IKPEHE ITION
Fiak Tiene ‘Andikpeme ye Andise Mban̄a Ukpọn̄ Fo’
Ndi kiet ke otu mme n̄kpọ oro inemede ke ediye ekpri n̄wed emi ọwọrọ fi? Edieke edide ntre, fiọk ete ke idịghe afo ikpọn̄ ke ọwọrọ. Mme n̄kpọ emi ẹma ẹwọrọ ediwak ikọt Abasi ke eset ye ke eyo nnyịn. Jehovah ayan̄wam fi akan se iwọrọde fi kpa nte enye akan̄wamde mmọ.
Jehovah ayadara fi ke ini afiakde etiene enye
NEN̄EDE nịm ke Jehovah ayadara fi ke ini afiakde ọnyọn̄ etiene enye. Enye ayan̄wam fi okûtịmede esịt, okûyat esịt ke ntak se mme owo ẹkenamde fi, onyụn̄ anam enyene edisana esịt man esịt ana fi sụn̄. Ndien emi ayanam afiak ekeme ndidiana ye nditọete ke esop nnam n̄kpọ Jehovah. Afo editie nte mme Christian eyo mme apostle, emi apostle Peter ọkọdọhọde ete: “Mbufo ẹketie nte mme erọn̄ eke ẹsopde usụn̄; edi idahaemi mbufo ẹmenyọn̄ ẹtiene andikpeme ye andise mban̄a ukpọn̄ mbufo.”—1 Peter 2:25.
Ndifiak ntiene Jehovah edi mfọnn̄kan n̄kpọ oro afo ekemede ndinam. Ntak-a? Afo ayanam esịt adat Jehovah. (Mme N̄ke 27:11) Se afo anamde ekeme ndinam esịt enem m̀mê ayat Jehovah. Edi, Jehovah inyịkke-nyịk nnyịn ima imọ m̀mê inam n̄kpọ imọ. (Deuteronomy 30:19, 20) Ataifiọk kiet emi anamde ndụn̄ọde aban̄a Bible ọdọhọ ete: “Idụhe owo emi ekemede ndinam fi ama Jehovah ke ofụri esịt, afo enyene-idem enyene ndinam ntre.” Edieke imade Jehovah, iyanam n̄kpọ esie ke ofụri esịt. Ndinam emi owụt ke imọsọn̄ọ ida ye enye, ndien emi edi akakan n̄kpọ oro ikemede ndinam nnọ enye, oyonyụn̄ anam esịt enen̄ede enem Jehovah. Idụhe se ikemede ndinam nnyịn ikop inemesịt nte ndinam n̄kpọ Jehovah ke ofụri esịt.—Utom 20:35; Ediyarade 4:11.
Akan oro, ke ini afiakde ọtọn̄ọ ndinam n̄kpọ Jehovah, udûkopke aba biọn̄ Ikọ Abasi. (Matthew 5:3) Ediwak owo ke ererimbot ẹsikere, ‘Ntak emi Abasi okobotde nnyịn?’ Esinen̄ede ọdọn̄ mmọ ndifiọk ntak emi Abasi okobotde nnyịn. Nte Jehovah okobotde nnyịn edi oro. Enye okobot nnyịn man ikop inemesịt ndinam n̄kpọ esie. Idụhe se ikemede ndinam nnyịn inen̄ede ikop inemesịt nte ndifiọk ke nnyịn inam n̄kpọ Jehovah sia imade enye.—Psalm 63:1-5.
Mbọk fiọk ete ke Jehovah oyom fi afiak etiene imọ. Ntak idọhọde ntre? Kere ban̄a emi: Ima ida ini ibọn̄ akam mbemiso iwetde ediye ekpri n̄wed emi. Ekem, ebiowo m̀mê eyenete en̄wen ke esop ada n̄wed emi ọsọk fi. Ndien afo okot onyụn̄ anam se n̄wed emi ọdọhọde. Kpukpru emi owụt ke Jehovah ifreke fi. Utu ke oro, enye akam ododụri fi sụn̄sụn̄ adian ke idem.—John 6:44.
Ndifiọk ke Jehovah isifreke ikọt esie oro ẹsopde usụn̄ ọdọn̄ nnyịn esịt. Se ikọdọn̄de eyenete an̄wan emi ekerede Donna esịt edi oro. Enye ọkọdọhọ ete: “Mma n̄kpọn̄ esop sụn̄sụn̄, tutu n̄kpọn̄ ofụri ofụri; edi mma nsitie n̄kere se ẹwetde ke Psalm 139:23, 24, emi ọdọhọde ete: ‘O Abasi, dụn̄ọde mi nyụn̄ fiọk esịt mi. Domo mi se, nyụn̄ fiọk ekikere mi, nyụn̄ se m̀mê idiọk ekikere odu mi ke esịt, ndien da mi san̄a ke nsinsi usụn̄.’ Mma mfiọk ke an̄wa ererimbot ifọnke ye ami, ke nnyụn̄ n̄kemeke ndinam kpukpru se mbon ererimbot ẹnamde; mma mfiọk ke ana mfiak nnyọn̄ esop Jehovah, koro do ọfọn ye ami. Mma ndikụt ke Jehovah ikotopke mi iduọk, ke oyom mfiak nnyọn̄ ntiene imọ. Esịt enen̄ede enem mi ndifiak ntiene Jehovah!”
“Mma ndikụt ke Jehovah ikotopke mi iduọk, ke oyom mfiak nnyọn̄ ntiene imọ”
Nnyịn ibọn̄ akam ite Jehovah akpakam anam fi n̄ko afiak edinam n̄kpọ esie ye “idatesịt.” (Nehemiah 8:10) Udutuaha n̄kpọfiọk tutu amama ndifiak ntiene Jehovah.