Ibuot 24

N̄kpọ Ndomokiet Ikemeke “Ndidian̄ade Nnyịn ke Ima Abasi”

1. Nso etikwo etikwo ekikere ke ediwak owo ye idem mme ata Christian ẹsinyene?

NTE Jehovah Abasi ama fi ọkpọkpọ? Ndusụk owo ẹnyịme ẹte ke Abasi ama ubonowo ke ofụri ofụri, nte John 3:16 ọdọhọde. Edi ke nditịm ntịn̄, mmọ ẹkere ẹte: ‘Abasi ikemeke ndima mi ọkpọkpọ.’ Mme ata Christian ẹkam ẹkeme ndinyene utọ eyịghe emi ndusụk ini. Ke okopde editịmede esịt, eren kiet ọkọdọhọ ete: “Ọsọsọn̄ ami ndinịm nte ke Abasi ekere aban̄a mi ke baba usụn̄ kiet.” Nte afo emesinyene utọ eyịghe emi ndusụk ini?

2, 3. Anie oyom nnyịn inịm nte ke nnyịn iwọrọke n̄kpọ ke iso Jehovah, ke Jehovah inyụn̄ imaha nnyịn, ndien didie ke nnyịn ikeme ndikan utọ ekikere oro?

² Satan enen̄ede oyom ndinam nnyịn inịm nte ke Jehovah Abasi imaha nnyịn inyụn̄ idaha nnyịn ke n̄kpọ. Edi akpanikọ, Satan esiwak nditap mme owo ebe ke ndinam mmọ ẹtan̄ idem ẹkaha. (2 Corinth 11:3) Edi enye n̄ko esima ndibiat ukpono idemowo oro mbon mmemidem ẹnyenede. (John 7:47-49; 8:13, 44) Enye anam emi akpan akpan ke “ndiọk eyo emi.” Ediwak owo mfịn ẹto ubon oro ẹnanade “ima uduot owo.” Mbon eken ẹwak ndisobo mbon oro ẹtiede obom-obom, ẹdide ibụk, ye mbon nsọn̄ibuot. (2 Timothy 3:1-5) Ndisobo ibak ibak edinam, asari eke orụk, m̀mê usua ekeme ndinam utọ mbon oro ẹnen̄ede ẹnịm nte ke mmimọ iwọrọke n̄kpọ, owo inyụn̄ imaha mmimọ.

³ Edieke afo enyenede utọ etikwo etikwo ekikere oro, kûduọk idotenyịn. Ediwak nnyịn imesibiom idem nnyịn ikpe nte mîdotke ke ini ke ini. Edi ti ete ke ẹnọ Ikọ Abasi ‘ndinam owo ẹsan̄a nte enende’ nnyụn̄ ‘n̄wụri n̄kpọsọn̄ ekikere.’ (2 Timothy 3:16; 2 Corinth 10:4) Bible ọdọhọ ete: “Nnyịn . . . isọn̄ọ esịt ke iso Esie ke n̄kpọ eke esịt obiomde nnyịn: koro Abasi okponde akan esịt nnyịn, onyụn̄ ọfiọkde kpukpru n̄kpọ.” (1 John 3:19, 20) Ẹyak nnyịn ikere usụn̄ inan̄ oro N̄wed Abasi an̄wamde ‘ndisọn̄ọ nnyịn esịt’ nte ke Jehovah ama nnyịn.

Jehovah Abat fi ke N̄kpọ

4, 5. Didie ke uwụtn̄kpọ Jesus oro aban̄ade akaran̄abasi owụt ke nnyịn imọsọn̄ urua ke enyịn Jehovah?

⁴ Akpa, Bible ekpep nnennen nnennen ete ke Abasi ada asan̄autom esie kiet kiet ke ọsọn̄urua. Ke uwụtn̄kpọ, Jesus ama ọdọhọ ete: “Nte inyamke n̄kpri inuen [“akaran̄abasi,” NW] iba ke obubịt okụk kiet? ndien baba mmọ kiet iduọhọ ke isọn̄ ke mîtoho Ete mbufo: edi ẹmebat kpa kpukpru idet ibuot mbufo. Ẹkûfehe ndien; mbufo ẹmesọn̄ urua ẹkan ediwak n̄kpri inuen.” (Matthew 10:29-31) Kere se ikọ oro ọkọwọrọde ọnọ mme andikpan̄ utọn̄ nnọ Jesus ke akpa isua ikie.

⁵ Nnyịn imekeme ndikere ntak emi owo ekededi ekpedepde akaran̄abasi. Nte ededi, ke eyo Jesus akaran̄abasi ekemem urua akan ke otu inuen oro ẹkesinyamde nte n̄kpọudia. Tịm fiọk ete ke owo ama ekeme ndida ekpri obubịt okụk kiet ndep akaran̄abasi iba. Edi Jesus ama etịn̄ ke ukperedem ete ke edieke owo ekeben̄ede idem ndibiat obubịt okụk iba nda ndep, utu ke ndinọ enye akaran̄abasi inan̄, ẹdinọ enye ition. Ẹkedian ọyọhọ inuen ition oro nte n̄kpọ eke enye mîwọrọke n̄kpọ ndomokiet. Eyedi owo ikadaha mme utọ edibotn̄kpọ oro ke n̄kpọ, edi didie ke Andibot akabat mmọ? Jesus ọkọdọhọ ete: “Abasi ifreke ndomo mmọ kiet [ọkpọkọm enye oro ẹkedoride nte udori do].” (Luke 12:6, 7) Se Jesus eketịn̄de ekeme ndin̄wan̄a nnyịn ke emi. Edieke Jehovah adade akaran̄abasi kiet kpọt ke akpan n̄kpọ ntre, adan̄a didie akan oro ke owo ọsọn̄ urua! Nte Jesus akanamde an̄wan̄a, Jehovah ọfiọk kpukpru n̄kpọ aban̄a nnyịn. Kamse, enye abat kpukpru idet ibuot nnyịn!

6. Nnyịn isan̄a didie ifiọk ke ikọ Jesus aban̄ade edibat idet ibuot nnyịn ekedi ata idem n̄kpọ?

⁶ Nte ẹbat idet ibuot nnyịn? Ndusụk owo ẹkeme ndikere ke ikọ Jesus mi ikedịghe ata idem n̄kpọ. Edi, kere ise ban̄a idotenyịn ediset ke n̄kpa. Ana Jehovah enen̄ede ọdiọn̄ọ nnyịn man otodo enye ekeme ndifiak mbot nnyịn! Enye ada nnyịn ke ọsọn̄urua n̄kpọ tutu enye ekeme nditi kpukpru ntọt ẹban̄ade nnyịn, ẹsịnede nsenubon nnyịn ye ofụri n̄kpọ oro imụmde idọn̄ ke ibuot ye ifiọk eyouwem nnyịn.a Ndibat idet ibuot nnyịn—emi ibuot owo kiet enyenede n̄kpọ nte idet 100,000—edidi ata ekpri n̄kpọ ke ẹmende ẹdomo.

Nso ke Jehovah Okụt ke Idem Nnyịn?

7, 8. (a) Nso idi ndusụk edu oro Jehovah adarade ndikụt nte enye odụn̄ọrede esịt owo? (b) Nso idi ndusụk utom oro nnyịn inamde oro Jehovah abatde ke ọsọn̄urua n̄kpọ?

⁷ Ọyọhọ iba, Bible ekpep nnyịn se Jehovah abatde nte akpan n̄kpọ ke idem mme asan̄autom esie. Ke nditịn̄ ibio ibio, enye adat esịt aban̄a nti edu nnyịn ye ukeme oro nnyịn isịnde. Edidem David ọkọdọhọ eyen esie Solomon ete: “Jehovah odụn̄ọde kpukpru esịt owo, onyụn̄ etịm ọfiọk kpukpru se ekikere obotde.” (1 Chronicles 28:9) Nte Abasi odụn̄ọrede esịt ediwak biliọn owo ke ererimbot emi ọyọhọde ye afai ye usua mi, anaedi esịt esinem enye didie ntem ke ini enye okụtde esịt oro amade emem, akpanikọ, ye edinen ido! Nso itịbe ke ini Abasi okụtde esịt oro enen̄erede ama enye, oro oyomde ndikpep mban̄a enye nnyụn̄ mbuana utọ ifiọk oro ye mbon en̄wen? Jehovah anam nnyịn idiọn̄ọ nte ke imọ imọfiọk mbon oro ẹtịn̄de ẹnọ mmọ efen ẹban̄a imọ. Enye akam enyene “n̄wed editi” ọnọ kpukpru “mme abak Jehovah ye mme ẹkere enyịn̄ esie.” (Malachi 3:16) Mme utọ edu oro ẹsọn̄ urua ke enyịn esie.

⁸ Nso idi ndusụk nti utom oro Jehovah abatde ke ọsọn̄urua n̄kpọ? Enye edi ukeme oro nnyịn isịnde ndikpebe Eyen esie, Jesus Christ. (1 Peter 2:21) Akpan utom kiet oro Jehovah abatde ke ọsọn̄urua n̄kpọ edi edisuan eti mbụk Obio Ubọn̄ esie. Ke N̄wed Mbon Rome 10:15, nnyịn ikot ite: “Ikpat mmọ emi ẹdade etop nti n̄kpọ [“eti mbụk,” NW] ẹye adan̄a didie!” Ekeme ndidi nnyịn isikereke ite ke ikpat nnyịn oro ẹdude ke usụhọde idaha “ẹye.” Edi mi mmọ ẹda ẹban̄a ukeme oro mme asan̄autom Jehovah ẹsịnde ndikwọrọ eti mbụk. Ofụri utọ ukeme oro ẹye ẹnyụn̄ ẹsọn̄ urua ke enyịn esie.—Matthew 24:14; 28:19, 20.

9, 10. (a) Ntak emi nnyịn ikemede nditịm nnịm nte ke Jehovah abat ime nnyịn ke nsio nsio idomo ke ọsọn̄urua n̄kpọ? (b) Nso etikwo etikwo ekikere ke akanam Jehovah mînyeneke iban̄a mme anam-akpanikọ asan̄autom esie?

⁹ Jehovah abat n̄ko ime nnyịn ke ọsọn̄urua n̄kpọ. (Matthew 24:13) Ti ete ke Satan oyom afo akpa edem owụt Jehovah. Usen kiet kiet oro afo ọsọn̄ọde ada anam akpanikọ ọnọ Jehovah an̄wam ndinọ ibọrọ ke isụn̄i Satan. (Mme N̄ke 27:11) Ndusụk ini edime ime isidịghe mmemmem n̄kpọ. Mme mfịna unana nsọn̄idem, unana okụk, mfụhọ eke ntụk, ye mme n̄kpọ ubiọn̄ọ eken ẹkeme ndinam usen kiet kiet etie idomo idomo. Mme n̄kpọ nditre nditịbe nte ẹkedoride enyịn ẹban̄a ekeme ndikama mmemidem n̄ko. (Mme N̄ke 13:12) Ndiyọ mme utọ idomo oro enen̄ede edi ọsọn̄urua n̄kpọ ọnọ Jehovah. Ntak edi oro Edidem David ọkọdọhọde Jehovah ete ada mmọn̄eyet imọ esịn ke “ekpeme,” ekem enye ama obụp ye ọyọhọ mbuọtidem ete, “Nte mmọ idụhe ke n̄wed fo?” (Psalm 56:8) Ke akpanikọ, Jehovah eti onyụn̄ abat ke ọsọn̄urua kpukpru mmọn̄eyet ye ndutụhọ oro nnyịn iyọde ke ndika iso nnam akpanikọ nnọ enye. Mmọ n̄ko ẹdi ọsọn̄urua n̄kpọ ke enyịn esie.

¹⁰ Edi, esịt oro obiomde idemesie ikpe ekeme nditre ndikụt utọ uyarade oro owụtde nte nnyịn isọn̄de urua ke enyịn Abasi. Enye ekeme ndiyịre ndọhọ nnyịn ete: ‘Edi ata ediwak owo ẹdu oro ẹnịmde nti uwụtn̄kpọ ẹkan mi. Enyene ndidi Jehovah okụt edikpu didie ntem ke ini enye emende mi odomo ye mmọ!’ Jehovah imenke owo kiet idomo ye owo efen; enye inyụn̄ ikereke n̄kpọ etikwo etikwo m̀mê nsọn̄ido nsọn̄ido. (Galatia 6:4) Enye ada ata mbufiọk odụn̄ọde esịt nnyịn, ndien enye abat nti edu oro enye okụtde ke ọsọn̄urua n̄kpọ—ọkpọkọm ekpri adan̄a didie.

Jehovah Asat Nti Osion̄o ke Idiọk

11. Nso ke nnyịn ikeme ndikpep mban̄a Jehovah ke usụn̄ oro enye akanamde n̄kpọ ye Abijah?

¹¹ Ọyọhọ ita, nte Jehovah odụn̄ọrede nnyịn, enye etịn̄ enyịn asat nti edu. Ke uwụtn̄kpọ, ke ini Jehovah ọkọnọde ewụhọ ete ke ẹnyene ndisobo ofụri ọsọn̄-ibuot udịm ubọn̄ Edidem Jeroboam, Enye ama ọnọ uyo ete ẹbụk kiet kpọt ke otu nditọ edidem oro, Abijah, ukpono ukpono. Ntak-a? “Se Jehovah Abasi Israel esede ke eti n̄kpọ [ama] odu enye ke esịt.” (1 Ndidem 14:1, 10-13) Ke nditịm ntịn̄, Jehovah ama odụn̄ọde esịt akparawa emi onyụn̄ okụt “eti n̄kpọ” do. Ọkpọkọm eti n̄kpọ oro ekekpri didie, Jehovah ama abat enye nte se idotde ẹwet ẹnịm ke Ikọ esie. Enye ama onyụn̄ ọnọ utịp, owụtde owo kiet oro ke ubon nsọn̄ibuot emi mbọm oro odotde.

12, 13. (a) Didie ke uwụtn̄kpọ Edidem Jehoshaphat owụt nte ke Jehovah oyom nti edu ke idem nnyịn idem ke ini nnyịn inamde idiọkn̄kpọ? (b) Kaban̄a nti utom ye edu nnyịn, didie ke Jehovah anam n̄kpọ nte ima ima Ete?

¹² Ẹkeme ndikụt uwụtn̄kpọ oro akam edide ata n̄wọrọnda ke eti Edidem Jehoshaphat. Ke ini edidem emi akanamde ndisịme ido, prọfet Jehovah ama ọdọhọ enye ete: “Emi esịn Jehovah ọtọhọ utọk ye afo.” Nso enyene-ndịk ikọ ke emi ekedi ntem! Edi etop Jehovah iketreke do. Enye ama aka iso ete: “Edi ẹmekụt nti n̄kpọ ke idem fo.” (2 Chronicles 19:1-3) Ntem edinen iyatesịt Jehovah ikanamke enye etre ndikụt nti n̄kpọ ke idem Jehoshaphat. Emi okpụhọde didie ntem ye mme anana-mfọnmma owo! Ke ini mbon en̄wen ẹyatde nnyịn esịt, oro ekeme ndinam nnyịn itre ndikụt nti edu oro mmọ ẹnyenede. Ndien ke ini nnyịn inamde idiọk, edikpu oro ikụtde, bụt, ye ubiomikpe ẹkeme ndibiọn̄ọ nnyịn ndikụt nti edu nnyịn. Nte ededi, ti ete ke edieke nnyịn ituade n̄kpọfiọk ke idiọkn̄kpọ nnyịn inyụn̄ idomode ọkpọsọn̄ nditre mmọ, Jehovah eyefen ọnọ nnyịn.

¹³ Nte Jehovah odụn̄ọrede fi, enye osio mme utọ idiọkn̄kpọ oro efep, ukem nte mbon oro ẹyomde gold ẹsatde n̄kwaitiat oro mînyeneke ufọn ẹsion̄o. Nso kaban̄a nti edu ye utom fo? Ih, mmọ emi ẹdi “mme akpan n̄kpọ” oro enye etịmde obon. Nte akanam afo omokụt usụn̄ oro ndusụk ima ima ete ye eka ẹsitịmde ẹnịm mme mbuwed m̀mê mme utom ufọkn̄wed nditọ mmọ, ndusụk ini ke ediwak isua ke nditọ mmọ ẹma ẹkefre? Jehovah edi ata ima ima Ete. Adan̄a nte nnyịn ikade iso inam akpanikọ inọ enye, tutu amama enye idifreke nti utom ye nti edu nnyịn. Ke akpanikọ, enye edida nte ke edi ukwan̄n̄kpọ ndifre mmọ, ndien akananam enye inamde ukwan̄n̄kpọ. (Mme Hebrew 6:10) Enye n̄ko odụn̄ọde nnyịn ke usụn̄ efen.

14, 15. (a) Ntak emi unana mfọnmma nnyịn mînamke Jehovah etre ndikụt nti edu ke idem nnyịn-e? Nam an̄wan̄a. (b) Nso ke Jehovah edinam ye nti edu oro enye okụtde ke idem nnyịn, ndien didie ke enye ese mme anam-akpanikọ ikọt esie?

¹⁴ Jehovah ese ebe unana mfọnmma nnyịn onyụn̄ okụt nti edu oro nnyịn ikemede ndinyene. Ke ndinam an̄wan̄a: Mme owo oro ẹmade mme utomusọ esisịn ofụri ukeme ndifiak ndiọn̄ mme mbuwed m̀mê mme utomusọ eken emi ẹkebiarade idiọk idiọk. Ke uwụtn̄kpọ, ke ini owo kiet okotopde ikan̄ abiat ndise Leonardo da Vinci emi akakpade n̄kpọ nte miliọn $30, ke Itie Ubon Ndise Idụt ke London, England, owo ndomokiet ikọdọhọke ite sia ẹma ẹkebiat mbuwed oro ke emi, yak ẹtop enye ẹduọk. Ẹma ẹsọsọp ẹtọn̄ọ utom edifiak ndiọn̄ ediye mbuwed emi ama ekebịghi ke n̄kpọ nte isua 500 mi. Ntak-a? Koro enye ekedide ọsọn̄urua n̄kpọ ke enyịn mbon oro ẹmade utomusọ. Nte afo usọn̄ke urua ukan mbuwed oro ẹdade ndom ye n̄kan̄ ẹwet? Afo emenen̄ede ọsọn̄ urua ke enyịn Abasi—inamke n̄kpọ m̀mê unana-mfọnmma oro ikadade imana abiat fi adan̄a didie. (Psalm 72:12-14) Jehovah Abasi, kpa enyene-usọ Andibot ekpụk ubonowo, ayanam se ẹyomde man afiak ada kpukpru mbon oro ẹnyịmede ima ima ukpeme esie ekesịm mfọnmma.—Utom 3:21; Rome 8:20-22.

¹⁵ Ih, Jehovah okụt nti edu ke idem nnyịn oro nnyịn mîkemeke ndikụt. Ndien nte nnyịn inamde n̄kpọ esie, enye ayanam eti edu oro ọkọri tutu nnyịn ikabade idi mfọnmma ke akpatre. Inamke n̄kpọ m̀mê ererimbot Satan anam n̄kpọ didie ye nnyịn, Jehovah abat mme anam-akpanikọ asan̄autom esie ke ọsọn̄urua.—Haggai 2:7.

Jehovah Ananam Ima Esie Owụt

16. Nso idi n̄kponn̄kan uyarade nte ke Jehovah ama nnyịn, ndien nnyịn isan̄a didie ifiọk ke enọ emi enyene nnyịn san̄asan̄a?

¹⁶ Ọyọhọ inan̄, Jehovah anam ekese ndiwụt ima oro enye amade nnyịn. Ke akpanikọ, uwa ufak Christ edi ata n̄kem n̄kem ibọrọ ọnọ nsu Satan oro nte ke nnyịn iwọrọke n̄kpọ m̀mê nte ke nnyịn idotke se ẹmade. Nnyịn ikpenyeneke ndifre nte ke ubiak ubiak n̄kpa Jesus ke eto ndutụhọ ye idem akakan ubiak oro Jehovah ọkọyọde nte enye ekesede nte edima Eyen esie akpade, kpukpru emi ẹdi uyarade ima oro mmọ ẹmade nnyịn. Ke mfụhọ, ediwak owo inịmke ke akpanikọ nte ke enọ emi enyene mmimọ san̄asan̄a. Mmọ ẹkere ke mmimọ idotde. Nte ededi, ti ete ke apostle Paul ekedi andikọbọ mme anditiene Christ. Edi, enye ama ewet ete: ‘Eyen Abasi, emi akamama mi, onyụn̄ ayak Idem Esie ọnọ aban̄a mi.’—Galatia 1:13; 2:20.

17. Nso ke Jehovah ada odụri nnyịn ọnọ idemesie ye Eyen esie?

¹⁷ Jehovah owụt ke imọ imama nnyịn ebe ke ndin̄wam nnyịn owo kiet kiet ibọ ufọn ito uwa Christ. Jesus ọkọdọhọ ete: “Baba owo kiet ikemeke nditiene Mi, ibọhọke Ete emi ọkọdọn̄de Mi odụri enye edi.” (John 6:44) Ih, Jehovah ke idemesie odụri nnyịn ọnọ Eyen esie onyụn̄ ọnọ nnyịn idotenyịn nsinsi uwem. Didie? Ebe ke utom ukwọrọikọ, emi esịmde nnyịn owo kiet kiet, onyụn̄ ebe ke edisana spirit esie, emi enye adade ndin̄wam nnyịn ifiọk inyụn̄ ida mme akpanikọ eke spirit inam n̄kpọ kpa ye mme mmeme ye unana mfọnmma nnyịn. Ke ntre Jehovah ekeme nditịn̄ mban̄a nnyịn nte enye eketịn̄de aban̄a Israel ete: “Mmama fi nsinsi ima: mmọdo mfọnde ido ye afo mbịghi.”—Jeremiah 31:3.

18, 19. (a) Nso idi ata ntotụn̄ọ usụn̄ oro Jehovah owụtde ima oro enye amade nnyịn, ndien nso iwụt nte ke enye anam emi ke idemesie? (b) Didie ke Ikọ Abasi ọnọ nnyịn nsọn̄ọ nte ke Jehovah edi andikpan̄ utọn̄ oro enịmde idem ke itie owo efen?

¹⁸ Ebede ke ifet edibọn̄ akam ke nnyịn ikeme ndikụt ima Abasi ke ata ntotụn̄ọ usụn̄. Bible esịn udọn̄ ọnọ nnyịn kiet kiet ete ‘ikûdop ndibọn̄ akam’ nnọ Abasi. (1 Thessalonica 5:17) Enye esikpan̄ utọn̄. Ẹkam ẹkot enye “Andikop akam.” (Psalm 65:2, NW) Enye iyakke utom emi inọ owo ndomokiet efen, ikam inọhọ Eyen esie. Kam kere: Andibot ekondo esịn udọn̄ ọnọ nnyịn ete isan̄a ikpere imọ ifụre ifụre ke akam. Ndien nso utọ andikpan̄ utọn̄ ke enye edi? Ndi enye edi ndebe ndebe owo oro mîkereke iban̄a? Baba-o.

¹⁹ Jehovah esinịm idem ke itie owo en̄wen. Nso idi edinịm idem ke itie owo en̄wen? Anam-akpanikọ Christian kiet emi ama ọkọsọn̄ ọkọdọhọ ete: “Edinịm idem ke itie owo en̄wen edi ubiak fo oro n̄kopde ke esịt mi.” Nte ubiak nnyịn enen̄ede otụk Jehovah? Nnyịn ikot iban̄a ndutụhọ oro ikọt esie Israel ẹkesobode ite: “Ke ofụri ukụt mmọ [enye ama okop mfụhọ, NW].” (Isaiah 63:9) Jehovah ama okụt ukụt mmọ; enye ama ekere aban̄a mmọ. Ikọ oro Jehovah eketịn̄de aban̄a mme asan̄autom esie anam an̄wan̄a nte ekenen̄erede otụk enye: “Enye emi otụkde mbufo otụk eyen enyịn [mi, NW].”b (Zechariah 2:8) Nso ubiak ke oro akpakama ntem! Ih, Jehovah ekere aban̄a nnyịn. Ke ini nnyịn ikopde ubiak, enye okop ubiak n̄ko.

20. Nso ekikere oro mîwụtke eti ibuot ke ana nnyịn ifep edieke nnyịn iyomde ndinam item oro ẹkụtde ke N̄wed Mbon Rome 12:3?

²⁰ Idụhe Christian ndomokiet oro enyenede eti ibuot emi akpadade utọ uyarade ima oro Abasi amade mme asan̄autom esie ke ndibat mmọ ke ọsọn̄urua nte isọn̄ nditan̄ idem m̀mê nditoro idem. Apostle Paul ekewet ete: “Nda mfọn eke ẹkenọde mi ndọhọ kpukpru owo ke otu mbufo, nte enye okûkere ete idi n̄kpọ ikan nte ekpekerede: edi yak enye ekere aban̄a idem esie nte enyene ibuot owo ekpekerede, nte ekemde ye idomo mbuọtidem eke Abasi ọkọnọde owo kiet kiet.” (Rome 12:3) Edikabade efen ọdọhọ ete: “N̄kpama ndidọhọ kpukpru mbufo nte owo okûbat idemesie ke n̄kpọ akan se enye edide, edi yak enye akam abat idem ke usụhọde.” (A Translation in the Language of the People, eke Charles B. Williams) Ntre ke adan̄aemi nnyịn idarade ufiop ufiop ima Ete nnyịn eke heaven, ẹyak nnyịn inyene eti ibuot inyụn̄ iti ite ke nnyịn ibọhọ ima Abasi nte utịp utom nnyịn m̀mê sia nnyịn idotde.—Luke 17:10.

21. Ewe nsu Satan ke ana nnyịn ika iso in̄wana ibiọn̄ọ, ndien ewe ikọ akpanikọ Abasi ke nnyịn ikeme ndika iso nda nsọn̄ọ idem nnyịn esịt?

²¹ Ẹyak nnyịn owo kiet kiet inam se ikekeme ndisịn kpukpru nsu Satan, ọkọrọ ye nsu esie oro nte ke nnyịn iwọrọke n̄kpọ m̀mê ndidot se ẹmade. Edieke se afo osobode ke uwem ekpepde fi ndise idemfo nte akaka n̄kpọ ubiọn̄ọ oro anamde akwa ima Abasi okûsịm fi, m̀mê anamde fi ekere ke nti utom imọ ẹkpri ẹkaha tutu enyịn esie oro okụtde kpukpru n̄kpọ ikemeke ndikụt, m̀mê anamde ekere nte ke mme idiọkn̄kpọ imọ ẹnen̄ede ẹkponi tutu n̄kpa ọsọn̄urua Eyen esie ikam ikemeke ndifụk, oro edi nsu. Sio utọ nsu oro ofụri ofụri fep ke esịt fo! Ẹyak nnyịn ika iso ida akpanikọ oro ẹkụtde ke mme ikọ Paul eke odudu spirit emi isọn̄ọ idem nnyịn esịt: “Koro mmetịm mbụre mfiọk nte, n̄kpa ye uwem, ye mme angel ye mbọn̄, ye n̄kpọ eke ẹdude ke emi, ye n̄kpọ eke ẹdidide, ye mme odudu, ye ukon̄ ye utụn̄ọ, ye n̄kpọ efen ekededi eke ẹbotde, idikemeke ndidian̄ade nnyịn ke ima Abasi, emi odude ke Christ Jesus Ọbọn̄ nnyịn.”—Rome 8:38, 39.

[Mme Ikọ idakisọn̄]

Mme Mbụme Nditie N̄kere

Psalm 139:1-24 Didie ke mme ikọ odudu spirit eke Edidem David ẹwụt ke Jehovah enen̄ede enyene udọn̄ ke idem nnyịn owo kiet kiet?

Isaiah 43:3, 4, 10-13 Didie ke Jehovah ese Mme Ntiense esie, ndien didie ke mme edinam esie ẹwụt ekikere esie?

Rome 5:6-8 Ntak emi nnyịn ikemede ndinịm ke akpanikọ nte ke idaha idiọkn̄kpọ nnyịn ikemeke ndibiọn̄ọ ima Jehovah ndisịm nnyịn nnyụn̄ nnọ nnyịn ufọn?

Jude 17-25 Didie ke nnyịn ikeme ndika iso mbọ ima Abasi, ndien ewe odudu ọbiọn̄ọ nnyịn ndinam oro?

[Ndise ke page 243]

‘Mbufo ẹmesọn̄ urua ẹkan ediwak akaran̄abasi.’

[Ndise ke page 245]

Jehovah abat ime nnyịn ke idak idomo ke ọsọn̄urua n̄kpọ