Se Ẹwetde Ẹdian

Se Ẹwetde Ẹnọ Mme Ete ye Eka:

Imọfiọk ke ọdọn̄ fi ndin̄wam nditọ fo ẹma Jehovah ẹnyụn̄ ẹyak idem ẹnọ enye. Nso ke ekeme ndinam man an̄wam mmọ ẹben̄e idem ndina baptism? Ini ewe ke mmọ ẹkpedot ndinam emi?

Jesus ọkọdọhọ mbet esie ete: “Ẹkenam mme owo ke kpukpru idụt ẹdi mbet mi, ẹnịm mmọ baptism.” (Matt. 28:19) Emi owụt ke ata akpan n̄kpọ emi anade owo anam mbemiso enye ana baptism edi enye ndidi mbet, emi ọwọrọ ke ana enye ọdiọn̄ọ se Christ ekekpepde, ọdiọn̄ọ ke Christ ekekpep akpanikọ, onyụn̄ anam se Christ ekekpepde. N̄kpri nditọwọn̄ n̄ko ẹkeme ndinam emi.

Nịm eti uwụtn̄kpọ nọ nditọ fo nyụn̄ nam se Jehovah ekpepde nnyịn odụk mmọ esịt. (Deut. 6:6-9) Emi esịne ndida n̄wed Du Ata Uwem ke Nsinsi! n̄kpep mmọ n̄kpọ nnyụn̄ n̄n̄wam mmọ ẹdiọn̄ọ nditie n̄kere se Ikọ Abasi etịn̄de nnyụn̄ nda oro mbiere se mmọ ẹdinamde. N̄wam nditọ fo ẹkeme ndida ikọ idemmọ ntịn̄ se mmọ ẹnịmde ke akpanikọ. (1 Pet. 3:15) Se afo ekpepde onyụn̄ enemede ye mmọ, se mmọ ẹkpepde ke idemmọ, ẹkpepde ke utuakibuot ubon, ẹkopde ke mbono esop ye ke inua nti nditọete ayan̄wam mmọ ẹnam n̄kpọ man ẹdot ndina baptism, oyonyụn̄ aka iso an̄wam mmọ ke mmọ ẹma ẹkena baptism. N̄wam mmọ ẹbiere se mmọ ẹdinamde inọ Abasi.

Mme N̄ke 20:11 ọdọhọ ete: “Se eyenọwọn̄ anamde ke ẹda ẹfiọk m̀mê edinam esie asana onyụn̄ enen.” Nso ye nso idiwụt ke eyenọwọn̄ akabade edi mbet Jesus Christ, ke enye onyụn̄ eben̄e idem ndina baptism?

Ana eyen emi oyomde ndina baptism esikop uyo ete ye eka esie. (Utom 5:29; Col. 3:20) Ke ini Jesus ekedide isua 12, Bible ọdọhọ ke ‘enye ama aka iso osụk ibuot ọnọ ete ye eka esie.’ (Luke 2:51) Imọdiọn̄ọ ke udorike enyịn eyen fo ndifọn mma nte Jesus, edi ana eyen emi oyomde ndina baptism esịn idem ekpebe Jesus. Ana mme owo n̄ko ẹdiọn̄ọ enye nte eyen n̄kopitem.

Enye n̄ko ayanam n̄kpọ ndiwụt ke imama ndikpep Bible. (Luke 2:46) Ndi esidọn̄ eyen fo ndidụk nnyụn̄ ntiene nnam n̄kpọ ke mme mbono esop? (Ps. 122:1) Ndi esidọn̄ enye ndikot Bible nnyụn̄ ntie ke idem esie n̄kpep n̄kpọ kpukpru ini?—Matt. 4:4.

Eyen emi oyomde ndina baptism esiwụt ke imọ ibem iso iyom Obio Ubọn̄ Abasi. (Matt. 6:33) Enye ọdiọn̄ọ ke ana isikwọrọ ikọ inọ mme owo. Enye esitiene ọkwọrọ ikọ ke nsio nsio usụn̄ emi isikwọrọde ikọ. Bụt isinyụn̄ inamke enye ndidọhọ mme andikpep ye nditọ ufọkn̄wed mmọ ke imọ idi Ntiense Jehovah. Enye n̄ko isidaha se ẹnọde enye anam ke Mbono Esop Uwem ye Utom Nnyịn inam mbubru.

Enye isidụkke idiọk ndụk mbak owo idibiat enye. (N̄ke 13:20; 1 Cor. 15:33) Utọ ikwọ, fim, edinam TV, ye vidio emi enye amade, ye se enye esinamde ke Intanet ke ẹdida idiọn̄ọ ke enye idụkke idiọk ndụk.

Ediwak nditọ ẹnam se mme ete ye eka ẹsikpepde mmọ. Mmọ ẹda Ikọ Abasi ẹdu uwem, ẹnyụn̄ ẹdot ndina baptism ke ini mmọ ẹsụk ẹdide n̄kpri. Yak Jehovah ọdiọn̄ fi ke se anamde ndin̄wam eyen fo anam ata akpan n̄kpọ emi onyụn̄ aka iso edi ufan Jehovah.

Se Ẹwetde Ẹnọ Asuanetop Oro Mînaha Baptism:

Ndidi asuanetop oro mînaha baptism idịghe ekpri n̄kpọ. Amanam etieti nte enyịmede ndidi ọkwọrọikọ. Afo ndisịn idem n̄kpep Ikọ Abasi nnyụn̄ nnịm se Abasi ọn̄wọn̄ọde ndinam, anam fi enen̄ede ọdiọn̄ọ enye.—John 17:3; Heb. 11:6.

Mbemiso ọkọtọn̄ọde ndikpep n̄kpọ ye Mme Ntiense Jehovah, ekeme ndidi ama enyene ufọkabasi emi ekesikade, onyụn̄ ekeme ndidi ukûkaha ufọkabasi ndomokiet. Ekeme ndidi ama esinam mme n̄kpọ emi Bible ọdọhọde ke ifọnke. Edi idahaemi amanam n̄kpọ emi owụtde ke emenyene mbuọtidem ke Abasi. Amakabade esịt, onyụn̄ atua n̄kpọfiọk aban̄a ndiọi n̄kpọ oro ekesinamde. Emetre ndidu idiọk uwem onyụn̄ ebiere ndinam se Abasi amade.—Utom 3:19.

Ekeme ndidi ẹkekpep fi Ikọ Abasi “toto ke nsek,” ndien emi ama an̄wam fi, iyakke anam akwa idiọkn̄kpọ ye mme n̄kpọ eken emi Christian mîkpanamke. (2 Tim. 3:15) Omokụt ke se afo ekpepde ke Bible iyakke fi etiene anam se ubọkn̄ka fo ẹnamde m̀mê mme n̄kpọ eken emi Jehovah asuade. Nte akade iso anam n̄kpọ Jehovah onyụn̄ etịn̄de se afo enịmde ọnọ mbon en̄wen, emi owụt ke ọmọbuọt idem ke Abasi. Ẹkpep fi nsio nsio usụn̄ emi Christian ọkpọkwọrọde ikọ. Idahaemi afo emebiere ke idemfo ndidi asuanetop oro mînaha baptism nnyụn̄ n̄ka iso nnam n̄kpọ Jehovah.

Edide ẹken̄wam fi ọtọn̄ọ ndidiọn̄ọ Jehovah Abasi toto ke nsek m̀mê ekedi edidiọn̄ọ enye ke ama okokpon, imenịm ke afo ke aduak ndinam akpan n̄kpọ iba emi ẹdinamde etetịm ekpere Abasi, oro edi, ndiyak idem fo nnọ Abasi nnyụn̄ nna baptism. Afo ayak idem ọnọ Jehovah ke ini ọbọn̄de akam ọdọhọ enye ke oyom ndinam n̄kpọ esie ke nsinsi. (Matt. 16:24) Ekem afo ana baptism man anam mme owo ẹdiọn̄ọ ke ama ayak idem ọnọ Abasi. (Matt. 28:19, 20) Ama ayak idem ọnọ Abasi onyụn̄ ana baptism, ini emi ndien ke afo edikabade idi asan̄autom emi Jehovah Abasi emekde. Idịghe ekpri n̄kpọ edi oro!

Nte osụk ekpepde Bible, omokụt ke emekeme ndisobo nsio nsio idomo. “Spirit [ama] ada Jesus ọdọk aka wilderness man Devil okodomo enye” esisịt ini ke enye ama akana baptism. (Matt 4:1) Afo emekeme ndisobo idomo n̄ko ke ama akana baptism. (John 15:20) Mme idomo emi ididịghe usụn̄ kiet. Mbonufọk mbufo ẹkeme ndibiọn̄ọ fi. (Matt. 10:36) Nditọ ufọkn̄wed mbufo, mbon itieutom mbufo, idem n̄kani ufan fo ẹkeme ndisak fi. Kûfre ikọ Jesus ke Mark 10:29, 30. Jesus ọkọdọhọ ete: “Ke akpanikọ ke ndọhọ mbufo, idụhe baba owo kiet emi ọkọkpọn̄de ufọk m̀mê nditọeka iren m̀mê nditọeka iban m̀mê eka m̀mê ete m̀mê nditọ m̀mê in̄wan̄ ke ntak mi ye ke ntak eti mbụk emi mîdibọhọ n̄kpọ utịm ikikie idahaemi ke ini emi, mme ufọk ye nditọeka iren ye nditọeka iban ye eka ye nditọ ye in̄wan̄, ọkọrọ ye ukọbọ, ye nsinsi uwem ke editịm n̄kpọ emi edidide.” Ntre, ka iso sịn idem nam n̄kpọ man ekpere Jehovah onyụn̄ odu uwem nte enye oyomde.

Okpoyom ndina baptism, mbọk dọhọ anam-ndutịm otu mbiowo. Mme mbụme oro ẹtienede mi ke mbiowo ẹdida inyene nneme ye afo man ẹdiọn̄ọ m̀mê omodot ndina baptism. Emekeme nditọn̄ọ nse mme mbụme emi ke ini ekpepde n̄kpọ ke idemfo.

Mbemiso mbiowo ẹnemede mme mbụme emi ye afo, da ini kot nyụn̄ tie kere mme itie Bible emi ẹkotde-kot ẹsịn do. Emekeme ndiwet ndusụk ibọrọ nsịn ke n̄wed emi mîdịghe ewet esịn ke n̄kpọ en̄wen. Emekeme ndikama se afo ekewetde onyụn̄ okụbọde n̄wed emi ese ke ini mbiowo ẹnemede mme mbụme oro ye afo. Edieke odude mbụme oro mîn̄wan̄ake fi, dọhọ owo emi ekpepde fi Bible an̄wam fi mîdịghe dọhọ mbiowo ẹn̄wam fi.

Ke ini mbiowo ẹnemede mme mbụme oro ye afo, kûnọ nnyan ibọrọ. Mbio mbio ibọrọ emi ọnọde ke ikọ idemfo ọfọn akan. Ediwak ini, ọyọfọn asiak itie Bible kiet m̀mê iba emi ọsọn̄ọde ibọrọ oro afo ọnọde.

Edieke mbiowo ẹkụtde ke unen̄ekede udiọn̄ọ kan̄a mme akpan n̄kpọ emi Bible ekpepde, mmọ ẹyedọhọ owo afiak an̄wam fi. Owo emi ayanam fi enen̄ede ọdiọn̄ọ nte akpadade ikọ idemfo etịn̄ se Bible ekpepde man odot ndina baptism ini en̄wen.

[Se ẹwetde ẹnọ mbiowo: Imetịn̄ nte ẹkpenemede mme mbụme oro ye mbon emi ẹyomde ndina baptism ke page 208-212.]