Abasi Ọdọn̄ Utom Ọnọ Owo Iba

Imekeme ndida ofụri Bible nte etop emi Abasi ọnọde nnyịn. Ete nnyịn emi odude ke heaven ọnọ nnyịn Bible man ẹda ẹkpep nnyịn n̄kpọ. Ẹyak ikere iban̄a akpan etop emi Abasi ọkọdọn̄de ẹketobo owo iba ke se ibede isua 2,000. Angel Gabriel emi ‘adade ekpere iso Abasi,’ ke ẹkedọn̄ okotobo mmọ etop emi. (Luke 1:19) N̄kpọ eketie didie ye mme owo oro angel emi akakade ọkọnọ akpan etop emi?

N̄kpọ emi eketịbe ke isua 3 mbemiso eyo Christ. Akpa itie emi Gabriel akade okotobo etop edi ke obot obot ikpehe Judea emi etiede nte ekpere Jerusalem. Do ke oku Abasi emi ekerede Zechariah odụn̄. Enye ye Elizabeth an̄wan esie ẹsọn̄, edi mmọ inyeneke eyen ndomokiet. Zechariah edi oku Abasi, ntre, ini esie edikem ndidụk temple Abasi ke Jerusalem n̄kanam utom esie. Nte Zechariah osụk anamde utom ke temple, Gabriel ọbiọn̄ọde enye ke iso ke mben itie ufọp incense.

Ndịk anam Zechariah ndikụt Gabriel. Edi angel oro etịn̄ ikọ emi anamde idem okûnyek enye ete: “Kûfehe ndịk, Zechariah, koro ẹkop n̄kpeubọk fo, ndien n̄wan fo, Elizabeth, ayaman eyeneren ọnọ fi, afo oyonyụn̄ osio enye enyịn̄ John.” Gabriel etịn̄ n̄ko ete ke John “oyokpon ke iso Jehovah” onyụn̄ “etịm mbon emi ẹben̄ede idem ọnọ Jehovah.”—Luke 1:13-17.

Zechariah inịmke ikọ angel emi. Ntak-a? Sia enye ye Elizabeth an̄wan esie ẹsọn̄. Ntre Gabriel ọdọhọ enye ete: “Afo eyedi imụm, udunyụn̄ ukemeke nditịn̄ ikọ, tutu esịm usen eke mme n̄kpọ emi ẹdidade itie, koro afo mûkenịmke mme ikọ mi ke akpanikọ.”—Luke 1:20.

Ofụri emi, mme owo oro ẹbetde Zechariah ke an̄wa ke ẹkere m̀mê nso ikpanam enye ebịghi ndiwọrọ ndi ntre. Ke akpatre, enye ọwọrọ edi, edi ikemeke nditịn̄ ikọ aba. Enye ada ubọk anam idiọn̄ọ. Mme owo oro ẹfiọk ke enyene se enye okụtde ke temple emi ọsọn̄de odudu akan enye.

Ke ini Zechariah okụrede utom esie ke temple, enye ọnyọn̄ ufọk esiemmọ. Ibịghike, Elizabeth oyomo! Enye esịne ke ufọk ke ofụri ọfiọn̄ ition ke ini enye asan̄ade ye idịbi inyụn̄ idụkke otuowo.

Gabriel afiak okotobo owo en̄wen etop. Anie ke enye otobo etop isan̄ emi? Edi ekpri eyenan̄wan emi mîdọhọ ebe, emi ekerede Mary. Mary odụn̄ ke Nazareth, ke enyọn̄-enyọn̄ Galilee. Nso etop ke angel emi otobo enye? Angel oro ọdọhọ enye ete: “Afo omokụt mfọn ke iso Abasi; ndien, sese! afo oyoyomo onyụn̄ aman eyeneren, ndien afo enyene ndisio enye enyịn̄ Jesus. Enye oyokpon, oyonyụn̄ ekere Eyen Ata Edikon̄; . . . ndien enye ayakara ufọk Jacob nte edidem ke nsinsi, obio ubọn̄ esie idinyụn̄ inyeneke utịt.”—Luke 1:30-33.

Ama enem Gabriel ndika n̄kotobo owo iba oro etop oro. Nte ikotde mbụk John ye eke Jesus, iyokụt ntak emi etop oro Abasi ọkọdọn̄de angel esie okotobo Zechariah ye Mary ẹkedide ata akpan etop.