndusụk udomo ye nsio nsio owo. Idem ọkpọkọm afo edi owo o-bụt m̀mê owo emi esitịn̄de ikọ sụn̄sụn̄, ke ini afo enen̄erede enịm ete ke se imọ itịn̄de edi akpanikọ ye nte ke oyom mbon efen ẹkop enye, uko fo oyowụt idem.

Nte ededi, ana mme ikọ ekededi oro nnyịn idade uko itịn̄ edi ke esịt akpanikọ. Edieke mme owo ẹkụtde ke nnyịn inam n̄kari utu ke nditịn̄ ikọ nto esịt, mmọ ẹkeme ndikere nte ke etop nnyịn inyeneke nsọn̄ọ. Ke ntre, ke akande kpukpru n̄kpọ, nam n̄kpọ ke ndammana usụn̄. Etienede nte otuowo fo okponde, ekeme ndiyom afo etịn̄ ikọ ke uyo oro okponde akan nte esitịn̄de onyụn̄ esịn odudu ke uyoikọ fo. Edi uduak fo ekpenyene ndidi nditịn̄ ikọ ke esịt akpanikọ ye ke ndammana usụn̄.

Mme Un̄wam ke Nditịn̄ Ikọ ye Uko. Sia uko fo abuanade nte afo ekerede aban̄a utịn̄ikọ fo, eti ntịmidem edi akpan n̄kpọ. Ndision̄o utịn̄ikọ nto n̄wed ndien ekem okot enye ọdọn̄ ke ibuot onyụn̄ etịn̄ ikemke. Oyom utịn̄ikọ oro enen̄ede an̄wan̄a fi tutu afo ekeme nditịn̄ enye nte ikọ idemfo. Ana afo enen̄ede enịm nte ke enye edi akpanikọ ye nte ke se afo etịn̄de enyene ufọn ọnọ otuowo fo. Emi ọwọrọ ete ke ini etịmde utịn̄ikọ fo, afo enyene ndikere mban̄a mme idaha mmọ ọkọrọ ye se mmọ ẹma ẹkefefiọk ẹban̄a ibuot nneme oro m̀mê se mmọ ẹkerede ẹban̄a enye.

Edi mmemmem n̄kpọ mbon en̄wen ndikụt uko nnyịn ke ini itịn̄de ikọ ọdọnọ. Ke ntre, ke adianade ye editịm eti utịn̄ikọ, nen̄ede kpep nte edinọde utịn̄ikọ fo. Nọ san̄asan̄a ntịn̄enyịn ke mme ikpehe utịn̄ikọ fo oro enen̄erede oyom anam utom man afo ekeme ndinọ utịn̄ikọ ye unana ediwụk enyịn ofụri ofụri ke n̄wed utịn̄ikọ fo. Ti, n̄ko, ndibọn̄ akam man Jehovah ọdiọn̄ ukeme fo. Ke usụn̄ emi afo ‘ayada uko ke Abasi nnyịn’ etịn̄ ikọ ke usụn̄ oro owụtde uko ete ke etop imọ edi akpanikọ ye akpan n̄kpọ.—1 Thess. 2:2.