Nso ke Afo Ekere Aban̄a Ini Iso?

SE BIBLE ETỊN̄DE

“Abasi . . . ọyọkwọhọde kpukpru mmọn̄eyet ke enyịn mmọ efep, n̄kpa idinyụn̄ idụhe aba, mfụhọ m̀mê ntuan̄a m̀mê ubiak idinyụn̄ idụhe aba. N̄kani n̄kpọ ẹma ẹbe ẹfep.”—Ediyarade 21:3, 4, Edikabade Eke Obufa Ererimbot.

UFỌN ORO AFO EKEMEDE NDIBỌ NTO EMI

Eyenyene eti utom oro edinemde fi ndinam.—Isaiah 65:21-23.

Ududọn̄ọke udunyụn̄ ubọhọ ufen aba.​—Isaiah 25:8; 33:24.

Oyodu inem inem uwem ke nsinsi ye mbonubon fo ye mme ufan fo.​—Psalm 37:11, 29.

NDI IMEKEME NDINỊM SE BIBLE ETỊN̄DE?

Ih, imenyene ntak iba ke nsụhọde n̄kaha ndinịm:

• Abasi enyene ukeme ndisu un̄wọn̄ọ oro. Ke Bible, Jehovah Abasi ikpọn̄ ke ẹkot “Ata Ọkpọsọn̄,” sia odudu esie inyeneke adan̄a. (Ediyarade 15:3) Ntre, enye enyene ukeme ndisu un̄wọn̄ọ esie ndikpụhọde ererimbot nnyịn emi nnam ọfọn akan emi. Bible ọdọhọ ke “Abasi ekeme ndinam kpukpru n̄kpọ.”​—Matthew 19:26.

• Ọdọn̄ Abasi ndisu un̄wọn̄ọ oro. Ke uwụtn̄kpọ, ‘ọdọn̄’ Jehovah ndinam mbon oro ẹkekpade ẹfiak ẹdidu uwem.​—Job 14:14, 15.

  Bible owụt n̄ko ke Jesus, Eyen Abasi, ama esikọk mme owo udọn̄ọ. Ntak emi enye akanamde emi? Sia enye ama ama ndinam ntre. (Mark 1:40, 41) Nte ọkọdọn̄de Jesus ndin̄wam mbon emi ẹyomde un̄wam owụt ke enye ama etịm ekpebe Ete esie.​—John 14:9.

  Ntre imenịm ke Jehovah ye Jesus ẹyom ndin̄wam nnyịn ikop inem uwem ke ini iso!​—Psalm 72:12-14; 145:16; 2 Peter 3:9.