Nso Idi Mfọnn̄kan Usụn̄ Nditịm Idem Nnọ Mbono Esop?

Edieke edide afo ke ekpep Bible ye kiet ke otu Mme Ntiense Jehovah, anaedi afo emesidụn̄ọde se edikpepde mbemiso ukpepn̄kpọ kiet kiet. Ọfọn anam ntre n̄ko mbemiso odụkde mme mbono esop man enen̄ede ọbọ ufọn. Iyetetịm ibọ ufọn ke ini inyenede eti ndutịm ukpepn̄kpọ.

Nyene ini ye ebiet emi afo edisikpepde n̄kpọ. Ini ewe ke afo esikeme ndinen̄ede nnọ ntịn̄enyịn ke n̄kpọ? Ndi esidi tụhi-tụhi usenubọk mbemiso ọtọn̄ọde ndinam n̄kpọ ekededi, m̀mê ke mbubreyo, ke nditọ fo ẹma ẹkede idap? Idem ọkpọkọm usûkemeke nditie mbịghi n̄kpep n̄kpọ, biere adan̄a ini emi afo edikpepde n̄kpọ kûnyụn̄ uyak n̄kpọ ndomokiet etịmede ini oro. Yom ebiet emi uyom mîdụhe, kọbi ekebe ukopikọ ye ekebe ndise, nyụn̄ nịme fon fo mbak n̄kpọ ediwọn̄ọde ntịn̄enyịn fo. Ndibọn̄ akam mbemiso ọtọn̄ọde ndikpep n̄kpọ ekeme ndin̄wam fi efre aban̄a mfịna eke usen oro man ekeme nditịn̄ enyịn n̄kpep Ikọ Abasi.—Philippi 4:6, 7.

Dụri udịm ke ibọrọ mbụme nyụn̄ ben̄e idem nditiene mbọrọ. Bem iso fiọk m̀mê nso ke ẹdineme. Kere ban̄a ibuotikọ, se nte n̄kpri ibuotikọ ẹnyenede ẹbuana ye ibuotikọ oro, nyụn̄ dụn̄ọde mme ndise ye mme mbụme ndụn̄ọde ekededi oro ẹnamde mme akpan n̄kpọ ẹn̄wan̄a. Ekem kot ikpehe ekikere kiet kiet nyụn̄ yom mme ibọrọ mbụme oro ẹbụpde. Kot mme itie N̄wed Abasi oro ẹsiakde ẹsịn, nyụn̄ kere nte mmọ ẹsọn̄ọde se ẹtịn̄de. (Utom 17:11) Ke ini okụtde ibọrọ mbụme, dụri udịm mîdịghe sịn idiọn̄ọ ke ọkpọikọ m̀mê ubak udịmikọ ifan̄ ke ikpehe ekikere oro, emi edin̄wamde fi eti ibọrọ mbụme oro. Ndien edieke amade, emekeme ndimenede ubọk ke mbono esop ọnọ ibọrọ ibio ibio ke ikọ idemfo.

Edieke odụn̄ọrede nsio nsio n̄kpọ oro ẹnemede kpukpru urua ke mbono esop, afo ọyọdọn̄ mbufa n̄kpọ ke “ufọk ubon n̄kpọuto” Ikọ Abasi fo.—Matthew 13:51, 52.

• Nso ndutịm ke afo ekpenyene man esitịm idem ọnọ mme mbono esop?

• Didie ke afo ekpetịm idem man ọbọrọ mbụme ke mbono esop?