Mary Oyomo Mbemiso Ọdọde Ebe

Ọfiọn̄ inan̄ ẹdi emi tọn̄ọ Mary okoyomo. N̄kọ emeti ke enye okodu ye Elizabeth iman esie ke obot obot ikpehe Judea ke ini ntọn̄ọ ntọn̄ọ idịbi esie. Edi idahaemi, Mary afiak ọnyọn̄ ufọk mmọ ke Nazareth. Ibịghike, mme owo ẹmọn̄ ẹfiọk ke enye oyomo. Kere nte n̄kpọ emi afịnade enye.

Se inamde n̄kpọ emi enen̄ede afịna enye edi ke enye odụk ediomi ndọ ye anamusọ eto emi ekerede Joseph ke edem mmọ. Mary onyụn̄ ọfiọk ke Ibet emi Abasi ọkọnọde nditọ Israel ọkọdọhọ mmọ ẹtọn̄ọ n̄wan emi odụkde ediomi ndọ ke itiat ẹwot edieke enye akade ekenyene ebuana ye erenowo en̄wen. (Deuteronomy 22:23, 24) Okposụkedi emi Mary mîdịghe oburobụt owo, ekeme ndidi enye ke ekere nte imọ idikemede nditịn̄ nte idịbi imọ asan̄ade ye nte Joseph edisede imọ.

Ọfiọn̄ ita ẹdi emi tọn̄ọ Mary ọkọwọrọ, ntre anaedi Joseph enen̄ede oyom ndikụt enye. Ke ini mmọ ẹsobode, Mary emen se idude etịn̄ ọnọ enye, odomo ndinam an̄wan̄a enye ke edisana spirit Abasi anam imọ iyomo. Edi n̄kọ ọmọfiọk ke ọyọsọn̄ Joseph ndinịm utọ n̄kpọ emi sia idin̄wan̄ake enye.

Joseph ọfiọk ke Mary edi eti eyenan̄wan, esinyụn̄ okop mme owo ẹtin̄de nti n̄kpọ ẹban̄a enye. Joseph ama Mary etieti. Kpa ye oro Mary ọdọhọde ke edisana spirit anam imọ iyomo, osụk etie Joseph nte ke Mary oyomo ọnọ owo en̄wen. Joseph iyomke ẹtọn̄ọ Mary ke itiat ẹwot, inyụn̄ iyomke ndisuene enye; ntre, enye ebiere ndidedịbe nsio Mary ndọ. Ini oro, ẹkesida mbon oro ẹdụkde ediomi ndọ nte ebe ye n̄wan, ntre ama oyom ẹsosio owo ndọ mbemiso ẹbiatde ediomi ndọ.

Nte Joseph osụk ekerede n̄kpọ emi, idap ọbọhọ enye. Angel Jehovah ọdọhọ Joseph ke ndap ete: “Kûfehe ndịk ndida Mary n̄wan fo nnyọn̄ ufọk, koro idịbi oro enye oyomode oto edisana spirit. Enye ayaman eyeneren, ndien afo oyosio enye enyịn̄ Jesus, koro enye edinyan̄ade ikọt esie osio ke mme idiọkn̄kpọ mmọ.”—Matthew 1:20, 21.

Ke ini Joseph edemerede, esịt enem enye etieti sia ẹnam n̄kpọ emi enen̄ede an̄wan̄a enye. Ntre, ye unana ubiatini, enye anam kpa nte angel oro eketịn̄de. Enye ada Mary an̄wan esie ọnyọn̄ ufọk. Emi anam ediwak owo ẹfiọk ke enye ye Mary ẹdidi ebe ye n̄wan. Edi Joseph inyeneke ebuana ye Mary ke ini idịbi emi.

Ediwak ọfiọn̄ ke oro ebede, idịbi Mary enen̄ede aka anyan, edi enye ye Joseph ẹyom ndika anyan isan̄. M̀mọ̀n̄ ke mmọ ẹyom ndika idahaemi edide Mary ọmọn̄ amaman eyen mi?