Jacob ye Esau Ẹnam Emem

Jehovah ama ọn̄wọn̄ọ ọnọ Jacob ke iyekpeme enye nte ikekpemede Abraham ye Isaac. Jacob okodụn̄ ke Haran. Enye ama ọdọ iban, enyene ediwak nditọ ye ata ediwak inyene.

Nte ini akakade Jehovah ama ọdọhọ Jacob ete: ‘Fiak nyọn̄ obio emana fo.’ Ntre Jacob ye ubon esie ẹma ẹtọn̄ọ anyan isan̄ unyọn̄. Nte mmọ ẹsụk ẹkade ke usụn̄, mme asan̄autom Jacob ẹma ẹdidọhọ enye ẹte: ‘Esau eyenuka ke edi, enye asan̄a ye owo 400!’ Idem ama enyek Jacob sia enye ekekere ke Esau ọmọn̄ edinam mmimọ n̄kpọ. Enye ama ekpe Jehovah ubọk ete: ‘Mbọk nyan̄a mi sio eyeneka mi ke ubọk.’ Edem usen oro, enye ama ọnọ ediwak erọn̄, ebot, enan̄, camel, ye ass ẹsọk Esau.

Okoneyo oro Jacob ama okụt angel ke ini enye okodude ikpọn̄! Angel oro ama ọtọn̄ọ en̄wan ye enye. Mmọ ẹma ẹn̄wana tutu eyo esiere. Kpa ye emi angel oro akatuakde enye ọkpọ ekikoi efebede, enye ikenyịmeke ndisana angel oro nyak. Angel oro ama ọdọhọ enye ete: “Yak mi nnyọn̄.” Edi Jacob ama ọdọhọ ete: “Ndiyakke fi ọnyọn̄ ibọhọke afo ọdiọn̄ mi.”

Ke akpatre, angel oro ama ọdiọn̄ Jacob. Jacob ama ada oro ọdiọn̄ọ ke Jehovah idiyakke Esau anam imọ n̄kpọ.

Usenubọk oro Jacob ama ada okụt Esau ye owo 400 emi ẹsan̄ade ye enye ke ata anyan usụn̄. Jacob ama ebem ubon esie iso aka okonụhọ ọnọ Esau eyeneka esie utịm ikatiaba. Esau ama efehe akafat Jacob. Mmọ mbiba ẹma ẹtua ẹnyụn̄ ẹnam emem. Ekere ke eketie Jehovah didie ndikụt se Jacob akanamde oro man anam emem ye eyeneka esie?

Ekem Esau ama afiak ọnyọn̄ ufọk esie, Jacob onyụn̄ ebe aka esie. Jacob ekenyene nditọ irenowo 12. Mmọ ẹkekere Reuben, Simeon, Levi, Judah, Dan, Naphtali, Gad, Asher, Issachar, Zebulun, Joseph, ye Benjamin. Eyen esie kiet emi ekekerede Joseph ke Jehovah akada anyan̄a ikọt Esie. Ndi ọmọdiọn̄ọ nte Jehovah akanamde oro? Iyokụt.