Ẹmụm Jesus

Jesus ye mme apostle esie ẹsan̄a Itịghede Kidron ẹka Obot Olive. Ebe ufọt okoneyo idahaemi, ọfiọn̄ onyụn̄ ọyọhọ idịbi. Ke ini mmọ ẹsịmde In̄wan̄ Gethsemane, Jesus ọdọhọ mmọ ete: “Ẹtie mi ẹtiene mi ẹkpeme.” Ekem enye esịk ọkpọn̄ mmọ ekpri, odụk esịt in̄wan̄ ọkọtọn̄ọ edọn̄ ọbọn̄ akam. Jesus ama ofụhọ etieti, kpa ye oro enye ama ọdọhọ Jehovah ete: “Yak uduak fo ada itie.” Jehovah ama ọdọn̄ angel edisọn̄ọ enye idem. Ini enye afiakde ebịne mme apostle esie, enye ama okụt mmọ ẹdede idap onyụn̄ ọdọhọ mmọ ete: ‘Ẹdemede! Idịghe ini idap edi emi! Ẹmọn̄ ẹmen mi ẹsịn mme asua ke ubọk.’

Jesus ete itetịn̄ ikọ emi ima Judas ama edisịm, asan̄a ye otuowo emi ẹkamade akan̄kan̄ ye okpoyon̄. Enye ama ọdiọn̄ọ ke iyokụt Jesus do sia mmọ ẹma ẹsima ndika do. Enye ama ọdọhọ mbonekọn̄ oro nte enye edinamde mmọ ẹdiọn̄ọ Jesus. Ntre enye ama asan̄a ebịne Jesus ọkọdọhọ ete: ‘Rabbi, mmọkọm-o,’ onyụn̄ etịm enye inua. Jesus ama ọdọhọ enye ete: ‘Judas, ndi ada ntịminua ada mi ọnọ?’

Jesus ama asan̄a ebịne otuowo oro okobụp mmọ ete: “Ẹyom anie?” Mmọ ẹma ẹdọhọ ẹte: “Jesus eyen Nazareth.” Enye ama ọdọhọ mmọ ete: ‘Ami ndi Jesus.’ Ke enye ama eketịn̄ ntre, mmọ ẹma ẹfiak edem ẹkeduọn̄ọ ke isọn̄. Jesus ama afiak obụp mmọ ete: “Ẹyom anie?” Mmọ ẹma ẹfiak ẹdọhọ ẹte: “Jesus eyen Nazareth.” Jesus ama ọdọhọ ete: ‘Mmọdọdọhọ mbufo ke ami ndi Jesus. Ẹyak mbon emi ẹnyọn̄ọ.’

Ke ini Peter okụtde ke ẹmọn̄ ẹmụm Jesus ẹdaha, enye ama osio akan̄kan̄ esịbe Malchus emi ekedide ofụn Akwa Oku utọn̄. Edi Jesus ama emen utọn̄ Malchus adian, onyụn̄ ọdọhọ Peter ete: ‘Sịn akan̄kan̄ fo ke efọk. Edieke adade akan̄kan̄ an̄wana en̄wan, ẹdida akan̄kan̄ iwot fi.’ Mbonekọn̄ ẹma ẹmụm Jesus ẹbọp ubọk; mme apostle ẹnyụn̄ ẹfen̄e. Ẹma ẹda Jesus ẹka ufọk Annas emi ekedide ọbọn̄ oku. Enye ama afak Jesus mbụme, ekem ọdọhọ ẹmen enye ẹka ufọk Caiaphas emi ekedide Akwa Oku. Nso iketịbe inọ mme apostle emi ẹkefen̄ede?