IKPEHE 11
Mme Ikwọ Abasi Oro Ẹdọn̄de Owo Esịt Ẹnyụn̄ Ẹkpepde Owo N̄kpọ
David ye mbon eken ẹwet ikwọ oro ẹdikwọde ke ini utuakibuot. N̄wed Psalm esịne ikwọ emi 150
N̄WED Bible emi okponde akan esịne mme ikwọ Abasi. Ẹkeda n̄kpọ nte isua 1,000 ẹwet n̄wed emi. N̄wed Psalm esịne mme ikọ mbuọtidem emi ẹtụkde owo ke idem ẹkan, emi akanam ẹwetde. Enye etịn̄ aban̄a inemesịt, itoro, ekọm, mfụhọ, ye edikabade esịt. Emi owụt ke mme andikewet psalm ẹma ẹnyene ata eti itie ufan ye Abasi. Kere ban̄a se ndusụk ikwọ emi ẹban̄ade.
Jehovah edi Akakan Andikara, ndien ana ẹtoro ẹnyụn̄ ẹtuak ibuot ẹnọ enye. Nnyịn ikot ke Psalm 83:18 ite: “Afo emi enyịn̄ fo ikpọn̄ ekerede Jehovah, edi Ata Edikon̄ ke ofụri ererimbot.” Ediwak psalm ẹtoro Jehovah ke mme n̄kpọ emi enye okobotde, utọ nte ikpaenyọn̄ oro ediwak ntantaọfiọn̄ ẹyọhọde, nsio nsio orụk uwem ke isọn̄, ye nte idem owo enyenede ndyọ. (Psalm 8, 19, 139, 148) Mbon eken ẹnọ Jehovah ubọn̄ nte Abasi emi anyan̄ade onyụn̄ ekpemede mbon oro ẹmade enye. (Psalm 18, 97, 138) Mme psalm eken ẹtoro Jehovah nte Abasi edinen ikpe emi anyan̄ade mbon oro ẹfịkde onyụn̄ amiade mme anamidiọk ufen.—Psalm 11, 68, 146.
Jehovah an̄wam onyụn̄ ọdọn̄ mbon oro ẹmade enye esịt. Etie nte ọyọhọ Psalm 23 ọwọrọ etop akan, kpa psalm emi David etịn̄de aban̄a Jehovah nte edima Ekpemerọn̄ emi ọbọkde, ekpemede, onyụn̄ esede aban̄a mme erọn̄ esie. Psalm 65:2 eti mme andituak ibuot nnọ Abasi ete ke Jehovah edi enye “emi okopde akam.” Psalm 39 ye 51 ẹdọn̄ ediwak owo emi ẹkenamde akwa idiọkn̄kpọ esịt, sia do ke David okobụk nte enye akakabarede esịt ke ikpọ idiọkn̄kpọ esie onyụn̄ enyene mbuọtidem ke Jehovah eyefen ọnọ imọ. Psalm 55:22 esịn udọn̄ ọnọ nnyịn ndibuọt idem ke Jehovah nnyụn̄ ntop kpukpru mbiomo nnyịn nnọ Enye.
Jehovah ayada Obio Ubọn̄ Messiah okpụhọde ererimbot. Ediwak itie ke Psalm ẹban̄a Messiah, kpa Edidem oro ẹken̄wọn̄ọde. Psalm 2 etịn̄ nte ke Andikara emi oyosobo mme idụt oro ẹbiọn̄ọde enye. Psalm 72 ọdọhọ ke Edidem emi eyetre akan̄, ukwan̄ikpe, ye ufịk. Psalm 46:9 ọdọhọ ke Abasi ayada Obio Ubọn̄ Messiah anam ekọn̄ etre onyụn̄ osobo kpukpru n̄kpọekọn̄. Nnyịn ikot ke Psalm 37 ite ke ẹyesobo mme idiọkowo ẹfep, ndien ke ndinen owo ẹyedụn̄ ke isọn̄ ke nsinsi, ẹdiana kiet, emem emi edidude ke ofụri ekondo oyonyụn̄ enem mmọ esịt.
—Ẹda ẹto n̄wed Psalm.