Ibuot Kiet
Edidianakiet ke Utuakibuot ke Eyo Nnyịn—Nso ke Enye Ọwọrọ?
1, 2. (a) Nso akama-nduaidem edinam ada itie ke eyo nnyịn? (b) Nso utịbe utịbe idotenyịn ke mbon esịt akpanikọ ẹnyene?
AKAMA-NDUAIDEM edinam aban̄ade edidianakiet ke utuakibuot odu ke ofụri ererimbot. Enye ke atan̄ ediwak miliọn owo ẹtode kpukpru idụt, esien, ye usem obok ọtọkiet. Ke ẹtan̄ ediwak owo efen efen ẹbok ke isua ke isua. Ẹfiọk mmọ emi ke Bible nte mme “ntiense” Jehovah ẹnyụn̄ ẹkot mmọ “akwa otu owo.” Mmọ ẹnam n̄kpọ ẹnọ Abasi ke “uwemeyo ye okoneyo.” (Isaiah 43:10-12; Ediyarade 7:9-15) Ntak mmọ ẹnamde emi? Koro mmọ ẹmedi ẹdifiọk Jehovah nte ata Abasi kierakiet. Emi esịn udọn̄ ọnọ mmọ ndinam uwem mmọ ekekem ye ndinen usụn̄ esie. N̄ko, mmọ ẹmefiọk ẹte ke nnyịn idu ke “ukperedem ini” eke idiọk ererimbot emi odude ke emi, nte ke Abasi oyosobo enye efep ke mîbịghike, ye nte ke enye ayanam paradise obufa ererimbot esie ada itie idiọk ererimbot emi.—2 Timothy 3:1-5, 13; 2 Peter 3:10-13.
2 Ikọ Abasi ọn̄wọn̄ọ ete: “Koro osụk esisịt idiọk owo ididụhe . . . Edi mbon nsụkidem ẹyeda isọn̄ ẹnyene; ediwak emem ẹyenyụn̄ ẹnem mmọ esịt.” (Psalm 37:10, 11) “Nti owo ẹyeda isọn̄ ẹnyene, ẹnyụn̄ ẹdụn̄ ke esịt ke nsinsi.” (Psalm 37:29) “[Abasi] ọyọkwọhọde kpukpru mmọn̄eyet ke enyịn mmọ efep. N̄kpa idinyụn̄ idụhe aba; eseme ye ntuan̄a ye ubiak idinyụn̄ idụhe aba; koro ebe-iso n̄kpọ ẹma ẹbe ẹfep.”—Ediyarade 21:4.
3. Ẹsan̄a didie ẹnyene ata edidianakiet ke utuakibuot?
3 Mbon oro ẹdianade kiet idahaemi ke utuakibuot akpanikọ ẹdidi akpa mme andidụn̄ ke obufa ererimbot oro. Mmọ ẹkpep se uduak Abasi edide ke ẹnyụn̄ ẹnam enye ke ofụri ukeme mmọ. Ke ndiwụt nte emi edide akpan n̄kpọ, Jesus ọkọdọhọ ete: “Ndien nsinsi uwem oro edi ndifiọk fi, ata Abasi kierakiet, ye Enye emi Afo ọkọdọn̄de, kpa Jesus Christ.” (John 17:3) Apostle John ekewet ete: “Ererimbot ke ebebe efep, ye mbumek esie; edi owo eke anamde se Abasi amade ododu ke nsinsi.”—1 John 2:17.
Se Enye Enen̄erede Ọwọrọ
4. (a) Nso ke editan̄ ediwak owo mbok ke utuakibuot oro adianade kiet ke eyo nnyịn enen̄ede ọwọrọ? (b) Didie ke Bible anam editan̄ mbok emi an̄wan̄a?
4 Nso ke editan̄ ediwak owo mbok ke utuakibuot oro adianade kiet ke eyo nnyịn enen̄ede ọwọrọ? Enye edi in̄wan̄-in̄wan̄ uyarade nte ke nnyịn imenen̄ede ikpere utịt idiọk ererimbot emi, ndien obufa ererimbot Abasi ọyọtọn̄ọ usọp usọp ke oro ebede. Nnyịn imokụt nte mme ntịn̄nnịm ikọ Bible oro ẹkebemde iso ẹtịn̄ ẹban̄a akpan editan̄ mbok emi ẹsude. Kiet ke otu utọ ntịn̄nnịm ikọ oro ọdọhọ ete: “Ama ekem ke akpatre ini oro [ukperedem ini emi], obot ufọk Jehovah [utuakibuot akpanikọ esie oro ẹmenerede ke enyọn̄] oyowụhọ ke ibuot ikpọ obot [okon̄de akan orụk utuakibuot efen ekededi], . . . ndien mme idụt ẹyebụn̄ọ ẹka do. Ndien ediwak mme idụt ẹyeka ẹkedọhọ, ẹte, Ẹdi, nnyịn idọk ke obot Jehovah, ye ke ufọk Abasi Jacob; ndien Enye ayada usụn̄ esie ekpep nnyịn, nnyịn iyonyụn̄ isan̄a ke ọkpọ-usụn̄ esie.”—Micah 4:1, 2; Psalm 37:34.
5, 6. (a) Didie ke edi akpanikọ nte ke mme idụt ke ẹwọn̄ọde ẹbịne Jehovah? (b) Mme mbụme ewe ke nnyịn ikpobụp idem nnyịn?
5 Ke adan̄aemi ofụri idụt mîkaha ufọk utuakibuot Jehovah eke spirit, ediwak miliọn owo ẹtode kpukpru idụt ke ẹnam ntre. Nte mmọ ẹkpepde ẹban̄a ima ima uduak ye nti edu Jehovah Abasi, emi enen̄ede otụk esịt mmọ. Mmọ ẹsụhọde idem ẹyom ndifiọk se Abasi oyomde oto mmimọ. Akam mmọ ebiet eke andiwet psalm emi ọkọdọhọde ete: “Teme mi ndinam se afo amade: koro afo edide Abasi mi.”—Psalm 143:10.
6 Nte afo omokụt idemfo ke otu akwa otuowo emi Jehovah atan̄de obok ọtọkiet idahaemi ke utuakibuot oro adianade kiet? Ndi usụn̄ oro afo anamde n̄kpọ aban̄a item oro afo ọbọde oto Ikọ esie owụt ete ke afo emenen̄ede ọfiọk ke enye oto Jehovah? Adan̄a didie ke afo ‘edisan̄a ke ọkpọ-usụn̄ esie’?
Nte Ẹsan̄ade Ẹnyene Enye
7. (a) Ke nso udomo ke ẹdinyene edidianakiet ke utuakibuot ke akpatre? (b) Ntak edide usọp usọp n̄kpọ ndikabade ndi andituak ibuot nnọ Jehovah idahaemi, ndien didie ke nnyịn ikeme ndin̄wam mbon en̄wen ẹnam oro?
7 Uduak Jehovah edi man kpukpru mme enyene-ifiọk edibotn̄kpọ ẹdiana kiet ke utuakibuot akpanikọ. Nnyịn iyom usen emi kpukpru owo oro ẹdude uwem ẹdikponode ata Abasi kierakiet didie ntem! (Psalm 103:19-22) Edi mbemiso oro ekemede nditịbe, Jehovah enyene ndisobo kpukpru mbon oro ẹsịnde ndinam ndinen uduak esie, mfep. Ke ntak mbọm, enye ọnọ mbemiso ntọt aban̄a se enye edinamde, man mme owo ke kpukpru ebiet ẹkeme ndinyene ifet ndikpụhọde usụn̄ uwem mmọ. (Isaiah 55:6, 7) Ntem ke eyo nnyịn, ẹsịn usọp usọp eben̄e emi ẹnọ “kpukpru idụt ye esien ye usem ye obio” ẹte: “Mbufo ẹten̄e Abasi, ẹnyụn̄ ẹnọ Enye ubọn̄; koro ekem ini ikpe Esie; ẹnyụn̄ ẹtuak ibuot ẹnọ Enye emi okobotde enyọn̄ ye isọn̄ ye inyan̄ ye idịm mmọn̄.” (Ediyarade 14:6, 7) Nte afo emeyere ikot oro? Ke edide ntre, edi ifet fo n̄ko ndikot mbon en̄wen ẹdi ẹdidiọn̄ọ ẹnyụn̄ ẹtuak ibuot ẹnọ ata Abasi.
8. Ke ima ikekpep mme akpan ukpepn̄kpọ Bible, nso n̄kaiso n̄kọri ke nnyịn ikpodomo ndinam ifịk ifịk?
8 Jehovah iyomke utuakibuot mme owo oro ẹdọhọde ke imenịm imọ ke akpanikọ edi ekem ẹka iso ndibịne mme ọkpọkpọ udọn̄ idemmọ. Abasi oyom mme owo ẹsịm “ifiọk uduak Esie” ẹnyụn̄ ẹwụt emi ke uwem mmọ. (Colossae 1:9, 10) Ntem, mbon oro ẹwụtde esịtekọm emi ẹkpepde mme akpan ukpepn̄kpọ Bible ẹyom ndikọri nsịm ọyọhọ idaha Christian. Udọn̄ mmọ edi ndidiọn̄ọ Jehovah ata ntotụn̄ọ ntotụn̄ọ, ndinam ifiọk oro mmọ ẹnyenede ẹban̄a Ikọ esie atara onyụn̄ otụn̄ọ, ndinyụn̄ nda enye nsịn ke edinam ke uwem mmọ ata ọyọhọ ọyọhọ. Mmọ ẹyom ndiwụt mme edu Ete nnyịn eke heaven, nnyụn̄ nse mme n̄kpọ nte enye esede. Emi esịn udọn̄ ọnọ mmọ ndiyom mme usụn̄ ndibuana ke utom unyan̄a uwem oro enye ọdọhọde ẹnam ke isọn̄ ke eyo nnyịn. Nte ọdọn̄ fi ndinam ntre n̄ko?—Mark 13:10; Mme Hebrew 5:12–6:3.
9. Mme usụn̄ ewe ke ẹkeme ndinyene ata edidianakiet idahaemi?
9 Bible owụt ete ke mbon oro ẹnamde n̄kpọ Jehovah ẹnyene ndidiana kiet. (Ephesus 4:1-3) Edidianakiet emi enyene ndidu idahaemi, idem okposụkedi nnyịn idude uwem ke ererimbot emi abaharede inyụn̄ ikade iso ndin̄wana ye mme unana mfọnmma nnyịn. Jesus ọkọbọn̄ akam ifịk ifịk eben̄e ete kpukpru mbet imọ ẹdi kiet, ẹnen̄ede ẹdiana kiet. Nso ke emi ediwọrọ? Akpa, nte ke mmọ ẹyenyene eti itie ebuana ye Jehovah ye Eyen esie. Ọyọhọ iba, nte ke mmọ ẹyediana ye kiet eken. (John 17:20, 21) Man ẹnam oro, esop Christian edi esop emi Jehovah adade eteme ikọt esie.
Mme N̄kpọ Ewe Ẹtịp Ẹsịn ke Edidianakiet?
10. (a) Nso ke nnyịn ikọri ke ini nnyịn ke idem nnyịn idade Bible ibọrọ mbụme oro ẹtụkde nnyịn? (b) Dụn̄ọde mme n̄kpọ oro ẹtịpde ẹsịn ke edidianakiet Christian ke ndibọrọ mme mbụme oro ẹbụpde ke ikpehe ekikere emi.
10 Ẹwụt akpan n̄kpọ itiaba oro ẹtịpde ẹsịn ke edidianakiet ke utuakibuot ke idak emi. Nte afo ọbọrọde mme mbụme emi ẹtienede, kere ban̄a nte akpan n̄kpọ kiet kiet otụkde itie ebuana fo ye Jehovah ye ekemmọ mme Christian. Ndikere mban̄a mme akpan n̄kpọ emi nnyụn̄ nse mme itie N̄wed Abasi oro ẹsiakde-siak ẹsịn edi owo mîkotke-kot isịn ẹyetịp n̄kpọ ẹsịn ke afo ndikọri ọniọn̄ Abasi, ukeme ukere n̄kpọ, ye mbufiọk—kpa mme edu emi kpukpru nnyịn iyomde. (Mme N̄ke 5:1, 2; Philippi 1:9-11) Kere ban̄a mme n̄kpọ emi ke adiana ke adiana.
(1) Nnyịn imenyịme unen Jehovah ndinịm idaha aban̄ade eti ye idiọk. “Buọt idem fo ye Jehovah ke ofụri esịt fo; ndien kûberi edem ke asian fo. Diọn̄ọ enye ke kpukpru usụn̄ fo, ndien enye eyenen̄ede usụn̄ fo enịm.”—Mme N̄ke 3:5, 6.
Ntak emi nnyịn ikpoyomde item ye ndausụn̄ Jehovah ke ini inamde mme ubiere? (Psalm 146:3-5; Isaiah 48:17)
(2) Nnyịn imenyene Ikọ Abasi ndida nnyịn usụn̄. “Ke ini mbufo ẹbọde ikọ emi Abasi ọnọde ke ubọk nnyịn ẹsọk mbufo, mbufo idaha enye nte ikọ owo, edi ẹda enye nte ikọ Abasi—ke akpanikọ edi oro—ikọ oro onyụn̄ anam utom ke esịt mbufo emi ẹnịmde ke akpanikọ.”—1 Thessalonica 2:13.
Nso n̄kpọndịk idu ke ndinam sụk se nnyịn “ikerede” ke enen? (Mme N̄ke 14:12; Jeremiah 10:23, 24; 17:9)
Edieke nnyịn mîdiọn̄ọke item oro Bible ọnọde ke ndusụk n̄kpọ, nso ke nnyịn ikpanam? (Mme N̄ke 2:3-5; 2 Timothy 3:16, 17)
(3) Kpukpru nnyịn ibọ ufọn ito ukem ndutịm udia eke spirit. “Jehovah oyonyụn̄ eteme kpukpru nditọ fo.” (Isaiah 54:13) “Ẹyak nnyịn inyụn̄ ikere nte ikpedemerede kiet eken inọ ima ye nti utom; ikûnyụn̄ isịn ndisop idem ọtọ kiet, nte edu ndusụk owo edide, edi inọ kiet eken item; ndien mbufo ẹkpedọdiọn̄ ẹnam ntem, adan̄a nte ẹkụtde ẹte usen [nsobo] oro ke asan̄a ekpere.”—Mme Hebrew 10:24, 25.
Mme edidiọn̄ ewe ke mbon oro ẹbọde ọyọhọ ufọn ẹto mme ndutịm Jehovah kaban̄a udia eke spirit ẹnyene? (Isaiah 65:13, 14)
(4) Jesus Christ edi Adausụn̄ nnyịn, inyụn̄ idịghe owo efen. “Ẹkûyak ẹkot mbufo, ẹte, Rabbi; koro Kiet edi Andikpep mbufo, kpukpru mbufo ẹnyụn̄ ẹdi nditọ-ete. Ẹkûnyụn̄ ẹkot ndomo owo kiet ke isọn̄, ẹte, Ete; koro Kiet edi Ete mbufo, kpa Enye emi odude ke heaven. Ẹkûnyụn̄ ẹyak ẹkot mbufo, ẹte, Mbọn̄; koro Kiet edi Ọbọn̄ mbufo, kpa Christ.”—Matthew 23:8-10.
Nte owo nnyịn ekededi ekpenyene ndinịm ke akpanikọ nte ke imọfọn ikan mbon en̄wen? (Rome 3:23, 24; 12:3)
(5) Nnyịn idori enyịn ke ukara Obio Ubọn̄ Abasi nte n̄kukụre idotenyịn ubonowo. “Ẹbọn̄ akam ntem ndien, ẹte, Ete nnyịn emi odude ke heaven; yak ikpono enyịn̄ Fo, yak Ubọn̄ Fo edi; yak inam uduak Fo; nte ẹnamde ke heaven, yak inam ke isọn̄ kpasụk ntre. Ẹkam ẹbem iso ẹyom Obio Ubọn̄ Esie ye edinen ido Esie.”—Matthew 6:9, 10, 33.
Didie ke ‘ndibem iso nyom Obio Ubọn̄’ an̄wam ke ndikpeme edidianakiet nnyịn? (Micah 4:3; 1 John 3:10-12)
(6) Edisana spirit osion̄o mme edu emi ẹdide akpan n̄kpọ ọnọ edidianakiet Christian ke idem mme andituak ibuot nnọ Jehovah. “Mbun̄wụm Spirit edi ima, ye idatesịt, ye emem, ye ime, ye mfọn-ido, ye eti ido, ye edinam akpanikọ, ye ifụre ifụre ido, ye mfara ke idem.”—Galatia 5:22, 23.
Nso ke ana nnyịn inam man spirit Abasi osion̄o mbun̄wụm esie ke idem nnyịn? (Utom 5:32)
Didie ke ndinyene spirit Abasi otụk itie ebuana nnyịn ye ekemmọ mme Christian? (John 13:35; 1 John 4:8, 20, 21)
(7) Kpukpru mme ata andituak ibuot nnọ Abasi ẹbuana ke edikwọrọ eti mbụk Obio Ubọn̄ esie. “Ẹyenyụn̄ ẹkwọrọ gospel Ubọn̄ Abasi emi ke ofụri ekondo nte ntiense ẹnọ kpukpru mme idụt, ndien adan̄aoro ke utịt eyedi.”—Matthew 24:14.
Nso ikpesịn udọn̄ inọ nnyịn iyom ndinyene ọyọhọ ebuana ke utom ukwọrọikọ emi? (Matthew 22:37-39; Rome 10:10)
11. Nso idi utịp ke ini nnyịn idade akpanikọ Bible isịn ke edinam ke uwem nnyịn?
11 Ndituak ibuot nnọ Jehovah ke edidianakiet odụri nnyịn etịm ekpere enye onyụn̄ anam nnyịn idara inem inem ebuana ye ekemmọ mme andinịm ke akpanikọ. Psalm 133:1 ọdọhọ ete: “Idụn̄ nditọ-ete ke idem ọtọ kiet ọfọn didie! onyụn̄ eye didie!” Enem didie ntem ndidian̄ade n̄kpọn̄ ererimbot ye kpukpru ibụk, oburobụt ido, ye afai esie ndinyụn̄ nsop idem ye mbon oro ẹnen̄erede ẹma Jehovah ẹnyụn̄ ẹnịmde mbet esie!
Fep Mme N̄kpọ Emi Ẹtọde Ubahade
12. Ntak oyomde nnyịn ifep edu nda-ke-idem?
12 Man ikûbiat ọsọn̄urua edidianakiet eke ofụri ererimbot nnyịn, ana nnyịn ifep mme n̄kpọ emi ẹtọde ubahade. Kiet ke otu mmọ emi edi edu edida ke idem n̄kpọn̄ Abasi ye mbet esie. Jehovah an̄wam nnyịn ndifep enye ebe ke ndiyarade anditọn̄ọ enye, Satan kpa Devil. (2 Corinth 4:4; Ediyarade 12:9) Satan edi enye emi akanamde Adam ye Eve ẹfụmi se Abasi ọkọdọhọde ẹnyụn̄ ẹnam mme ubiere emi ẹtuahade ye uduak Abasi. Emi ama ada mmọ ye nnyịn okosụn̄ọ ke afanikọn̄. (Genesis 3:1-6, 17-19) Ererimbot emi ọyọhọ ye edu edida ke idem n̄kpọn̄ Abasi ye mbet esie. Ntre oyom nnyịn ibiọn̄ọ edu oro ke idem nnyịn.
13. Nso idiwụt m̀mê nnyịn imetịm idem ke ofụri esịt ndidu uwem ke edinen obufa ererimbot Abasi?
13 Ke uwụtn̄kpọ, kere ban̄a akama-nduaidem un̄wọn̄ọ Jehovah ndida obufa enyọn̄ ye obufa isọn̄ emi “edinen ido [edidụn̄de]” n̄kpụhọ ye idiọk ererimbot emi. (2 Peter 3:13) Ndi oro ikpesịnke udọn̄ inọ nnyịn nditọn̄ọ ntịm idem ndidu uwem ke ini oro edinen ido edidụn̄de? Emi ọwọrọ ndinam in̄wan̄-in̄wan̄ item Bible emi: “Ẹkûma ererimbot, ye se idude ke ererimbot. Edieke owo ekededi amade ererimbot, ima Ete idụhe enye ke esịt.” (1 John 2:15) Ntem, nnyịn isọn edu ererimbot emi—edu nda-ke-idem esie, ebeubọk uma idem esie, oburobụt ido ye afai esie. Nnyịn inam edi ido nnyịn ndikpan̄ utọn̄ nnọ Jehovah nnyụn̄ n̄kop uyo esie ke ofụri esịt nnyịn, kpa ye mme isio isio ntụhọ emi ẹtode anana-mfọnmma ikpọkidem. Ofụri usụn̄ uwem nnyịn ọnọ uyarade nte ke ekikere ye mme udọn̄ nnyịn ẹdi ndinam uduak Abasi.—Psalm 40:8.
14. (a) Ntak edide akpan n̄kpọ ndida ifet oro odude ke emi n̄kpep n̄kpọ mban̄a mme usụn̄ Jehovah nnyụn̄ nsan̄a ke mmọ ke uwem nnyịn? (b) Nso ke mme itie N̄wed Abasi oro ẹsiakde ẹsịn ke ikpehe ekikere emi ẹwọrọ ẹnọ nnyịn san̄asan̄a?
14 Ke ini ekemde Jehovah ndisobo idiọk editịm n̄kpọ emi ye kpukpru mbon oro ẹmade mme usụn̄ ererimbot, enye idinamke ubịghi. Enye idisịkke ini oro inịm m̀mê ndikpụhọde mme idaha esie man anam ufan̄ odu ọnọ mbon oro ẹsụk ẹdomode ndisọn̄ọ nyịre ye ererimbot ke adan̄aemi ẹkpepde uduak Abasi ẹnyụn̄ ẹnamde enye ke ubak esịt. Idahaemi edi ini ndinam n̄kpọ! (Luke 13:23, 24; 17:32; 21:34-36) Ke ntre, edi n̄kpọ inemesịt didie ntem ndikụt akwa otuowo ẹmụmde ọsọn̄urua ifet emi ẹkama, ke ọkpọsọn̄ udọn̄ ẹyomde item oro Jehovah ọnọde ebe ke Ikọ ye esop esie ẹnyụn̄ ẹdianade kiet ẹsan̄a ke ọkpọusụn̄ esie ẹka obufa ererimbot! Ndien adan̄a nte nnyịn ikpepde n̄kpọ iban̄a Jehovah, ntre ke nnyịn idima enye inyụn̄ iyom ndinam n̄kpọ nnọ enye.
Nneme Ndụn̄ọde
• Nso idi uduak Jehovah kaban̄a utuakibuot?
• Ke ima ikekpep mme akpan ukpepn̄kpọ Bible, nso n̄kaiso n̄kọri ke nnyịn ikpoyom ndinam ifịk ifịk?
• Nso ke nnyịn owo kiet kiet ikeme ndinam man idu ke edidianakiet ye mme andituak ibuot nnọ Jehovah eken?
[Ndise ke page 4]
“Mbon nsụkidem ẹyeda isọn̄ ẹnyene; ediwak emem ẹyenyụn̄ ẹnem mmọ esịt”