Ntak Emi Isisịnede N̄kpọ Ọfọn Ika Mme Mbono Esop Nnyịn?

Ndi omokụt ke mme ndise ke n̄wed emi nte Mme Ntiense Jehovah ẹsịnede n̄kpọ ọfọn ke ini ẹkade mme mbono esop mmọ? Ntak emi isitịn̄de enyịn ntre ikpeme nte isịnede n̄kpọ ye nte ikamade idem?

Man iwụt ukpono inọ Abasi nnyịn. Edi akpanikọ ke Abasi isisehe nte owo etiede ke enyọn̄ idem. (1 Samuel 16:7) Edi ke ini isopde idem man ituak ibuot inọ enye, nnyịn iyom ndiwụt ke imokpono enye ye ekemmọ mme andituak ibuot. Edieke nnyịn ikpadade ke iso ebiereikpe ke esop, anaedi nnyịn ikpekpeme nte ikamade idem ke ntak oro ikponode itieutom esie. Kpasụk ntre, nte nnyịn ikamade idem ke mme mbono esop nnyịn owụt ke imenen̄ede ikpono Jehovah Abasi, kpa “Ebiereikpe ofụri ererimbot,” ye ebiet oro isituakde ibuot inọ enye.—Genesis 18:25.

Man iwụt utọ edumbet oro idade idu uwem. Bible esịn udọn̄ ọnọ mme Christian ete ẹsịne n̄kpọ oro “owụtde iso o-bụt ye eti ibuot.” (1 Timothy 2:9, 10) Ndisịne n̄kpọ oro “owụtde iso o-bụt” ọwọrọ nditre ndisịne ọfọn̄ oro ẹkemede ndidụri ntịn̄enyịn mme owo nnọ idem nnyịn, utọ nte enye emi etiede n̄kon̄ine n̄kon̄ine, edemerede owo udọn̄ idan̄, m̀mê osion̄ode owo ndido idem. N̄ko, ndinyene “eti ibuot” an̄wam nnyịn isịne ediye ọfọn̄ oro mîtiehe nsuahade nsuahade m̀mê uwouwo. Mme edumbet emi ẹnọ owo ifụre ndimek ọfọn̄ oro ẹkpesịnede ye nte ẹkpekamade idem. Ndisịne n̄kpọ ediye ediye nnyụn̄ n̄kama idem ọfọn ẹkeme ‘ndinam ukpepn̄kpọ Andinyan̄a nnyịn, enyene uku’ ẹnyụn̄ “ẹnọ Abasi ubọn̄.” (Titus 2:10; 1 Peter 2:12) Nnyịn ndisịne n̄kpọ ọfọn n̄ka mme mbono esop oyotụk nte mme owo ẹsede utuakibuot oro ituakde inọ Jehovah.

Kûyak ọfọn̄ anam fi etre ndidụk mbono esop ke Ufọkmbono Obio Ubọn̄. Ọfọn̄ oro odotde, eyede onyụn̄ asanade inyeneke ndidi ọfọn̄ oro ọsọn̄de urua m̀mê odụkde owo enyịn.

• Nte nnyịn isịnede n̄kpọ ke ini ikade ndituak ibuot nnọ Abasi edi akpan n̄kpọ adan̄a didie?

• Mme edumbet ewe ẹn̄wam nnyịn ifiọk nte isịnede n̄kpọ ye nte ikamade idem?